Jemusi 5
5
Chichenjejo kubafumi
1Iwhililani ngweno, imwi bafumi, lilani akale mufwikule pezhulu pokuyangata kukumuzha kunamwi. 2Ifuma yenu yabola akale zwimbalo zwenu zwamumwa nonchenje. 3Indalama nesiliva yenu zwaba nengula, akale ingula yabo ndiyo ichaba busumikiji pezhulu penu akale bunoolya umbili wenu somoto. Mwakalundika ifuma yamazhuba opejeleja. 4Ilingani! Indipilo yamwakakonwa kulipa bashingi bakashakula muminda yenu ikumulila pezhulu penu. Kulila kwabakavuna kwasika munzebe jaMwali wamasimba ose. 5Mwalalama penyika mububuya nokunakilwa, mwazwikoja mutila izhuba lyokubulayiwa. 6Mwapa bamwe undandu akale mukabulaya unhu ulolulama iye usinonyenyejana namwi.
Mwoyo ndefu nokuNamata,
7Banakwaina ibani nomwoyo undefu, kuswika kubuya kwaTezi. Undimi unomilila unchelo umbuya wenyika, eba nomwoyo ndefu kuswikila wawana ivula yotanga neyopejisila. 8Namwibo ibani nemyoyo milefu. Simisani myoyo yenu, nokuti kuzha kwaTezi kwaba pelyo.
9Banakwaina kusibe nokungunguna pakati penu, kutila kuti musipiwe untongo, ilingani untongi umile ponkoba. 10Banakwaina tolani bapolofeti bakalebeleka muzina lyaTezi, sechitondejelo chokuyabula akale nomwoyo ndefu. 11Lingani, tobashoba totibaloshanta yabobalosimitija. Mwakahwa nokusimitija kwaJobhu, akale mwakabona chinangwa chaTezi kumapejelejo, akale Tezi unaluwhilo neshe.
12Pezhulu pezwinhu zwose, banakwaina bangu, musikowhe nedenga, kana nenyika, kana neipi yose ikowhe, koga “Eya” ngebe “Eya” kana kuti pe ngebe pe kutila kuti musiwile mundandu.
13Pana ukumuyabula pakati penu na? Ngenamate. Upo uloshantilwa na? Ngekwimbe jimbo jolukujo. 14Kuna umulwala na pakati penu? Ngeeshobe bakulwana begubungano boonamatile boongube namafuta aTezi. 15Unamato wokudimbwa unoonchilisa undwaji, akale Tezi banoomusa, kana elinoluchinyo, unoolekejelwa. 16Nokudalo lebululani luchinyo kunomwe noumwe akale munamatilane, kuti muchiliswe. Unamato wowakalulama una isimba lyinji akale unoshinga. 17Elija wakabeli unhu sasu koga wakanamata nesimba kuti ivula isine penyika, akale kwamakole matatu nemyeji mishanu nomwempela akujakana. 18Kova enamata kabili ivula ikana iva kudenga, akale inyika ikamejeka zwilimwa zwayo.
19Banakwaina bangu, kana umwe pakati penu epamhala kuva kulebeswa kova umwe ochingunula, 20ngeezibe kuti yoyo unochinungula uchinyi kuva mukulashika munzila iye, unochija mwoyo uwe kulufu kova etibikila zwibi zwinji.
The word for The World International