BaGalatiya 3
3
Mulawo kana kudimbwa
1Imwi baGalatiya malengende! Ndiani wakamulowa? Mbeli kwamesho enu Jesu Kristo wakatondejelwa pachena ndiye wakakahamilwa panchinjikwa. 2Ndimubhuze yechi chete, mwakatambula uMpepo nemishingo yomulawo, kana nokudimbwa zwamwakawha? 3Ani mumalengende na? Zwamakatanga noMpepo, biya mungojibija nozwombili na? 4Zwakatikana kwamuli zwinji azwitoleba chinhu na? Chokomende zwina zwazwinoleba. 5Ani iye unomupa uMpepo nokuta zwichenamiso pakati penu unota alo nemishingo yomulawo, kana nokuwhilila muli nokudimbwa.
6Yeyani Abhulahamu, “wakadimbwa kuna Mwali, zwikalangalilwa kuti bululami kuna iye.” 7Nokudalo mubweni kuti banhu banodimbwa, ndibo bana baAbhulahamu. 8Akale nolukwalo, lubona zwikombeli kuti Mwali unoolulamisa boKuzhe nokudimbwa, lwakabhaunula indebo iMbuya zwisanu zwatikana kunaAbhulahamu, luti “Munawi induji jose jinookombolelwa.” 9Nokudalo, yabo banhu banodimbwa balokombolelwa pamwempela naAbhulahamu wakabedimbwa.
10Nokuti bose banobimba nemishingo yomulawo balofhizhwa, sezwazwilokwalwa kuwhi, “Ngefhizhwe unhu wose usinotobeleja zwinhu zwose zwilokwalwa mulukwalo lomulawo, nokuzwita.” 11Ngweno zwipopachena kuti apana unhu unolulamiswa mbeli kwaMwali nomulawo, nokuti, “Iye ulolulama unolalama nokudimbwa.” 12Koga mulawo aunani nezwokudimbwa, nokuti, “Iye unoilondota unoolalama nayo.” 13Kristo wakatisunungula mukufhizhwa kwomulawo, nokuti iye wakaba chifhizho nokuda kwedu, sezwazwilokwalwa kuwhi, “Ulofhizhwa unhu wose ulolengelela panti” 14kuti munaKristo Jesu chikombolelo chaAbhulahamu chingezha pana boKuzhe, kuti titambule chibimbiso choMpepo nokudimbwa.
Mulawo nechibimbiso
15Banakwaina, lingani ndimupe unkwejaniso wezwinhu zwinotikana mazhuba ose, apana unojima chido chonhu kana kupamija pezhulu pacho, kana chavumilanwa. 16Ngweno zwibimbiso zwakatiwa kunaAbhulahamu nokunzwalo iye. Iwhalo ayitoleba kuti, “Nokunzwalo jije,” ileba inji, asi ileba imwempela, “Akale kunzwalo iyo,” ileba Kristo. 17Chandimuleba ndiyechi, mulawo, wakoozha kwapinda makole mazana mana namakumi matatu aungajime chivumilano chakavumilanwa naMwali kuti chibimbiso chisishinge. 18Nokuti kana ifuma ipiwa nomulawo, azwichizwechibimbiso koga Mwali wakaipa Abhulahamu nechibimbiso.
19Biya mulawo ngoweni? Wakapamijwa nokubaipo kwezwibi, kuswikila inzwalo yaswika kunaiyo chibimbiso kuchakatiwa, akale wagajwa nengilozi nomumililili. 20Ngweno umililili unoleba banji, koga Mwali umwempela.
Chinangwa chomulawo
21Ani mulawo unolwisana nezwibimbiso zwaMwali na? Azwitoba alo, nokuti kana mulawo watalwa unota kuti kube nobupenyu, nokudalo bululami bwalubuzwa nomulawo. 22Koga lukwalo lunobiga zwinhu zwose pasi poluchinyo, kuti yezwo zwakabimbiswa mukuvuma munaJesu Kristo zwipiwe yabo banodimbwa.
23Ngweno kudimbwa kusanu kwabayipo, takabakakonyelwa pasi pomulawu, takasungwa kuswikila kudimbwa kwaputunulwa. 24Nokudalo mulawo wakaba undondoti wedu kujine Kristo aswika, kuti tilulamiswe nokudimbwa. 25Koga ngweno sezwo kudimbwa lwaswika, atichili pasi pondondoti.
26MunaKristo Jesu imwi mose mubana baMwali nokudimbwa, 27nokuti mwakabhabhatizwa munaKristo, mwambala Kristo. 28Akuchina unJuda kana unGiliki, akuchina unzike kana unsungunuki, akuchina unhulume kana unhukaji, nokuti mose muchinhu chimwempela munaKristo Jesu. 29Akale kana muli baKristo, nezwo muli benzwalo yaAbhulahamu, balyifumi sechibimbiso chakatiwa.
The word for The World International