मत्ती 3
3
बप्तिस्मा-बिन्नान्न यूहन्नान ताह्फेः
(मर्क १:१-८; लुक ३:१-१८; यूह १:१९-२८)
1मन्नै भेला बप्तिस्मा बिन्नान्न यूहन्ना यहूदिया प्रदेसन सुनसान ठाउँग स्वाबो, रे झाम र्वाईर्वाई ताह्फेम्मः जाःबो, 2नुई र्वाबो, “जेँन तीपावलम होला, तैङर्वाङिन स्वर्गन राज्य रह्म्म स्वापा ङ्याह्।”#यसै ४०:३ 3तैङर्वाङिन अन नुई जेङ्पा, सुन भारेः यसैया भबिस्यबक्तालम झाम र्वापा ङ्याह्:
“सुनसान ठाउँग तीपा फाईरा खेनान्न केह्ः, ‘परमप्रभुन लम तयार ख्या, नुन लम थार्का धोँवा’।”#यसै ४०:३ 4यूहन्नाई ऊँतन पूह्न घोलाङ गोङ्ङ, रे हाङग फोन्न धब दम्ङ। नुन झायाप लिप्नान्न नर्सिङ्का किम रे तप्लन-अकु ङ्याह्।#२ झली १:८ 5यरूसलेम सहर, यहूदिया प्रदेसन नाम पुरू रे यर्दन चाङ्पुन लिब्रुङ्क्याँलै सिमिव नुन रह्म्म होई, 6रे जेँ-जेँन तीपाव स्वीकार खेईखेई यर्दन चाङ्पू नुनलम बप्तिस्मा वम्मः जाःबो।
7जेङ्नै फरिसीव रे सदुकीवन बर्ग लैःग बप्तिस्मा वम्मः स्वायङ खेपा रङरङ नुई ख्युकाङ्मोः र्वाबो, “ए भुलेन्न वैचा हो, स्वामः जाःपान सेह्ताङलम ज्यार्मः सुई ङेनकाङ्मोः चेतावनी बिम्बो? 8मन धोनव ख्या कनजै ङेन जेँन तीपावलम होल्पा ङ्याह् र्वार्वा थङ्ङ। 9अब्राहामै ङिन पा जेङ्पा र्वार्वा राह्ङराङ्साः ल्होई नर्वा। तैङर्वाङिन ङा ङेनकाङ्मोः र्वाचे, परमेस्वरजै अन लुङवलम अब्राहामन भिह्तु सन्तान दोङ तैनान,#यूह ८:३३ 10चोँई तङ्पुन पादा वा ताह्तपा ङ्याह्। अन्नकारन फल लः मछ्यानान्न तङ्पु पुरू थुम्नान, रे मेह्ग पन्नान।” 11“ङा ता ङेनकाङ्मोः घ्योप्पान भिह्तु त्युई बप्तिस्मा बिन्नान, जेङ्नै ङन ङिक स्वानान ङन खेरे हेँ सक्तिसाली ङिह्पा, सुन ङा पौला हुर्चेन सम स्योरस्योरलैम मीपा। नुई ङेनकाङ्मोः पबित्र आत्मा रे मेह्ई बप्तिस्मा बिन्नान ङ्याह्। 12नुन ताम्नान्न फरा नुनै लाह्ग ङ्याह्, रे नुई जेँन ह्वाः पुरू खामसाङ्म दोङ्नान ङ्याह्, रे जेँन रुन्जन स्योह्बुङग रूनान ङ्याह्, जेङ्नै क्रुपव चन मसिनान्न मेह्ग कोःनान ङ्याह्।”
येसुन बप्तिस्मा
(मर्क १:९-११; लुक ३:२१-२२)
13मन्न भेला येसु गालीललै यूहन्नान स्याह् नुन लम बप्तिस्मा वम्मः यर्दन चाङ्पू स्वाबो। 14जेङ्नै यूहन्नाई झाःम र्वार्वा नू काःचे फाप्पो, “बरु ङाः पो नानलम बप्तिस्मा मवखाईमे ङिह्पा, रे तै ना ङन स्याह् स्वाचेऊ?” 15जेङ्नै येसुई नू र्वाबो, “चोँ झामै राफाना। तैङर्वाङिन झामखेखेई ङी परमेस्वरन इच्छ्यान धोन पुरू पुरा खेत्वानान।” 16आलै येसु बप्तिस्मा वव्वै तुरुन्तै त्युलै ङ्याह् गेप्पो, आलै स्वर्ग पोङ्बो, रे नुई परमेस्वरन आत्माः पुरेन लैम धुलयङ खेपा रे जेँन लाह्ः स्वायङ खेपा रङ्बो। 17तब स्वर्गलै अन केह्ः स्वाबो, “अन ङन स्याङ्पान ङोह्जो जेङ्पा, नुन ङ्याबो ङा मिह्दा स्याङ्पा ङिह्पा।”
നിലവിൽ തിരഞ്ഞെടുത്തിരിക്കുന്നു:
मत्ती 3: NTKST25
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The New Testament Books in Kaike Language © The Word for the World International and Kaike Translation Project, Nepal, 2025
