मत्ती 14
14
बप्तिस्मा बिन्नान्न यूहन्ना सिह्प्पा
(मर्क ६:१४-२९; लुक ९:७-९)
1मन्न भेला गालील प्रदेसग राज्य खेनान्न हेरोदजै येसुन भारेः ताह्बो। 2हेरोदजै जेँन राङ्पाकाङ्मोः र्वाबो, “अन सिमि तेम्माई बप्तिस्मा बिन्नान्न यूहन्ना जेङ्पा। नु सिह्पालै सम्पु ग्युर्दँ। अन्नकारन झाम ताईलुवान धोनव खे तैङ।”
3तैङर्वाङिन हेरोदजै यूहन्नाः झ्यालखानाः कह्पा ङ्याह्। हेरोदजै हेरोदियासन कारन यूहन्नाः साँगलजै खीखी झ्यालखानाः कपा ङ्याह्। हेरोदियास, हेरोदन धाज्यु फिलिपन मीसा ङ्याह्। 4झाम र्वापा ङ्याह्, “ना हेरोदजै झाङ्ग मिसा दोङ्दोङ् नान्चे कानुन अन्सार लः मराह्नान अन्नकारन यूहन्नाः जुङ्पा ङ्याह्।”#लेवी १८:१६; २०:२१ 5झाम र्वापा राह्राह् हेरोदजै नू सच्चे यङ फाप्पा ङ्याह्। जेङ्नै नु सिमिवलम ङिह्म्बो तैङर्वाङिन ख्युई यूहन्नाः भबिस्यबक्ता जेङ्पा र्वार्वा ङ्याङ्ङ। 6हेरोद केह्पान स्याङ्चेन लाह्ः, हेरोदियासन चमेःजै ख्युकाङ्मोः छ्याम्छ्याम् थम्बो। हेरोद मिह्दा स्याङ्बो। 7आलै हेरोदजै मन चिमिचाः झाम र्वाबो, “नाः तैस्याङ त्वानै तोला ङा बिनच्योवा र्वार्वा रेनरुबो।” 8चमेःजै तै तोल्चे र्वार्वा माः लोत्तौ नुई माई लम्पा लैम खेखे झाम र्वाबो, “बप्तिस्मा बिन्नान्न यूहन्नान थोप्पा ङाः तेर्मादीग क।” 9तब झली हेरोद मिह्दा बैरा जाःबो। जेङ्नै रेनरुपा रे दम्फुवन कारन नुई जेँन चमेःग त्वापान ल्होई सच्चेन आदेस बिम्बो। 10अन्नकारन नुई कान सिमिकाङ्मोः फेप्पे झ्यालखानाः थेप्पान यूहन्नान थोप्पा थुमफाम्बो। 11ख्युई यूहन्नान थोप्पा तेर्मादीग सप्पो रे मन चिमिचाः बिम्बो। नुई यूहन्नान थोप्पा जेँन मा हेरोदियासन स्याह् वप्पो। 12यूहन्नान चेलाव स्वाबो रे नुन कुह्म वव्वै लुह्म्बो। आलै ख्यु येसुन स्याह् होई रे अन घतना पुरूव स्याप्पो।
येसुई हजार ङा सिमिकाङ्मोः ख्वापा
(मर्क ६:३०-४४; लुक ९:१०-१७; यूह ६:१-१४)
13जब येसुई यूहन्नाः अन ल्होईव ताह्बो, नु दोङादीग चपचप तये सुनसान ठाउँग होई। जब सिमिवजै येसु वैतपान ल्होई क्युई रह्पा। ख्युई जेँन सहरलै लेनलेन येसुन ङिक जाःबो। 14जब येसु दोङालै धुल्बो, स्याह् नुई सिमिवन मोङ रङ्बो। नुई ख्युकाङ्मोः मिह्दा दिसाबो, आलै ख्युन बर्ग खङ्नानकाङ्मोः ताःफाम्बो। 15मन्नै ङ्याजे चेलाव येसुन रह्म्म ताप्ताप् र्वामः जाःबो, “स्यीह् सिमि सुई मछ्यूँ। अन सिमिकाङ्मोः फेरा ताकि ख्युवा वैवै जेँन भिह्तु झायाप र्युह्र्युह् झाःयो।” 16येसुई र्वाबो, “सिमिव स्यीह्लै नवयाःयो बरु ङेनजै र्वार्वा ख्युकाङ्मोः तयाः झाफाना।” 17चेलावजै र्वाबो, “जेङ्नै ङिन ङ्याबो रोता ङा थाम रे ङाह् ङेह् थाम मात्र ङ्याह्।”
18येसुई र्वाबो, “मन रोता रे ङाह्व स्यीह् सह्रा।” 19मन्न छाम्म येसुई पुरू सिमिकाङ्मोः क्वाः छ्युङ्फाम्बो। नुई रोता ङा थाम रे ङाह् ङेह् थाम वप्पो। नुई स्वर्गक्याँ सेनसेन परमेस्वरग असिका तोल्बो। मन्न छाम्म नुई रोताव क्युक्क्युई चेलाकाङ्मोः मन रोता बिम्बो, आलै चेलावजै चन रोता सिमिवन घूँ परेःबो। 20पुरूजै बरङ्बरङ् झबो। चेलावजै लाःमा रह्पा तुकराव रूरू थाम च्योङेग काङ्बो। 21स्याह् चिमिचाव रे वैचाव नङ्म झानान क्वाई माल्ला हजार ङातौ सिमिव ङ्याह्।
येसु त्युन लाह्ः लेम्पा
(मर्क ६:४५-५२; यूह ६:१६-२१)
22अन्न छाम्म तुरुन्त येसुई चेलाकाङ्मोः दोङाः चपचप योह्न धिक्याँ जेँ खेरे ङू वैफाम्बो। नु जेँ चन सिमिकाङ्मोः भिदा खेमः छ्युङ्बो। 23सिमिकाङ्मोः भिदा खेतामी, येसु तितिमाई सोअताप्चेन भिह्तु धुरग लिह्प्पो। नम्जी रुप्न बेर नु तितिमाई स्याह् छ्युङ्बो। 24मन्तौन बेर दोङा नाःलैः ग्याङ्म तापतपा ङ्याह्। जेङ्नै ङूलै लन च्याङच्याङ छ्योलापजै दोङाः धेँवछोँ कुल्पा राह्राह् चेलाव ङू वै मतैबो। 25नाह्प तिन बजेलै छ बजेन घूँराः, येसु त्युन लाह्ः लेनलेन चेलावन स्याह् स्वाबो। 26नू त्यू लेनलेन स्वायङ खेपा रङ्रङ चेलाकाङ्मोः मु जेअँ र्वार्वा ङिनङिन फाईरा खेमः जाःबो। 27आलै तुरुन्तै येसुई र्वाबो, “नङिना, ङा जेङ्पा, हिम्मत ख्या।” 28पत्रुसजै र्वाबो, “प्रभु, यदि तेम्माई ना जेङ्न, ङाः त्युन लाह्ः लेनलेन नान रह्म्म स्वा र्वा।” 29येसुई र्वाबो, “स्वा न।” पत्रुस दोङालै धुलधुल त्युन लाह्ः ल्हेनैल्हेनै येसुन रह्म्म वैमः जाःबो। 30जेङ्नै हुर्याःपा च्याङ्पा रङरङ नु ङिह्म्बो। त्युन लाह्ः झाछ्योँवाग नु नुप्मः जाःबो रे आत्ती राह्राह् “बचाई ख्या प्रभु!” र्वाईर्वाई फाईरा खेबो। 31येसुई नू हतपत जुङजुङ् र्वाबो, “ए ङाईदिन बिस्वासी, नाई तैङ सङ्का खेपा?” 32मन ङेह्पा दोङाः चप्पो रे हुर्याःपा छ्याःबो। 33दोङाः ङिह्पान चेलावजै येसू छ्याःफुलैफुलै र्वामः जाःबो, “तेम्माई ना परमेस्वरन ङोह्जो जेङ्पा।”
येसुई गनेसरेतग खङ्नानकाङ्मोः ताःफाम्पा
(मर्क ६:५३-५६)
34येसु चेलावन ङ्याबोई योह् गार्गार गनेसरेत मिह्न्न ठाउँदीग ताप्पो। 35स्याह्न सिमिवजै येसुई जेअँ र्वार्वा नू स्योःबो। मन्नकारन ख्युई धेँवछोँःन नाम पुरून खङ्नानकाङ्मोः येसुन स्याह् साप्पो। 36ख्युई नुन घोलाङ्न नादी रानै ज्यार्चे धेराःयो र्वार्वा नू छ्याःफुल्बो, रे हातिपाई ज्यार्बो ख्यु ताःबो।
നിലവിൽ തിരഞ്ഞെടുത്തിരിക്കുന്നു:
मत्ती 14: NTKST25
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The New Testament Books in Kaike Language © The Word for the World International and Kaike Translation Project, Nepal, 2025
