Matiós 13
13
Nsab siá Niguili
(Mál 4.1; Lúk 8.4)
1Uguá buɔ́sɛ ubugányɛ, Yésuse uwahám uguá giansɛ uwenedugúmín uguá buáyɛ buá máŋ. 2Biandá biá biíŋ ibíákilɛn yɔ́, uwayumɛn uguá ŋŋumba uwedugumin, giíŋ gidigid igíɔ́lɔbɛn uguá ŋŋɛnd.
Ebuhi
(Mál 4.2-9; Lúk 8.5-8)
3Yésuse uwɛɛ́d gá guɔyɔn bɔ́ giod giá muand uguá nsab, wɔyɔn bɔ́ áneé: «Ndénu ebuhi omodi umahám gá buhe. 4Hana úmebuhé, nsám símodi isíáguan uguá buáyɛ buá ŋŋil, munonyi muá gumɔn umúónoól umúányá siɛ́ wɔ́s. 5Símodi isíáguan uguá adányɛ, agá hɔɔ́m ɔhɔɔ́ magayɔ mámadíbá bubímbíl, isíébumug gunsáns hana magayɔ mámadíbá bubímbíl. 6Ɔhɛ́nyɛ húmaágányɛ gá lúnsan, isíédúmbie gugáŋɔ́ɔg isíond isíágɔ́d gá kanda iŋaŋ. 7Nsám símodi isíáguɛn uguá isósi, isósi isíáguman isíéhúgígen siɛ́. 8Símodi isíáguɛn agá ginɔ́g giá guísi isíéhúme bibɔg, iyɛ edín átánɔ, igányɛ edín ádádɔ, iné nitín na síad. 9Ugódionu idú siá guɔ́b wɔɔ́b!»
Gá Giagɛ Yésuse úgálgalaá uguá nsab
(Mál 4.10-12; Lúk 10.9-10)
10Bebinene bá Yésuse abákilɛn yɔ́ obóhún yɔ́ áneé: «Gá giagɛ ágálgalaá gɔ́b uguá nsab?» 11Uwondinye bɔ́ áneé: «Gá giagiá bámanúhuá, banuá, nulinsa nuá biseyi biá Niguili niá gumɔn gɔgaá, bámuanyɛ bámasádáŋáab nuɔ́. 12Gá giagiá, ugódionu bɔ́nɔ́híginɛn yɔ́, agányɛ wandabia gudɔ́mb gɔgaá, mɔndɔ udiógódionu, ta ubuɔ́ úgódionu, bɔ́nɔ́gɔ́l. 13Buand buáguɔ́ ŋŋálgalaá gɔ́b uguá nsab: gá giagiá bábíyigan kandaguán bónd bɔ́bídɔ́lígɔn kɔndɔguɔ́b. 14Búnyɛ gá gueleé dugálɔ duá ebunebúné Esayí uduɔ́ úmɔya áneé:
“Numɔbídɔ́lígɔ́nɔ́n beseé na beseé gɔgaá, numɔsúguɔ́bɔn,
Numabíyígán beseé na beseé gɔgaá, numasúguánan” dúbíhónye.
15Gá giagiá, ɔdɛ́m huá buán ubuɔ húálálímɛ́n,
búébígímbe idú,
ubúébíhúg eŋís gá gueleé búdiandúguánan,
ubúébígímbe idú gá gueleé búdiɔndúguɔ́bɔn,
ubúélúndie idɛ́m siɔ́b gá gueleé búdinúgie bilɔŋ. Késie mmoóndúgíe buɔ́!
16Gɔgaá, nunyɛ beseé, nugódi eŋís ya guánan na idú siá guɔ́bɔn. 17Hómohómue, yɔɔ́núɔyɔn, na giod giá bebunebúné na giod giá bandɔ bá gindényé bámambá guánan ubuɔ́ nuánanaá gɔgaá, bámasúguán, bámambá guɔ́b ubuɔ́ nuɔ́bɔ́naá gɔgaá, bɔ́mɔsúguɔ́b.
Gisaluna giá nsab ya ebuhi
(Mál 4.13-20; Lúk 8.11-15)
18Ánaá núbídɔ́lígɛn gɔg buand ubuɔ́ nsab ya ebuhi yámbanɔ́ guɔyɛd. 19Mɔndɔ úmɔ́bídɔ́lígɛn nugálɔ nuá Niguili niá gumɔn wond udiɔ́b nuɔ́, tábɔ́ áneé mɔndɔ wa mamb usoól umɔ́sihɔg ubuɔ́ bámagɔ́n egég gá ɔdɛ́m, unyɛ hana nsám iyɛɛ́ básánɛm uguá buáyɛ buá ŋŋil. 20Nsám isíságuɛn uguá adányɛ búnyɛ mɔndɔ usɔ́guɔ́b nugálɔ ugíndígɛn nuɔ́ hɔ́nɔhɔ́ na ibal, 21gɔgaá Nugálɔ unugányɛ núdilua iŋaŋ, mɔndɔ ugányɛ waáguádáaban gá maná ginɛŋ, bégégényigényé yɔ́ gɔg gá Nugálɔ unugányɛ, guádáab guég gugua. 22Nsám isímaguɛn uguá isósi, búnyɛ mɔndɔ uwɔɔ́bɔnaá Nugálɔ gɔgaá, mesígíl na guágan ɔdɛ́m gá bunɛ́m buá guísi múhúgígen Nugálɔ, núdihúm bibɔg. 23Nsám isímaguɛn uguá ginɔ́g giá guísi, búnyɛ mɔndɔ ubídɔ́lígɔnɔnaá Nugálɔ wond wɔɔ́bɔn, waásamban bibɔg, bibɔg bíond bíhúme, igínya ana edín átánɔ, gímodi edín ádádɔ, gídodi nitín na síad.»
Nsab ya gilɔg giá bugíde
24Yésuse uwandahuá bɔ́ nsab iyɛ áneé: «Niguili niá gumɔn nínyɛ hana buónyi buá mɔndɔ umeébúhé ginɔ́g giá mbuh uguég guá mesíge. 25Uguá ginɛŋ igiɛ́ bandɔ bábídímanaá, abɛlɛ́bɛl uwonoól ginsunyéginsunyé, wesibuh gilɔg giá bugíde agá ɔdɛ́m na ɔdɛ́m huá mesíge má beleé, udɔ́mb. 26Uguá ginɛŋ igiɛ́ bunimɛ́d búmahám ubúɛ́d gá húme dubab, gilɔg giá bugíde igíébídíye súsɔ́n. 27Belibuóli bá mɔndɔ wa giansɛ ɔbɔ́siɔyídɛ́n yɔ́ áneé: “Ɔgúnɔ́gɔ́n, búdibá ginɔ́g giá bunimɛ́d émebuhé uguáhɔ guá mesíge a? Hanyɛ agaá gilɔg giá bugíde gíólín?” 28Uwɔyidɛn bɔ́ áneé: “Búnyɛ abɛlɛ́bɛl úwaásíal buɔ́.” Belibuóli ɔbɔ́yidɛn yɔ́ áneé: “Aáguamba áneé dianabálá a?” 29Uwɔyidɛn bɔ́ áneé: “Ɛ́ɛɛ́, gá giagiá umedíne áneé bágagábálá gilɔg giá bugíde, bágábála beleé súsɔ́n. 30Ánaá núnihɛn múmuanyɛ mum múguman ɔlɔŋ gueneg uguá buɔ́sɛ buá guoge, uguá buɔ́sɛ buáguɔ́ yɔnɔ́yidɛn bandɔ obónógonú áneé: ánaá núágagubála gilɔg giá bugíde, nugúda giɛ uguá mpáŋ gá begesie, gá belée ánaá núóge yɔ́ nugíŋe yɔ́ agámɛ gá nunsas.”»
Nsab ya bunimɛ́d ubuɔ́ bɔ́dɔ́ŋɔnaá áneé mutáld
(Mál 4.30-32; Lúk 13.18-19)
31Yésuse uwendedúmín bɔ́ nsab iyɛ áneé: «Niguili niá gumɔn nínyɛ mpónyé na nsám ya bunimɛ́d ubuɔ́ bɔ́dɔ́ŋɔnaá áneé mutáld, iyɛɛ́ mɔndɔ úmagɔ́n uguég guá mesíge. 32Nsám igányɛ, uguá bunyɛ manimɛ́d ínyaá bunimɛ́d buá bugídígíd gɔgaá, uguá ginɛŋ igiɛ́ ísáhám, ínyaá giandá giá bunimɛ́d uguá bunyɛ manimɛ́d gidigid: buáyɛ budɛ́ ubuɔ́ munonyi muá gumɔn múólásihágá bigad biɔ́b uguá dúgasia.»
Nsab ya buanyɛ buá guóbonye oguŋ
(Lúk 13.20-21)
33Yésuse uwɔnduguɔyidɛn bɔ́ nsab iyɛ áneé: «Niguili niá gumɔn nínyɛ hana buanyɛ buá guóbonye oguŋ ubuɔ́ ugándɔ úgɔ́lɔnáa, waág mpigɛ́n ídádɔ gá gueleé oguŋ uhugányɛ húóbíd gidigid.»
Gá giagɛ Yésuse úgálgalaá uguá nsab
(Mál 4.33-34)
34Yésuse umabá wɔyɔn giíŋ buand gidigid uguá nsab, umasábá wɔyɔn giɛ́ buand kanda nsab. 35Gá gueleé áneé ubuɔ́ ebunebúné úmɔyɛ́d áneé: «Yenébun niíd gá guɔyɔn nsab, yenésesenye muand umúnya feké uguá ninamba guenebul agá guaŋan guá guísi» búbíhónye.
Gusalɔn guá nsab ya gilɔg giá megíde
36Yésuse umoómólígie agá hɔɔ́m ɔhɔɔ́ bandɔ bámabá uwɛɛ́d agá nihiá, bebinene bég abákilɛn yɔ́, ɔbɔ́yidɛn yɔ́ áneé: «Dísálúnɛ́n nsab ya gilɔg giá megíde uguá mesíge.» 37Uwɔyidɛn bɔ́ áneé: «Mɔndɔ ubuhenú ginɔ́g giá nsám, búnyɛ Muɔ́n wa mɔndɔ, 38mesíge mámányá guísi, ginɔ́g giá bunimɛ́d gígínya bandɔ bá Niguili, gilɔg giá megíde gígínya bandɔ bá Mamb, 39mɔndɔ umaágɔ́n giɛ́ únyaá abɛlɛ́bɛl, nsúgie ya guísi íyanábánɔ́ guoge, bilúna bíbíánábánɔ́ bandɔ obónógonú. 40Hana mɔndɔ úbálanɔ́ gilɔg giá megíde gá dúm agá yoógi, nɔ́ búánábánɔ́ gá bandɔ uguá buɔ́sɛ buá nsúgie. 41Muɔ́n wa mɔndɔ wanádɔ́m bilúna biég gá dide bandɔ gidigid, ebéméfúményé bɔsɔ́gá naá abámalá bidabal gá hémie bɔ́ uguá Niguili, 42bíɔ́nɔ́nɔh bɔ́ uguá ɔmbɛ́l huá yoógi, hɔ́ na oŋónyi na bíbanda bigeléd múánábánɔ. 43Bandɔ gɔg bá gindényé bánábunya hana ɔhɛ́nyɛ uguá Niguili niá Síe wɔb. Ugódionu idú siá guɔ́b, wɔɔ́b!»
Nsab ya nukólókóŋ na gimenyimin giá nidányɛ
44«Niguili niá gumɔn nínyɛ hana nukólókóŋ unuɔ́ mɔndɔ úmanaán uguá mesíge ununambánɔ uwond gá namb nuɔ́, na ibal ihiɛ́ úmabianán uwɛɛ́d, uwedué buá gidigid ubuɔ́ úmabianán gá guɔ́nd mesíge amagányɛ. 45Niguili niá gumɔn nínyɛ anda mpónyé na eduísi muand umaámbá bimenyimin biá adányɛ. 46Umaámáan gimenyimin giá nidányɛ igíɔ́ŋunɔnɔ́ giod, uwɛɛ́d uwedué buá gidigid ubuɔ́ úmabianán uwɔɔ́nd giɛ́.»
Nsab ya buoli
47«Niguili niá gumɔn nínyɛ anda mpónyé na buoli ubuɔ́ mɔndɔ únɔhɔnaá uguá máŋ, búgánahám búganyɛ na bunyɛ muɔb gidigid. 48Búmóhón, bológi báyɔn buɔ́, bɔ́gɔ́gɛ́ɛd buɔ́ uguá ŋŋɛnd, béye buá beseé bágan uguá nsad, buá gilɔg bóomb. 49Nɔ́ búánábánɔ́ agá man guá guísi, bilúna bíónoól bídándúna bandɔ bá gindényé na bafal. 50Bilúna, bíɔ́nɔ́nɔh bafal agá gigɔlɔ́gɔd giá yoógi agá hɔɔ́m ɔhɔɔ́ na oŋónyi na bíbanda bigeléd múánábánɔ.»
Gigɔ́dɔgihule
51Yésuse uwoóhún bebinene bég áneé: «Numɔ́b muand umugányɛ a?» Obóndinye áneé: «Ɛɛ́ɛ» 52Uwɔyidɛn bɔ́ áneé: «Elinsibigodi gidigid úmáhɔ́nhɔn muand muá Niguili niá gumɔn, unyɛ hana ɔgúnɔ́gɔ́n wa giansɛ ugɔ́lɔnaá muand muá nsuá naá umugɔ́sɛ uguég guá nukólókóŋ.»
Bandɔ bá Nasalɛ́d bémébíbísídíe Yésuse
(Mál 6.1-6; Lúk 4.16-24)
53Henyé, Yésuse umaámáman guhuínyihuínye nsab isigányɛ, uwadigɛn gá guɛ́d. 54Uwond uguég guá gidɔŋ giá mbíénye, uwɛɛ́d gá huínyihuinye bandɔ uguá bigúl ubúádɔ́mb bɔ́ bugaga, abɛ́d gá guɔya áneé: «Hanyɛ agaá bunugedie buáguɔ́ na bubiseyi buáguɔ́ múólonineé yɔ́? 55Búdibá uhaŋ wa ehégibiansɛ egéné a? Noódíe wég udibá ɔhɛ́n áneé Malía? Na Sák na Yɔ́sɛba na Símune na Yúd bádibá beliméen a? 56Beliméen abagándɔ bádibá bámuanyɛ gidigid uguásɔ uguɔ a? Hanyɛ agaá muand umugányɛ gidigid múólonineé yɔ́?» 57Ubúal áneé bɔ́digɔ́l Yésuse uguá udényi. Uwɔyidɛn bɔ́ áneé: «Ebunebúné udiégúme uguég guá gidɔŋ ta uguég guá giansɛ.» 58Hana bámasádiádáaban yɔ́ umasúgual giod giá biseyi hɔ́.
നിലവിൽ തിരഞ്ഞെടുത്തിരിക്കുന്നു:
Matiós 13: EKM
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
