oMatiyu 23
23
Oyesu yo otu ka awofono kpa Awofarisi yi tese
(oMak 12.38-39; oLuka 11.43,46; 20.45-47)
1Oyesu ka de ewa ka asuse kpa awogboso mo, 2<<Awofono kpa Awofarisi pini Omusa dawa oshu ko fono la. 3Mani oni owo otiri shini ala yo oza ni aba fu ni kpo oza ni aba ka dala ni. Ala ke ka ko oza ni aba ya ni lo koni aba yo oko kpo oza ni aba fu ni lo. 4Aba gbi iyo ni lenu ko nga ni ya sa ase akya, awa ke ba ta ase abo ko ze lo.
5Kpiri ko oza ni aba ya ni wa ki iyi ka asuse. Aba yawu kpo okpa ni atela ko Owuso anu ni gbo ogo kpa akya wa. Ayo ogwa wirikpo gbo oshiye wa.#23.5 Aba ya mani shini ase na gye mo awa ba geyagye do Owuso 6Ayimu ko bagye oka ka anyakwase ebe ki imya kpo ekpa. 7Aba yimu shini ase na tuwo ogbogba ishini aba yawu ipu ki ipishi, ana ki yuwogwu mo, <Inofoza.>
8Ala ke, ashishe naka ya ala gwu mo <Inofoza lo,> Koni inofoza wo oye la, kweyi kpiri kala wa ayine la. 9Ala ka yashe ogwu mo <Ada,> Ese mani lo, koni Owuso kin pini wa Ada kala iso la. 10Kwe ashe na ya ala ogwu mo <Inofoza> lo, koni ala gbi inofoza oye la, Okristi. 11Ase ni wa anyakwase ipu kala kpiri ya meshe da ala. 12Koni ase ni ya ngi ikweyi iso kpiri, aba zo wo ojije lo. Ase ni ke ziyi nu wo ojije lo, aba zo wa anyakwase.
Akpaha Pyopyi Ikweyi ka awoyoziyi
(oMak 12.40; oLuka 11.39-42,44,52; 20.47)
13<<Igbe na tala awofono kpa Awofarisi. Ala awoyoziyi! Ala yofunu ko Obula ki Iso yi gwu, kweyi ala ba gege ba gipu nu lo, kweyi ala shase shishini bita na ganu lo. 14Igbe na ta ala awofono kpa Awofarisi, awoyoziyi! Ala yi iyo ka anyokwu yi re, kweyi ala ba tinarigwu gbeji shini ase na ma ala. Ikweyi koni, ala ba mo owe ko otata.
15<<Oya labi moji ya dala awofono kpa Awofarisi, ala awoyoziyi! Koni ala sheyi ki ishu go okpagye oye lenu shini ala pya ashe wa shagbotu. Ishini owa, ala yo gbotu labi sha aka kala ko yo go ola!
16<<Igbe na tala, ala awofiyi ni ba pya ase abo ni! Koni ala kamo owo ojije lo ko, <Gwene kpo Ole ko Owuso, ase ni ke gwene kpo ozinariya ko Ole ko Owuso, owo otiri shini na yo oza ni ogwene kpa anu ni.> 17Ala awofiyi ki ikyo! Onya wo neneshi; ozinariya, kwe Ole ko Owuso ni yo ozinariya wo neshi ni? 18Ala ki kamo, <Owoni ase ni gwene kpo okpe ko Ole ko Owuso, owo ojije lo; owoni ase ni ke gwene kpe eshi ni yikweyi ko okpe ko Ole ko Owuso ni na yo oza ni ogwene kpa anu ni. 19Ala awofiyi! Onya wo neneshi! Eshi ni yikweyi ko okpe ko Ole ko Owuso ni la kwe okpe ko Ole ko Owuso ni ye eshi wo oza neshi la? 20Mani oni, ase ni gwene kpo okpe ko Ole ko Owuso, ogwene kpo oza ni yikweyi nu ni kpiri pini yoma; 21kweyi ase ni ogwene kpo Ole ko Owuso, ogwene kpo Owuso ni yipu nu ni oma; 22kweyi ase ni ogwene kpi iso, ogwene kpe ebe ko Owuso kpo Owuso ni ya yagye ikweyi nuni.
23<<Igbe na tala, awofono kpa Awofarisi, ala awoyoziyi! Ala ba zo oye ipu ki igwo, bwipu ki inyeba kpi ikpako, ala ke pyitikpi to oza ni wo nyakwu ipu ko ono ni, byo okwokwoshi, iyinyinyi kpo otusose. Ala ya awo oza mani kpiri kweyi ka sha kikyikyo bita lo. 24Ala awofiyi ni ba pyase abo ni! Ala ba ngmi iyu ni yipu ki inyi ni, ala ke ba yo onyakwimi yi me!
25<<Igbe na tala, awofono kpa Awofarisi, awoyoziyi! Ala ba yi itikpi ka abwa kpo ogo yina neneshi, ipu nu ke mwu kpo ozabibi kpi imu ki iyi kala. 26Ala awofiyi ka Awofarisi! Ala yipu ka abwa kpo ogo yina ime shini ese nu na lema neneshi.
27<<Igbe na tala, awofono kpa Awofarisi. Awoyoziyi! Ala lema bya amiri ni anyi iyawu nehe ni shoshi koma ese, ipu nu ke hirinyi kpo okpokwu kawase ni gekwu ni. 28Mamani ase ba ma ala bya ala wa ase neshi, ipu ko otu kala ke mwu kpo yoziyi kpo otu bibi.
Oyesu Kedo ko Owe ni Aba Mani
(oLuka 11.47-51)
29<<Igbe na tala, awofono kpa Awofarisi, awoyoziyi! Ala ma amiri ka awinobane, ki gwa amiri kawase neshi agya kyarigada. 30Ala kamo, <Owoni aha bi baba ishi ka awokyikyi ka aha, aha biba tuwabo ko ngma awinobane lo.> 31Bwebe ko omani, oya shiya ase kamo ala wa ayikayi kawase ni ngma awinobane ni oma. 32Ala yo shishini ko oko ni awokyikyi kala yani yiya! 33Ala egwa! Ayi ki ifufule igboji! Ala baya moji ome ni ala ba bose shipu kepwo kole ko ola? 34Mani oni, nyya to oleho ka awinobane kpa awofoza kpa awinoziyi. Ala ba ya ase shishini wa yi ngmo, ala ba ya ase shishini wa yi poshi sepa, ala ki ba ya ase shishini wa aboshi ipu ke ekpa, ala ki ba na ase shishini wa enya bwo ogya bwo ogya. 35Ikweyi koni oyi kawase neshi ni ala ngmo ese mani yikweyi kala, bwi ikweyi kase neshi Abila gi ikweyi ko Ozakariya oyi ko Oberikiya ni ala yi ngmo obepa ko Ole ko Owuso kpo okpe ko shokoyi ni. 36Nyya ka dala okwokwoshi, kpiri ko oza mani ya gbodagye kpase ki ishi mani.
Oyesu byotu do Ojerusele
(oLuka 13.34-35)
37<<Aye, Ojerusele, Ojerusele, ala ni ngma awinobane ki ta awoleho ko Owuso akyo! Igbe ma ni nyya yimu ko kpa ayi kala tukpa byoni ogwu ya kpa ayi nu ya leba akya nuni, ala ke tela ko ya mani. 38Ala ma byo onabani, asho ole kala bita gba ashishe lo. 39Nyya ka dala, ala ba mun kelo gbishini ala ba kamo, <Otunehe yo kpase ni wa ipu ki iye ka Adole!>>>
നിലവിൽ തിരഞ്ഞെടുത്തിരിക്കുന്നു:
oMatiyu 23: ALA
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
THE WORD FOR THE WORLD INTERNATIONAL, THE WORD FOR THE WORLD NIGERIA
