Enzimäine Moisein kirju 14
14
Avram voittau nelliä suarii
1Niih aigoih Sennaaran suari Amrafel, Ellasaran suari Arioh, Elaman suari Kedorlaomer da Gojiman suari Fidal 2lähtiettih toramatkah Sodoman suarii Berua, Gomorran suarii Biršua, Adman suarii Šinavua, Sevoiman suarii Šemeverua da Belan, nygözen Sigoran, suarii vastah, 3kuduat yhtes tuodih omat torajoukot Siddiman alangomuale, kus on nygöi Kuolluh meri. 4Kaksitostu vuottu hyö oldih Kedorlaomeran vallan al, kolmandeltostu vuvvel hyö nostih händy vastah. 5Nelländeltostu vuvvel tuli Kedorlaomer da hänenke hänen liittolazet suarit. Hyö voitettih refalazii Ašterof-Karnaimas, zuzeiloi Gamas, emeiloi Šave-Kirjafaimas, 6horeiloi mägimuas Seiras, kudai on El-Faranan rinnal, tyhjän muan reunas. 7Siepäi hyö kiännyttih En-Mišpatah, libo Kadesah, tyhjendettih kai amalikilazien mua, voitettih amoreiloi, kuduat elettih Hatsatson-Famaras.
8Sit Sodoman, Gomorran, Adman, Sevoiman da Belan suarit lähtiettih heidy vastah da Siddiman alangos mendih torah 9Elaman suarii Kedorlaomerua, Gojiman suarii Fidalua, Sennaaran suarii Amrafelua da Ellasaran suarii Ariohua vastah – viizi suarii nelliä vastah. 10No Siddiman alangomual oli äijy haudua, kudamis oli muan tervua. Sodoman da Gomorran suarit da heijän toramiehet opittih pajeta, hyö puututtih niih haudoih da tartuttih, hengih jiännyöt pajettih mägilöih. 11Heijän voittajat viettih mennes heijän karju dai kai elot, kai einehet. 12Viettih hyö i Avraman vellenpoijan Lotan da kai hänen elot. Lothäi silloi eli Sodomas.
13Yksi pagoh piässyzis tuli sanelemah täs jevreile Avramale, kudai silloi eli amorilazen Mamren pyhäs mečikös. Mamre oli Eškolan da Aneran velli, i hyö oldih sovus Avramanke. 14Konzu Avram tiijusti, gu hänen vellenpoigu Lot on plenas, häi keräi omii miehii, kolmesadua kaheksatostu hengie, kuduat kuuluttih hänen taloih roindua myö, da ajoi vihaniekkoi jälles Danassah. 15Häi da hänen miehet yöl hypättih heih kaikkielpäi, voitettih da ajettih heidy jälles Hovassah, kudai on Damaskas pohjazehpäi. 16Häi kiännytti kai vietyt elot, Lotua, hänen omahistu, sen elot, naizii dai toizii rahvahii.
Melhisedek hyväl sanal vastuau Avramua
17Konzu Avram oli tulemas järilleh voittahuu Kedorlaomeran da suariloi, kuduat oldih hänenke, Sodoman suari tuli hänele vastah Šaven alangomual, kuduadu sanotah vie Suarin alangomuakse. 18Melhisedek, Saliman suari, Ylimäzen Jumalan pappi, toi leibiä da viinua 19da vastai händy nengomil hyvil sanoil:
– Hyvitäkkäh Avramua Ylimäine Jumal,
muan dai taivahan Luadii!
20Ylendetty olgah Ylimäine Jumal,
gu andoi sinun vihaniekkoi sinun käzih!
Avram andoi Melhisedekale kymmenenden vuitin kaikes sualehes.
21Sodoman suari sanoi Avramale: «Anna minule minun rahvahii, a elot ota ičelles.» 22Avram vastai: «Minä nostan käin muan dai taivahan Luadijan Ylimäzen Ižändän Jumalan puoleh da annan sanan, gu 23en ota sinun elolois nimidä – ni langastu, ni kengänpaglua, gu et sanos: ‘Se minä luajiin Avraman bohatakse.’ 24Minule ei pie nimidä, vai se, mi meni minun käskyläzien einehih da mi kuuluu niile miehile, kuduat oldih minunke. Anna suajah oma vuitti Aner, Eškol da Mamre.»
നിലവിൽ തിരഞ്ഞെടുത്തിരിക്കുന്നു:
Enzimäine Moisein kirju 14: LIVVI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
(c) Biblienkiännändyinstituuttu, Helsinki 2003
