Matayo 25

Nsi̱mo ndia bhasika komi̱

1Yesu atodha nakigia bhiyo; “Ka bwile injo kusali̱a ndia gulu ada kibha bhia bhasika komi̱ ndibhabha ndia bhakabhu̱i̱bi̱mbe bhaluku ndibha bhaku̱mba tala ndiabho kaya takana ngoli mu̱lu̱ku̱aki. 2Bhetano kowabho bhabhi̱ bhadoma na ndibhetolo bhetano nibhali bhagezi̱. 3Bhadoma bhaku̱mba tala ndiabho makanga i̱ya na palafi̱ni̱ ndietolo ka cu̱pa. 4Bhagezi̱ nibhaki̱ku̱mba palafi̱ni̱ ndietolo ka cu̱pa nibhaki̱ya nai̱ na tala ndiabho. 5Ngoli mu̱lu̱ku̱aki ndia akelelelua, bhasika bhehe nibhakilala.

6“Ka saha nkaga ndia ki̱li̱ya, bhamuoka nkpa nakihabhaga bhiyo; ‘Ngoli mu̱lu̱ku̱aki mendi̱ye, bhu̱hu̱we bhuntakane.’

7“Du̱mbi̱ bhasika bhoponi nibhaki̱zu̱zu̱ka nibhakitaki̱sa tala ndiabho. 8Bhadoma nibhakibhugia bhagezi̱ bhiyo; ‘Bhu̱ki̱pesi̱ebe ka palafi̱ni̱ ndianu̱, tala ndiasu̱ ali kali̱mi̱kai̱.’

9“No bhasika bhagezi̱ ndibha bhakabhu̱i̱bi̱mbe bhaluku nibhaki̱bhu̱si̱ki̱aku̱ bhiyo; ‘Bba, bhi̱ki̱bhu̱pesi̱abe, kakikidhakia bhesu̱ poni, bhuai̱be bhu̱ye kindia bhasumbesi̱ si̱ bhusumbe ndianu̱.’ ”

10No nibhalia ki̱ya sumba palafi̱ni̱, ngoli mu̱lu̱ku̱aki naki̱ki̱dha. Bhasika ndibhabha nibhetekani̱zi̱ bhai̱ya na ngoli minjo ka bhu̱geni̱ toli̱ nibhakidhaka ki̱ku̱ku̱.

11“Bwile ndia akoliabe, bhasika bhetano bhadoma nibhaki̱bi̱ka nibhakigia bhiyo; ‘Sali̱a, Sali̱a, oki̱oku̱dhi̱li̱e ki̱ku̱ku̱.’

12“No ngoli mu̱lu̱ku̱aki naki̱bhu̱si̱ki̱aku̱ bhiyo; ‘Ka mazima nikibhutolia eti, ki̱bhu̱i̱bi.’ ”

13“Ti̱-no, bhwegendi̱e nanga bhu̱ku̱i̱bi̱ tolo kedha saha.”

Nsi̱mo ndia bhakoli̱ bhesalo

(Luka 19:11-27)

14Yesu nakitodha nakigia bhiyo; “Ka bwile injo kusali̱a ndia gulu ada kibha bhia muluku moti̱ mindia amamikana naki̱ya ka nsi ndietolo. Abhueka bhakoli̱ ndibhaki nakibhudhuelia kima ndiaki. 15Ampesi̱a muluku moti̱ talanta#25:15 talanta Abhi̱ mbangana ndia mpaghasi̱ abhi̱ kikoliaga dhakia mwaka maku̱mi̱ abili. tano, naki̱mpesi̱a mindietolo talanta bhali na mindietolo talanta moti̱, nkpa poni ampesi̱a yeli̱a ka mani̱ ndiaki, du̱mbi̱ naki̱ya ka gendo ndiaki. 16Muluku mindia bhampesi̱a talanta tano ai̱ya yau̱ naki̱su̱bu̱li̱sa mbangana ndiaki nakibhuaku̱ talanta ndietolo tano sa mbangana. 17Muluku mindia bhampesi̱a talanta bhali naye naki̱su̱bu̱li̱sa talanta injo nakibhuaku̱ talanta ndietolo bhali. 18No muluku mindia bhampesi̱a talanta moti̱ ai̱ya nakitunga ki̱na nakisomia kau̱ mbangana ndia nkumaki.”

19“Bwile mamadha nalakoli̱be, nkuma bhakoli̱ bhenjo asi̱ki̱a du̱mbi̱ nakibhuolu̱li̱a ndia bhakoli̱si̱ mbangana injo. 20Muluku mindia bhampesi̱a talanta tano sa mbangana naki̱bi̱ki̱sa kikapa tano ndietolo nakigia bhiyo; ‘Nkumami, oni̱pesi̱a talanta tano sa mbangana, ozi̱be ni̱bhoi̱ku̱ ndietolo tano.’

21“Nkumaki naki̱nsi̱ki̱aku̱ bhiyo; ‘Webale si̱ni̱ nkoli̱ mabhonga toli̱ mindie nimwesi̱gi̱o. Obhi̱ ntua mazima ka kima nke, ni̱ku̱ku̱pesi̱a kima ndiamo mamadha obhundilie, obi̱ke kidhedheluwe imamoti̱.’

22“Muluku mindia bhampesi̱a talanta bhali naye naki̱bi̱ka nakigia bhiyo; ‘Nkumami, oni̱pesi̱a talanta bhali sa mbangana, no ozi̱be, ni̱bhoi̱ku̱ ndietolo bhali.’

23“Nkumaki naki̱nsi̱ki̱aku̱ bhiyo; ‘Webale si̱ni̱ nkoli̱ mabhonga toli̱ mindie nimwesi̱gi̱o. Obhi̱ ntua mazima ka kima nke, ni̱ku̱ku̱pesi̱a kima ndiamo mamadha obhundilie, obi̱ke kidhedheluwe imamoti̱.’

24“Du̱mbi̱ muluku mindia bhampesi̱a talanta moti̱ sa mbangana naki̱bi̱ka nakigia bhiyo; ‘Nkumami ni̱hi̱bi̱ nesi̱ oli muluku mindia ati̱gi̱kani̱o nanga okuhululaga kindio kogu̱bi̱ otodha ohulula ndio komi̱si̱. 25Toli̱ nitiya bhu̱li̱sa talanta ndiako du̱mbi̱ ninikisomia ka ki̱na. Ozi̱be mbangana ndiako mendu̱ ni̱si̱ki̱si̱a.’ ”

26“Nkumaki naki̱nsi̱ki̱aku bhiyo; ‘Uwe nkoli̱ mazinana toli̱ ngalai̱, obha noi̱bi̱ nesi̱ nikihululaga kindie ki̱gu̱bananagi̱ nitodha nihulula kindie ki̱mi̱si̱. 27Du̱mbi̱ obhi̱ ku̱bi̱sa mbangana ndiamo ka bbanka, nanga bhabhi̱ ki̱ni̱bi̱si̱li̱abe maghobo ka bwile sa si̱ki̱ami.’ ”

28“Du̱mbi̱ nakilagilia bhiyo; ‘Bhumbuwebe talanta injo toli̱ bhumpesi̱e minjo mindia ali na talanta komi̱. 29Mindia alibe nai̱ bhada kintodhiabe toli̱ ada kimadhi̱sa, na mindia kalibe nai̱ na ndia ali nai̱ bhada kimbuwabe. 30Bhumumake nkoli̱ mindia kali na mugaso minjo kansenge ka ki̱li̱mi̱ki̱aga kindia akibha ngamu na kwebhabhu̱a ngaga.’ ”

Mi̱ki̱ mindia Nkpa kacuelia bhakpa bhoponi musango

31“Mi̱ki̱ mindia Nkpa kabi̱ka ka ngu̱ko ndiaki, na bhamalai̱ka bhoponi, aki̱li̱ka ka mbata ndiaki sa ngu̱ko. 32Nsi poni akiekumesa kei̱soaki, toli̱ akibhugabani̱za bhakpa bhia mu̱li̱si̱a nesi̱ akibhugabani̱za bhantama bhuwabho ka bhameme. 33Aki̱bhu̱bi̱sa bhantama ka kibhoko sa kuluku na bhameme ka kibhoko sa kulegu̱.”

34“Du̱mbi̱ Sali̱a akibhugia ndibhali ka kibhoko sa kuluku bhiyo; ‘Bhu̱bi̱ke, bhenu̱ ndibhali na nki̱sa tukai̱ kindia Aba, bhu̱i̱se mwandu ndianu̱ bhugodhe ka kusali̱a ndia bhabhu̱tekani̱zi̱li̱o tukilia ka hanga nsi; 35nanga inja abha nani̱gbei̱ no ni̱bhu̱ku̱ni̱pesi̱a li̱eli̱, nyota abha nani̱gbei̱ ni̱bhu̱ku̱ni̱pesi̱a li̱bho, bhubha ndio bhu̱ku̱ni̱hi̱bi̱ no nibhukunitangililia ka i̱nji̱ ndianu̱. 36Nibha ndie kili na ngoye malola, no ni̱bhu̱ku̱ni̱pesi̱a ngoye, nibha ninilwali̱ ni̱bhu̱ku̱bi̱ka zi̱bami toli̱ ninili ka nkomo no ni̱bhu̱ku̱bi̱ka zi̱bami.’

37“Du̱mbi̱ ndibha bhawelikani̱o nibhaki̱nsi̱ki̱aku̱ bhiyo; ‘Sali̱a, kikutangia dhi̱ inja naku̱gbei̱, ni̱ki̱ku̱ku̱pesi̱a li̱eli̱ kedha nyota naku̱gbei̱, ni̱ki̱ku̱ku̱pesi̱a li̱bho? 38Kibha ndie bhi̱ki̱ku̱i̱bi̱ dhi̱, nikikukutangililia ka i̱nji̱ ndiasu̱ kedha nokukabha ngoye malola ni̱ki̱ku̱ku̱pesi̱a ngoye? 39Kikutangia dhi̱ nolwali̱ kedha noli ka nkomo, ni̱ki̱ki̱bi̱ka zi̱bako?’

40“Sali̱a ada ki̱bhu̱si̱ki̱aku̱ bhiyo; ‘Ka mazima nikibhutolia eti, ndio bhukola ka moti̱ kowa bhanamami ndibha gwabhi̱mba, bhukola kami.’ ”

41“Du̱mbi̱ ada kibhugia bhenjo ndibhali ka kibhoko sa kulegu̱ bhiyo; ‘Bhunitukebe, bhenu̱ ndibha bhabhukina, bhu̱ye ka kala ndia kadaki̱si̱abe ndia bhantekani̱zi̱li̱a sitani na bhamalai̱ka ndibhaki; 42nanga inja abha nani̱gbei̱ nibhukukoma pesi̱ami li̱eli̱, na nyota nani̱gbei̱ nibhukukoma pesi̱ami li̱bho, 43Bhubha ndio bhu̱ku̱ni̱hi̱bi̱ nibhukukoma tangililiami ka i̱nji̱ ndianu̱, nibha kakabha ngoye malola no bhu̱ku̱ni̱pesi̱a ngoye, nibha ninilwali̱ toli̱ ninili ka nkomo no bhu̱ku̱bi̱ka zi̱bami.’ ”

44“Nabho bhada ki̱nsi̱ki̱aku̱ bhiyo; ‘Sali̱a, kikutangia dhi̱ inja na nyota naku̱gbei̱ kedha ndie bhi̱ki̱ku̱i̱bi̱ kedha nokakabha ngoye malola kedha nolwali̱ kedha noli ka nkomo toli̱ nikikoma koniako?’ ”

45“Ada ki̱bhu̱si̱ki̱aku̱ bhiyo; ‘Ka mazima nikibhutolia eti, kima poni ndio bhukukola ka moti̱ kowa bhakpa ndibha gwabhi̱mba, bhukukola kami.’ ”

46“Du̱mbi̱ ndibha bhali ka kibhoko sa kulegu̱ bhakitunga kifubilo ndia kada ki̱si̱abe, no ndibha bhawelikani̱o bhada kitunga bwomezi̱ ndia kaki̱si̱agabe.”

നിലവിൽ തിരഞ്ഞെടുത്തിരിക്കുന്നു:

Matayo 25: KWAMBA

ഹൈലൈറ്റ് ചെയ്യുക

പങ്ക് വെക്കു

പകർത്തുക