Habaku 2
2
1Mi ta̱ a kushamgba a̱ ubuta̱ u kindi u va̱,
n da̱sa̱ngu a gaɗi vu mashilya,
mi ta̱ a kuvana, m pana ili i na u kudana mu,
n ili i na u ku ushuku mu adama a̱ ma̱shi a̱ ma̱ va̱.
Wushuki u Vuzavaguɗu
2Ɗa Vuzavaguɗu wu ushuki mu u danai,
<<Ɗana akaka a nampa a, e meshemberu,
vu uta̱ka̱ a ɗa e keteshe,
tsu na yaba dem u kukece a ɗa mayin.
3Ama ali n gogo na akaka a i ta̱ a kuvana makyan ma̱ ni,
wi ta̱ a kadanshi ka ukocishi wi o ko okpo aꞋuwa ba.
Ko ka yaꞋan gogoꞋo ba, vana kaꞋa,
mayun ki ta̱ a̱ kuta̱wa̱, ke kugeshe ba.
4<<Panai, aza a na a̱ɗu e le i derere ba,
i a ku laꞋa ba.
Ama aza a usuɓi,
i ta̱ o kuyongo n wuma,
adama a uneki wa̱ a̱ɗu u le.
5<<Ma̱kya̱n kpamu mo tsu doro ta̱ vuza vu a̱ra̱ɗi,
adama a nannai u tsu da̱sa̱ngu a kpaꞋa ba,
ukuɓa u ni wi ta̱ tsu kasaun,
a na ukpa̱, u tsu cuwa̱ ba,
u tsu ɓolonku ta̱ ka̱ci ka̱ ni uduniyan ra̱ka̱,
u pura̱ka̱ ka̱ci ka̱ ni uma ra̱ka̱.>>
6Uma a nanlo dem i ta̱ kuyaꞋan tsurala n a̱yi
o ku zoꞋoso yi n kugoyi, n a danai.
<<Ili ya atakaci i ɗa, u vuza na u tsu ɓolongu ucanuku u na wi u ni ba!
ali wo okpoi n uciyi n uye u modoruko,
ali wannai ɗai ili i nampa i kulyaꞋa kelime?>>
7N uyevi u nu ba, aza a na i o kutono wu kutan i ta̱ a kucinaka wu,
i ta̱ a̱ kuta̱wa̱ wu ka̱ta̱ a zuwa wu kujeꞋeke ikyamba.
vu okpo le tsu ucanuku u na a̱ pura̱i gbani a̱ ubuta̱ u kuvon.
8Adama a na vu isa ta̱ ucanuku wu uduniyan n a̱bunda̱i,
uma a na a buwai ra̱ka̱ i ta̱ a ku isa ucanuku u nu feu.
Adama a na vu tsuwa̱n ta̱ mpasa n uma,
ɗa vu unai iɗika, n likuci kakau koɓolo n uma a na i punu dem.
9<<Ili ya atakaci i ɗa, u vuza na u tsu la̱nsa̱ kodokpotsu ka gbani-gbani,
adama a kpaꞋa ku ni.
Avu na vu tsu maꞋa kpaꞋa a gaɗi vu kaginda,
ciya̱ vu were kadama.
10Vu ronokoi kpaꞋa ku nu ili i wono,
adama a na vu una ta̱ uma n a̱bunda̱i.
vu unai wuma u nu n ka̱ci ka̱ nu.
11Atali a mashilya i ta̱ a kulapa una̱,
aburakpatsu a nɗanga i ta̱ a̱ ushuku.
12<<Ili ya atakaci i ɗa u vuza na u maꞋi likuci nu mpasa,
u shikpa̱i likuci ya n utsura u kawuya.
13Vuzavaguɗu MalaꞋimili ɗa u zuwai uma aduniyan a takacika, akina o songu ba?
Uma aduniyan oꞋwusoi ka̱ci ke le kpamu gbani?
14Ama aduniyan i ta̱ a kushana,
n uyevi u tsugbayin tsu Vuzavaguɗu,
tsu na mala ma tsu shana m mini.
15<<Ili ya atakaci i ɗa, u vuza na u tsu zuwa vuza na i a ida̱shi ɗeɗevu u soꞋo,
vu ka̱na̱i kutsunku le wupa u nu ali ɗa u makai le,
adama a na vu ene ciyampa ci le.
16Vi ta̱ o ko okpo n wono, a na va̱ kuciya̱ tsugbayin.
vi ta̱ o kusoꞋo ali ma maka wu,
moko ma wupa ma Vuzavaguɗu ma na mi e kukiye ku usingai ku ni,
mi ta̱ o kubono wa̱ a̱ nu,
wono wi ta̱ a̱ ku kimba̱ tsugbayin tsu nu.
17Kula̱nga̱su ku na vi yaꞋankai aza a Lebano
ki ta̱ o kubono wa̱ nu,
tsu na vu unai kpamu nnama n ni,
wi ta̱ o kubono we neke wu wovon.
Adama a na vu tsuwa̱n ta̱ mpasa n uma,
n kula̱nga̱su ku na vu yaꞋankai iɗika,
n ku na vu yaꞋankai likuci,
n yaba dem vu na wi punu a ida̱shi.
18<<UgaꞋin u yiɗa̱i tamkpamu ka̱ma̱li ki n u ɗa,
a na wo okpoi vuma ɗa u sheꞋwei kaꞋa?
A̱yi kululu ku viyum ku ɗa ku na ku tsu piꞋisaka uma aꞋuwa.
Adama a na a̱yi na u yaꞋin kaꞋa, u tsu neke ta̱ katsura ka̱ ni wa̱ ni,
u yaꞋin ka̱ma̱li ka na ka tsu dansa ba.
19Ili ya atakaci i ɗa u vuza na u tsu dana ka̱ma̱li ka na a yaꞋin n maɗanga, Jimgba.
Ko u dana katali, Ɗa̱nga̱.
Wi ta̱ a kufuɗa kuyaꞋan kuyotsongusu?
A tsu kuma ta̱ kaꞋa n azurufa n azanariya,
kaꞋa ka ci yinvuka ba.
20Ama Vuzavaguɗu wi ta̱ a̱ A̱Ꞌisa̱ a gbayin a̱ ni,
yaꞋan aduniyan dem a paɗa bini e kelime ka̱ ni.>>
©️2025 Language Development and Translation Initiative (LDTI)