Exodus 38
38
Erugano lyosizambero sononzambo dokuswakerera
(Ex 27:1-8)
1Age kwa rugene hena sizambero sokuswakererera nonzambo somusu. Aso kwa si rugene sikwambando. Monaure waso nomonompatji daso nometa 2,2 ngoso, ano momusika meta 1,3 ngoso. 2Ta ruganene ko nombinga komakovhu gane, di tunde mosininke simwe tupu nosizambero. Makura ta si vambaike nasinye ngoporo. 3Age ta rugana yiruganeso nayinye yoposizambero eyi: tuyiga tokukombera enoto, noyihupuro nomarupasa nonoforoko noyipana yomundiro. Nayinye eyi ta yi rugana yongoporo. 4Ta rugana hena sikangero sonyama songoporo. Ta si rugana pakwe. Ta si tura monda zaso mokana kosizambero, si ka sike pokatji kaso. 5Age makura ta rugana hena nongondo ne dokusisimbira, ta di roterere kosikangero songoporo, mokuhwilira nomudigo. 6Ta rugana nomudigo domusu, ta di vambaike ngorodo, 7makura ta di hwilida monongondo kwankenye ruha rosizambero, ngava si simbise ko. Sizambero kwa si ruganene ngwendi sikesa somuzahamena sosiporongwa.
Erugano lyosiyaha sokulikuhwira
8Age ta rugana siyaha sokulikuhwira songoporo netako lyaso lyongoporo monontarero dovakadi, ava ngava rugana pevero lyoNkongoronzugo.
Rugumbo roNkongoronzugo
(Ex 27:9-19)
9Age kwa ruganene rugumbo. Makehe gokorwaMbindakano gonongodi dolina dononderu dokurambakana kupoha. Monaure wago nometa nomurongo ne nane. 10Nongundi nomurongo mbali nomatako gado nomurongo mbali yongoporo kumwe noyinkongo yado. Nongodi dado kwa kere dosisiliveli. 11KorwaMuzogo‐zogo makehe gako nometa nomurongo ne nane monaure, da kwata nongundi nomurongo mbali dongoporo nomatako gado nomurongo mbali gongoporo, kumwe noyinkongo yado nonongodi dado dosisiliveli. 12Makehe gokorwaUtokero nometa nomurongo mbali nambali monaure, da kwatere nongudi murongo nomatako gado murongo kumwe noyinkongo yokonongundi nonongundi dado dosisiliveli. 13KorwaUpumezuva nometa nomurongo mbali nambali monompatji. 14Koyiha yerungavero nako makehe ga kere ko. Monompatji nometa ntano‐nazimwe noharufa nonongundi ntatu nomatako gado gatatu. 15Koruha rukwawo nako ngosikwawo. Komaruha nagenye gevero lyorugumbo nako kwa kere makehe gonometa ntano‐nazimwe noharufa monaure, kumwe nonongundi ntatu nomatako gado gatatu. 16Makehe nagenye gorugumbo golina zonderu zonongodi dokurambakana kupoha. 17Matako gonongundi gongoporo, ano yinkongo yokonongundi nonongodi dado nonomutwe dado dosisiliveli. Nongundi nadinye dorugumbo kwa di gwanekedesere nonongodi dosisiliveli. 18Ekehe, eli lya kere pevero lyorugumbo, kwa li limbagwire nonongodi dosineguru nopurupuli nougeha nekehe lyatooto. Monaure walyo nometa ntano‐nane, ano momusika gwalyo nometa mbali ngwendi makehe gorugumbo. 19Nongundi ne nomatako gado gane gongoporo, ano yinkongo yado nonomutwe dado nonongodi dado dosisiliveli. 20Yikwateso nayinye yoNkongoronzugo neyi yorugumbo kwa kere yongoporo.
Yivera yokuruganesa moNkongoronzugo zaHompa zoMagwanekerero
21Eli yilyo evaruro lyoyivera yokuruganesa moNkongoronzugo zoMagwanekerero, omu va pungwire yitafura yivali yomamanya, apa va tjangere yipango murongo. Elikwamo eli Mosesa ga li pangere, makura tava li rugana Varevhi, ava ngava rugana moupitisili waItamara, munwamupristeli Arona.
22Besareli zaUli gemezimogona lyaHuru gorudi rwaJuda yige ga rugene yininke nayinye, moomu ga yi pangerere Hompa Mosesa. 23Mukwafi gwendi Oholiyaba zaAhisamaki gomorudi rwaDana kwa kere nkurungu zene‐zene, age hena mutungi gomakehe golina zene‐zene naga gosineguru nopurupuli naga gonongodi donongeha. 24Ngorodo nazinye, ezi va pongwerere Hompa moyirugana yokutunga Nkongoronzugo zoKupongoka, mukumo gwazo nokilogarama eyovi limwe nefere limwe ngoso mokuliza nondando, ezi za kara po. 25Sisiliveli, esi sa tundire movantu, ava va varwire, mukumo gwaso nokilogarama mayovi gatatu nomafere gane nonomurongo ntatu mokuliza nondando, ezi za kara po. 26Sivaro esi kwa lifana nosivaro mudima, esi va futire vantu navenye, ava va litjangesere. Nkenye ogu kwa futire sivaro, esi sa kara po, mukumo gwaso kwa liza nondando ezi za kara po. Vagara, ava va tjangere, wonomvhura nomurongo mbali nava wokupitakana opo, sivaro sawo 603 550. 27Sisiliveli sonokilogarama mayovi gatatu nomafere gane kwa si ruganesere mokurugana matako efere goNkongoronzugo zoKupongoka naga gomakehe, nkenye etako nokilogarama nomurongo ntatu nane. 28Nokilogarama nomurongo ntatu edi da hupire po, Besareli kwa di rugene nongodi noyinkongo yokonongundi nonomutwe dado. 29Ngoporo, ezi va pongwerere Hompa, sivaro sazo kwa hulire ponokilogarama mayovi gavali nomafere gane nonomurongo mbali nantano. 30Azo kwa zi rugene matako gepevero lyoNkongoronzugo zoMagwanekerero nosizambero songoporo nosikangero saso songoporo sokurugana pakwe noyiruganeso nayinye yoposizambero 31nomatako gorugumbo naga gepevero lyorugumbo noyikwateso nayinye yoNkongoronzugo zoMagwanekerero neyi yorugumbo.
നിലവിൽ തിരഞ്ഞെടുത്തിരിക്കുന്നു:
Exodus 38: KWN
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Egwanekerobibeli Lyanamibia 1987, 2003
© Bible Society of Namibia 1987, 2003
