Exodus 26
26
Etungo lyoNkongoronzugo zaHompa
(Ex 36:8-38)
1“Ano Nkongoronzungo zaHompa ngo zi tungise makehe murongo gosaira, aga va tungisa konongodi dononderu dokurambakana kupoha dolina dononzera nedi dougehamburau nedi dougehapurupuli nedi dougehageege. Ngo tungilire mo mafano govakerubi, ngo yi rugana pasiunkurungu. 2Nkenye ekehe lyosaira monaure walyo li hure ponometa murongo nambali. Ano monompatji nometa mbali. Makehe nagenye gosaira ga hetakane. 3Makehe gatano kugahonzakana kumwe, ga gwanekere. Ano makehe hena gatano nago kugahonzakana kumwe, ga gwanekere. 4-5Kekehe lyokuhova lyomakehe aga va honzakana, komukunkuro gwalyo to honzere ko nombururu nomurongo ntano dongodi zosineguru. Ogo makehe hena gatano makwawo va honzakana, nako yimo mokurugana ko ngorooro. 6Ngo hambure hena tuhake nomurongo ntano tongorodo, makura makehe kugakwatakanesa kumwe notuhake, makura taga kara nkongoronzugo zimwe tupu.
7“Ngo rugane hena makehe aga va tungisa konohuki doyikombo, ga kare ukudumikiso woNkongoronzungo: to ga rugana ga kare murongo nekehe limwe. 8Makehe nagenye aga ngaga hetakane, monaure wago nometa murongo nantatu ngoso, monompatji dago nometa mbali ngoso. 9Gatano ngo ga honzakane, li kare limwe tupu, ano aga gatano‐nalimwe nago ngo ga honzakane, li kare limwe tupu. Ekehe lyautano‐nalimwe ngo li gonye, to li tura korwameho zoNkongoronzugo. 10Kekehe lyokuhulilira lyomakehe, aga wa honzakana, to honzere ko nombururu nomurongo ntano. Ogo makehe makwawo, wa honzakana, nako to honzere ko nombururu nomurongo ntano. 11Ngo hambure yinkongo nomurongo ntano yongoporo, ngo yi kogaike monombururu, yi gwanekedese ogo makehe gavali, ngali kare limwe tupu. 12Harufa zekehe ezi ngazi zenzerera koNkongoronzugo, ngazi zenzerere korwanyima zoNkongoronzugo. 13Harufameta ngoso zokugwederera monaure wankenye ekehe lyokoNkongoronzugo ngazi zenzerere monompatji doNkongoronzugo, ngazi zi kudumike.
14“Ngo ruganene hena Nkongoronzugo ukudumikiso woyipapa yoyikungwe yokutupika mombapa zongeha, nokontunda zawo ukudumikiso ukwawo woyipapa ya pya kusunta.
15“To hongo hena nongundi domusu dokuvyukilira doNkongoronzugo. 16Nkenye ngundi zi hure ponometa ne ngoso monaure, ano mounene nosentimeta nomurongo ntano‐nazimwe nantano‐nazimwe ngoso. 17Nkenye ngundi kuzitjokora makero gavali gokudigwanekedesa. Nongundi nadinye yimo mokuditjokora ngorooro. 18Ngo honga nongundi, dokorwaMbindakano. 19Rugana hena matako gonongundi nomurongo ne gosisiliveli konhi zado, gavali kwankenye ngundi ga vyukise makero gado. 20KorwaMuzogo‐zogo goNkongoronzugo nako to hongere ko nongundi nomurongo mbali, 21nomatako nomurongo ne gosisiliveli, kwankenye ngundi gavali. 22Konyima zoNkongoronzugo, korwaUtokero, to hongere ko nongundi ntano‐nazimwe, 23to hongo hena nongundi mbali domomakovhu konyima zoNkongoronzugo. 24Pedi nekeguru di hetakane nawa‐nawa dogoro komusere gomuhowo. Odo nongundi mbali pomakovhu tadi paka po sikwarwarwa. 25Pa kare nongundi ntano‐nantatu nomatako gado murongo nagatano‐nalimwe, kwankenye ngundi gavali.
26“Ngo honge nompigetji murongo nantano domusu, ntano dokonongundi doruha rumwe roNkongoronzugo, 27ntano dokonongundi doruha rukwawo, ano edi ntano dokonongundi dokorwaUtokero konyima zazo. 28Mpigetji zopokatji zi kare pwene-pwene pokatji konongundi, zi tamekere kouhura ou dogoro kouhura ukwawo woNkongoronzugo. 29Nongundi ngo di vambaike nongorodo, makura to tura ko nolinga dongorodo, mokuzweka nompigetji, edi ngo vambaika nado nongorodo. 30Ntani nye ono kudika Nkongoronzugo mokuliza nefano, eli na ku likida kondundu.
31“Ngo tunge hena ekehe lyolina zene‐zene, makura to li limbagura nonongodi dokupoha dosineguru nedi dopurupuli nedi donongeha. To li limbagura nomaurenga gomafano govakerubi. 32To li kulike konongundi ne domusu, edi va vambaika nongorodo doyinkongo yongorodo, yiyo va di zweka momatako gane gosisiliveli. 33Ekehe lyokuvivisa to li kogaike koyinkongo meguru lyoNkongoronzugo, makura to tura sikesa, omu mwa kara yitafura yivali yomamanya, kesinya kwina lyekehe, ngali hangura Evega lyoKupongoka kEvega lyoKupongokerera. 34Tura nswiko kosikesa sEgwanekero. 35Sitafura to si tulire kesinya eli lyekehe lyokuvivisa, sitenteko naso to si tulire kesinya eli korwaMbindakano zoNkongoronzugo, si livyuke naso nositafura, esi ono tura korwaMuzogo‐zogo.
36“Pevero lyoNkongoronzugo napo ngo ruganene po ekehe lyolina zene‐zene, makura to li limbagura nonongodi dokupoha dosineguru nedi dopurupuli nedi donongeha. 37Olyo ekehe to li ruganene nongundi ntano domusu, edi wa vambaika nongorodo, doyinkongo yongorodo, makura to di ruganene matako gatano gongoporo.
നിലവിൽ തിരഞ്ഞെടുത്തിരിക്കുന്നു:
Exodus 26: KWN
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Egwanekerobibeli Lyanamibia 1987, 2003
© Bible Society of Namibia 1987, 2003
