Exodus 21
21
Etekuro lyovapika
(Deut 15:12-18)
1“Edi yido nompangera no va tantera. 2Nsene o randa mupika goMuhebeli, a rugane nomvhura ntano‐nazimwe, nye momvhura zautano‐nauvali, to mu sigi a ze pwa hana yokumuzowesa. 3Nsene asi gelike ga kara koupika, gelike no mangurura. Ano nsene asi ga kwara, mukadendi nage va mu mangurure. 4Nsene asi hekurwendi yige ga mu pa mukadi, nye a vhare vana wovagara ndi wovakadi, ogo mukadi nowo vana vahekurwendi, age gelike yige gokumangurura ko. 5Mupika nsene a yi koreka mwene asi: ‘Ame kwa hara hekurwange namukadange novana vange, kapi na hara kumanguruka.’ 6Ogo hekurwendi a mu tware kwaKarunga pevero lyoupongoki ndi koyikuravero, makura hekurwendi a ka mu tjiure kutwi nontungo. Makura ogo nga mu ruganena nye narunye.
7“Mvharerwa nsene zi randesa munwazo koupika, nokumumangurura si ngwendi vapika peke. 8Ano nsene kapi ana kuyahafesa hena hekurwendi ndi kapi ana mu hara asi a kare mukadendi, kutupu nonkondo dokumurandesa kovanayirongo, morwa ana teza nonkwara. 9Ano nsene a tokora asi ta mu pe po munwendi, kumutekura moomu ava tekura muna gomukadi. 10Nsene a kwara ko hena gumwe kapisi a zumine mukadendi gomuhowo nondya noyikoverero neyi ya mu tumbukira. 11Ano nsene a dira kumupa yininke eyi yitatu, kumusiga tupu a ze pwa hana mfuto.
Noveta dokuhamena koyirugana yoyidona
12“Muntu nsene a dipaga mukwawo, nage va mu dipage. 13Nsene a dira kumuvandera, Karunga ana yi mu pe, ngani ku likida evega eli nga tjwayukira. 14Muntu nsene a dipaga mukwawo nye yimo ga yi gazara, noposizambero sange paapa to mu gusa po va mu dipage.
15“Ogu ana toona oguhwe ndi ozina, va mu dipage.
16“Ogu ana vaka muntu mukwawo a ka mu randese ndi va yi mu kwatere, yige kumudipaga.
17“Ogu ana tuku oguhwe ndi ozina, yige kumudipaga.
18“Nsene va litoona vagara, nye gumwe a toone mukwawo nemanya ndi nonyongo a gwe, nye mokufa kapi ana fu 19komeho nga tunde monzugo a gendagure, ogo mutooni nokumukontora si kumufutisa. Nye a kare tupu nosinka sogu ana kerere mo hena a fute mfuto zosihakwiro.
20“Mvharerwa nsene zi toona mupika gwazo gomugara ndi gomukadi, nye a fe poopo ngoso, veta zi kare po moomu za kara. 21Ogu mupika nsene a kara nomwenyo ezuva limwe ndi gavali, ogo hekurwa nokumufutisa si, yeeyi olyo emona lyendi ga randa.
22“Nsene vagara vavali vana kulitoona, nye gumwe a rorore mukadi gomarutu gavali, ezimo lyendi li tunde po, ga hana kuzonaukilira, kumufuta moomu ana seyere yendi ndi moomu vana tokwere vapanguli. 23Ano nsene a fa, momwenyo tamu piti mwenyo mukwawo. 24Meho eho, mezego ezego, mokuwoko kuwoko, mompadi mpadi, 25mosironda somundiro sironda somundiro, mosironda sironda, ano mombore mbore nkwawo.
26“Ano mvharerwa nsene zina toona mupika gwazo gomugara ndi gomukadi keho li zonaukilire, mfuto zendi zokumumangurura makura. 27Ndi ogo mupika gwendi kuna mu kura ezego, mfuto zendi zokumumangurura makura.
Eyi ya tumbukira venyayuma
28“Ngombe nsene zi twa mugara ndi mukadi a fe, kuzidipaga nomamanya, ano mwenyazo kutupu nzo, nye nyama zazo nokuzilya si. 29Ano ozo ngombe nsene asi nanare ugara za kara, mwenyazo va yi mu tantera, nye age nombili si, dogoro tazi dipagere mo mugara ndi mukadi, ozo ngombe kuzidipaga nomamanya, ano mwenyazo nage tava mu dipaga. 30Nsene va mu ninka asi a lizowore, a fute nayinye eyi vana mu tokwere, a zowore mwenyo gwendi. 31Ngombe nsene zi dipaga munwamuntu gomugara ndi gomukadi, napo ngosikwawo. 32Ano ozo ngombe nsene zi dipaga mupika gomugara ndi gomukadi, mwenyamupika va mu fute yimaliva nomurongo ntatu yosisiliveli. Ozo ngombe tava zi dipaga nomamanya.
33“Nsene o siga etope muzahamena ndi o sime etope nye wa hana kukudumika ko nawa, makura mu gwire ngombe ndi sindongili, 34mwenyaetope ta futire gosimuna mfuto zina gwana po, nye oso simuna sina fu yikororombwa nye yogo getope. 35Ngombe zagumwe nsene zi dipaga zamukwawo, ozo zomwenyo va zi randese yimaliva makura tava yi lipitire pokatji, ano ezi zina fu nazo tava zi lipitire pokatji. 36Ano nsene za divikwa asi nanare ugara za kara, nye mwenyazo nombili si, ta gava mo ngombe nkwawo. Ozo zokufa tazi kara yikororombwa yendi.
നിലവിൽ തിരഞ്ഞെടുത്തിരിക്കുന്നു:
Exodus 21: KWN
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Egwanekerobibeli Lyanamibia 1987, 2003
© Bible Society of Namibia 1987, 2003
