اعمال 21
21
پولس بَشی اورشلیم
1اَوون کا جِدا آبییِه پَش، دریا راه نَه سَفری را، رایی بیمونَه و یَکراست شیمونَه تا ’کوسی‘ جزیره را. صَبایی نَه روز، شیمونَه رُودِسی جزیره و اوآ نَه آرَستیمونَه پاتارا بندری را. 2اوآ کا ایلَه کَشتی ویندِمونَه که کارا بَشی فینیقیه را. اَیی دَنِشتیمونَه و راه دَلَکیمونَه. 3قِپرسی چَمَه چَپ طرفی کا ویندِمونَه و اَیی کا دَوییَردمونَه، شیمونَه سوریه طرفی را. دومله صوری بندری کا پیاده آبیمونَه، چوم اوآ کا بَسی کَشتی باری تِی آکَرین. 4اوآکا شاگِردون تِلفتِمونَه، هف روز چَوون وَری کا مَندیمونَه. اَوِن خِدا روح هدایتی نَه پولسی نَه واتِشونَه که مَشو اورشلیمی را. 5وختی روزونی که قرار بَه اوآکا بومونَم تَمون آبینَه، رایی سفر بیمونَه. شاگِردِن گِرد، ژِنکَون و چَوون خِردَنون نَه، اَمَه نَه تا شهری بِرون اومینَه رادرازی. اوآ کا، دَریا وَری کا زِنگ ژَندِمونَه و دعا کَردِمونَه. 6خداحافظی کَردِه پَش، کَشتی دَنشتیمونَه، و اَوِن نی آگَردِستینَه اِشتَن کَ اون را.
7اَمَه، چَمَه دریایی یَه سفری صوری بندری نَه ادامه دومونَه و آرَستیمونَه پْتولامائیسی شهر. اوآ کا بِرااون کا دیدار کَردِمونَه و ایی روز چَوون وَری کا مَندیمونَه. 8صَبایی نَه روز، اوآنَه شیمونَه و اومیمونَه قیصریَه شهری را و شیمونَه فیلیپُسِ مُبشری کَ، که ایلَه اَ هف نفری کا بَه که خِدمتی را اِنتخاب بییَه بَه و چَیی وَری کا مَندیمونَه. 9اَ، چهار گِله اَذَبَ کِلَه داری که نَبوت بَکَردین.
10چَن روزَه پَش که اوآ کا بیمونَه، ایلَه پیغمبَری که چَیی نوم آگابوس بَه یهودیه ولایتی کا آرَستَه. 11اَ اومَه چَمه وَر و پولسی کَمَردَوِندی ویگِتِشه، اِشتَن دَسون و پا اون اَیی نَه دَوَستِشه و واتِشه: «روح القدس بَواتی: ”اورشلیمی یهودییِن، اِم کَمَردَوِندی صاحابی اِنتَه دَوِندِن و اَیی آدَن غیریهودیون دَس.“»
12وختی اِمی دَرَسِمونَه، اَمَه و اوآ مردم پولسی مِنَّت کَردِمونَه که، مَشو اورشلیم. 13امّا پولس جَواو دوشَه: «اِم چِه کاری یَه که بَکَردیرون؟ چیرا شِمَه داد کَردِه نَه چِمِن دیلی چاکِنَه؟ اَز حاضِریمه عیسایِ خِداوندی نومی واسی، نِه فقط بِشوم رومی زندان، بَلکَم اورشلیمی کا نی بِمِرِم.» 14وختی ویندِمونَه قانع نییَب، دَس پِگِتِمونَه و واتِمونَه: «اَ چیی که خِداوندی پیستَه یَه، هَتَه بِبو.»
15اَ روزون پَش، سَفَری را آمادَه آبیمونَه و راه دَلَکیمونَه اورشلیمی طرفی را. 16بَعضی شاگِردون کا نی که قیصریَه شِن بینَه چَمَه همراه اومینَه و اَمَه بَردِشونَه مِناسونی کَ تا چَیی مهمون بِبییَم. مِناسون، قِپرسی شِن بَه و ایلَه قدیمی یَه شاگِردون کا بَه.
پولس یعقوبی بَویندی
17وختی آرَستیمونَه اورشلیم، بِرااِن اَمَه گرمی نَه قبول کَردِشونَه. 18صَبایی نَه روز پولسی نَه شیمونَه یعقوبی ویندِه را. مَشایخ گِرد اوآکا مَند بینَه. 19پولس اَوون را سلام کَردِشه و ایلَه ایلَه چَوون را توضیح دوشَه که خِدا چَیی خدمتی واسطه نَه، غیریهودیون دیلَه کا چِه کارونی کَردَشه.
20اَوِن وختی دَرَسِشونَه، خِدا ستایش کَردِشونَه. دومله پولسی نَه واتِشونَه: «اِی بِرا، هَتَه که بَویندیش هَزارون گِله یَهودی ایمان وَردِشونَه و گِرد، شریعتی را غیرت دارِن. 21چَوون دیلَه کا اِنتَه چُو دَلَکَه که تِه، گِردِ یهودیونی که غیریهودیون دیلَه کا زندگی بَکَردین، تعلیم بَدایش که موسایِ پیغمبری شریعتی کا آگَردِن، و بَواتیش که نَبی اِشتَن خِردَنون خَتنه بِکَرِن و نَبی طبق چَمَه رسم و رسومات رَفتار بِکَرِن. 22حِسَه بَسی چِه بِکَرَم؟ حتمن، اَوِن اِشتِه اومِه کا خَوَر دار بَبین. 23بَس اَ چیی که تِنه بَواتیمون، اَنجام بِدَه. اییا کا چَمَه وَری کا چهار گِله مِرد اِستینه که نَذر هِستِشونَه. 24اَوون اِشتِه همراه بِبَه و اَوون نَه تطهیری رسم و رسوماتی اَنجام بِدَه و چَوون خرجی آدَه تا بِشان اِشتَن سَرون بِتراشِن. اِنتَه گِرد بَزنین که اِم چییِن که اِشتِه درباره چُو دَلَکَه اینَه، راست نینَه، بَلکَم تِه نی شریعتی اَنجام بَدایش، و اَیی نَه زندگی بَکَردیش. 25امّا غیریهودیه ایماندارون درباره، اَمَه چَمَه حکمی، ایلَه نامه‌ای کا اَوون آرِساووندِمونَه و واتِمونَه که بَسی بُتون قِربونییون غذا کا، خونی کا، خَفه بییَه حَیوونون گوشتی کا و زِنا کا دوری بِکَرِن.»
26صَبایی نَه روز، پولس اَوون اِشتَن هَمراه بَردِشه و اَوون نَه تطهیری رسم و رسوماتی اَنجام دوشَه. دومله شَه معبد تا تطهیری تمون آبییِه روزون تاریخی اِعلام بِکَرِه که اَ روزون کا چَوون هَر کمیله را قِربونی تَقدیم بَبی.
پولسی معبدی دیلَه کا دستگیر بَکَردین
27چیی مَندَه نِبَه که تطهیری هفت روز تَمون آبی که چَن گِله یَهودی که آسیا ایالتی شِن بینَه، معبدی کا پولسی ویندِشونَه. اَوِن جماعتی آنتیریک کَردِشونَه و پولسی گِتِشونَه، 28خِلِع ژَنین: «اِی یهودی مردم، کمک بِکَرَه؛ اِم هَ کسی یَه که گِردی، گِردِ جِگا کا چَمَه قوم و چَمَه شریعتی ضِد و اِم جِگا ضِد، تعلیم بَدای. چِمی غِیراز حتی یونانیون نی وَردَشه معبدی دیلَه و اِم مقدّس جِگا نِجِس آکَردَشَه.» 29چوم که اَوِن پیشتری تْروفیموسِ اَفِسُسی، پولسی نَه شهری کا ویندَشون بَه و خَیال بَکَردین پولس اَیی بَردَشه معبدی دیلَه.»
30اَ موقع گِردِ شهری کا بَلوا بَر پا بَه! مردم هَر طَرفی کا هُجوم وَردِشونَه و پولسی گِتِشونَه، معبدی کا بِرون بَرکَردِشونَه و اَلبَحَل معبدی بَرِن چَوون پِشت سَر دَوَستَه بینَه. 31هَتَه که پیستِشون بَه اَیی بِکِشین، رومی سربازون فرمانده خَوَر آرَستَه که گِردِ اورشلیمی کا بَلوایی بَر پا بییَه. 32اَ فرماندَه اَلبَحَل اِشتَن سَربازون و اَفسرون نَه ویریتینَه جماعتی طرفی را. وختی جَماعت، فرمانده و چَیی سَربازون ویندِشونَه، پولسی ژَندِه کا دَس پگِتِشونَه.
33فرمانده نِزدیک اومَه و پولسی گِتِشه و دَستور دوشَه اَیی دِ گِله زنجیری نَه دَوِندِن. اَ موقع دَفَرسِشه که اَ کییَه و چِه کَردَشه. 34جماعتی دیلَه کا هَر کسی خِلِع بَکَردی و ایی چیی بَواتی. فرمانده نی که سَرصِدا وِر بییِه واسی نیمَشای حقیقتی بِزونی، دَستور دوشَه پولسی بِبَرِن قلعه دیلَه. 35وختی پولس آرَستَه قلعه پاپیله نِزدیکی، جماعت هِندی عصبانی بینَه که سربازِن مَجبور بینَه پولسی اِشتَن دَسون سَری نَه رَد آکَرِن. 36جَماعتی که چَوون دومله نَه کارا بومَین، خِلِع ژَنین که: «اَیی بِکِشَه!»
پولس مردمی نَه گَف ژَنِه
37حَلا پولسی بَردَشون نِبه قلعه دیلَه که پولس، فرمانده نَه واتِشه: «اِجازه بَدایرون شِمَه نَه چیی بوآجِم؟»
فرمانده واتِشه: «تِه یونانی بَزنیش؟ 38مَگم تِه هَ مصریی نیش که چِندی پیش شورِش کَردِشه و چهار هَزار گِله آدَمَه کِشی اِشتَن نَه بَردِشه ویاوون؟»
39پولس جَواو دوشَه: «اَز ایلَه یهودیه مِردی ایمَه و تارسوسی کیلیکیَه شِنیمَه، شَهری که بی‌نوم و نِشون نییَه. خواهیشت بَکَردیم اِجازَه بِدییَه مردمی نَه گَف بِژَنِم.»
40وختی فرمانده اِجازه دوشَه، پولس پاپیله اون سَری کا مَندَه و اِشتَن دَسی مردمی طرف دِراز آکَردِشه. وختی گِردِ جِگا کاملاً ساکیت آبَه، عِبرانیون زَوونی نَه اَوون نَه اِنتَه واتِشه:
നിലവിൽ തിരഞ്ഞെടുത്തിരിക്കുന്നു:
اعمال 21: ITB
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
@ 2024 Korpu Company
