انجیل مرقس 15

محاکمه پیلاتُسه پرانک

1ایزه که ز روج آبه، البحل، سران کاهنان، شیخانه و تورات معلمیننه و همه‌ی یهود شورا اعضانه مشورتشان بکرده. اَوان عیسی شان دِوَسته دَسِنه ببرده و رومه والی، پیلاتُس شان تحویل آدا. 2پیلاتُس، عیسیکش آپرسس: «ته یهودیان پادشاهش؟» عیسی جواو بدا: «ته ایزه واتری!» 3سران کاهنان، عیساشان پِره تُیمتشان زیرده. 4پیلاتُس هنی عیسیکش آپرسس: «هیچ جواوی نداری؟ دیس چنده ته تُیمت زیرنده!» 5ولی عیسی هنی هیچ جواوی نداشه، ایزه که پیلاتُسه تعجب بکه.

6پیلاتُسه رسم داشته که هر سال پسخ عیده موقع، ایگله زندانی مردمه انتخاب نه چوان را آزاد بِکَره. 7ای گروه یاغیانک زندانک بنِده که شورششان کرده به و آدمشان کوشته به. چوان دلک ایگله مردکی به که چَوه نام بارْاباس به. 8جماعت بامنده پیلاتُس وَر و اَوک آخاشتشانه که هَ رسمی که همیشه چوان را انجام دَیه، به جا بوعره. 9پیلاتُسه اَوانک آپرسس: «رایرانه یهودیان پادشاه شاما را آزاد بکرم؟» 10پیلاتس اِمش باته چون چاک زانسِشِه که سران کاهنان، پَخیلی سَرَدن عیسی شان تسلیم کرده. 11امّا سران کاهنان جماعتشان جوکو بداه تا پیلاتُسک آخازنده عیسی عوض، بارْاباسه چَوان را آزاد بِکَره. 12اَدمی پیلاتُس هنی اَوانکش آپرسسه: «پس مردکی نه که شاما اَونه یهودیان پادشاه واترا، چه بکرم؟» 13جماعت هنی جرشان کردرده که: «اَوه صلیب سرک بوکوش!» 14پیلاتُسه اَوانک آپرسس: «چیه را؟ چه بدی ای کردشه؟» امّا اَوان بلندتر جره کردرده: «اَوه صلیب سرک بوکوش!» 15پس پیلاتُس که رایش به جماعت راضی نیا بداره، بارْاباسش چوان را آزاد بکه و دستورش بدا تا عیسی شِلاق بزننده، و چاوش درسماردشه اَوه صلیب سرک بُوکَوشنده.

عیسی مسخره کردن

16اَدمی سربازه، عیسی شان ببه والی کاخه حیاطه دله، و گُردانِه، همه‌ی سربازان نی دادشان بکه هندیگره ور. 17چاوش ایگله اَرغوانیه اَباییشان اَوه دکرده و تیگِنه تاجی بوَتشانه و اَناشانه عیسی سرک. 18اَ موقع عیسی پرانکشان تعظیم بکه، و واتردشانه: «سلام بر یهودیان پادشاه!» 19اَوان چوعنه عیسی کلک زیَرده و چه صفته سر چافشان آشاندرده، چه پرنکشان زانو زیَیرده و هُادی هُادیشان آکته به. 20عیسی مسخره کردنه پَش، ارغوانیه اَباشان چوه جانک برآورده و چَوه اِشتن خلواِنشان اَوه دکرده. چاوش اَوشان ببرده تا صلیب سرک بوکوشنده.

عیسی مصلوب کردن

21سربازه راک ای نفرشان بینده که چَوه نام شمعون به و قیرَوانه اهالیک به. اَ اِسکندر و روفُسه پِه به و زمین سرنه آگرسرده. سربازه شمعونشان مجبور بکه تا عیسی صلیبه چَه پشدنه ببره. 22پس عیسیشان ببرده یاگایی که چوه نام جلجتا به. و اَگاره معنی جمجمه یاگا اِسه. 23اَوان ایگله شرابی که مُرنه بیدی گنسه به آداه عیسی که آخره، امّا عیسی اَوش آنخه. 24چاوش عیسیشان مصلوب بکه و چَوه خلوعشان اِشتن میانک آبخشسه، اَوان قرعه شان درند تا بیننده هر تیکه چی کی سهم بی.

25ساعت نه صبح به که اَوان عیسیاشان مصلوب بکه. 26چَوه تقصیر نامه سرکشان بینیویشت: «یهودیان پادشاه.» 27دو گله راهزن نی عیسی نشان مصلوب بکه، ای نفر چَوه راسه طرفک و اَدَریین چَوه چپه طرفک. 28ایزه مقدّس نیویشته هان، اَ نیویشته اتفاق دگس که واجه: «اَ جنایت کاران دَستک حساب ببه.» 29راه اِوراران اِشتن سرشان تکان دیرده، و دشمان دییَن دیین واتردشانه: «ته ای که رایر به معبده خراب بکری و سُه روجه اَوه هنی رچ آکری، 30اِشتن نجات بده! صلیب سرنه بو جیر!» 31ایزه نی سران کاهنان و تورات معلمین اِشتن دِلَک عیسیشان مسخر کردرده و واتردشانه: «علوده آدمش نجات بدانده، نتانسر اِشتن نجات بدیه! 32بدا مسیح موعود، خدا قومه پادشاه، اِسا صلیب سرنه بایه جیر تا آما بینام و ایمان بوعرام.» اَ دو نفر نی که عیسی نه صلیب سرک بنده، اَوشان دِشمان دییرده.

عیسی مرگ

33ساعت دونزه ناهارنه تا ساعت سُه ناهار پَش، تاریکی همه‌ی اَ سرزمینش بکَته. 34ساعت سه ناهار پش به که، عیسی بلنده صَصنه جرش بکه: «ایلویی، ایلویی، لَمّا سَبَقْتَنی؟» یانی «چِمن خدا، چِمن خدا، چیه را منر تَینا بَشتِم؟» 35بعضی از اَوه ای که اَگا وندرسه بنده وختی اِمشان بشنوس، باتشانه: «دیسا، ایلیا پیغمبره داد کردر.» 36ای نفر بیرویت، ایگله اسفنجیشی ترشسَه شرابنه فت آکه و چویی سَرک اَناشه، ببردشه عیسی گَره پران تا عیسی آخره، و باتشه: «بندرا، بدا بینام آیا ایلیا پیغمبر آیه اَوه صلیبه سرنه جیرووَره؟» 37پس عیسی بلنده صصه نه جرش بکه و جانش بدا. 38اَ موقع، معبده پرده، کَفانه تا جیر دو پاره بیبیا. 39وختی سربازان فرمانده که عیسی دیمادیم وندرسه به، بیندشه که عیسی چنجوره جانش بدا، باتشه: «واقعا که اِم مردک خدا زا به.»

40چند گله زلی نی دورنه دیَشتَردنده. مریم مجدلیه، مریم که ویلیه یعقوبه و یوشا ما بیا، و سالومه نی، چوان دلک بنده. 41اِم زلییان وقتی که عیسی جلیل منطقک به، اَوکشان پیروی کرده و خدمت کرده. پر علوده زلیی نی که عیسی همراه آمییه بنده اورشلیم، اَگارک بنده.

عیسی دخشاردن

42اَ روج، ’تهیه‘روج به که یهودیان اِشتن شان آماده کرده عیده را، یعنی ای روج پیش از مقدسه شنبه روج. پس نِمِسیره دم 43ایگله مردکی که چَه نام یوسف به و رامه اهالیک به، جراتش بکه بشه پیلاتس ور و عیسی جنازش آخاشت. یوسف یهوده شورا ایگله محترمه اعضا به و خدا پادشاهی چشم به راه به. 44پیلاتُس تعجبش بکه که بشنوسشه عیسی اِم زودیان مرده. پس سربازان فرماندش داد بکه تا آپرسه بینه عیسی مرده یا نه. 45وختی پیلاتس اَ فرماندکش بشنوسه که عیسی مرده، اجازه آداشه که یوسف، عیسی جنازه ببره. 46یوسف نی ایگله کتانه کفنی بخریشه و جنازش صلیب سرنه بوعرده جیر. یوسف عیسی جنازش اَپیته اَ کتانیه کفنک و بناشه مقبره ای دله که صخره دلک تاشسش به. چاوش ایگله پیله سِگی مقبره گَره پَرانکش بنا. 47مریم مَجْدَلیّه و مریم، یوشا ما، بیندشانه که عیسی جنازشان کا بنا.

നിലവിൽ തിരഞ്ഞെടുത്തിരിക്കുന്നു:

انجیل مرقس 15: TIT

ഹൈലൈറ്റ് ചെയ്യുക

പങ്ക് വെക്കു

പകർത്തുക