انجیلِ مَتّی 16
16
آسمانیه نشونه بِگَوِسِشون
1فریسی فرقه عالمه و صَدّوقی فرقه عالمه بومِندِ عیسی وَر تا اَجو امتحان بکرنده. چِمه خونین چو کودَ بِگَوِسِنده که آسمونیه نشونَه‌ای اجون نشون بیدی. 2عیسی چون جَواو بِوات: «غروو دم وایو ”هوا چاک بی، چون آسمان سُره،“ 3صبح تولو وایو ” هوا هارو طوفانی بی چون آسمان سوره و گیرِسِه.“ شَما چاک زونو چه طره آسمانه دِدِشتَنییَم چو وضع تعبیر بِکرا، امّا نِتونو زمانون نشونه هون تعبیر بکرو! 4اَم نسل شرور و زناکار، ای نشانه‌ای گَوِه! امّا هیچ نشانه ای اجون نِدییوم مگم یونس پیغمبره نشونه.» پس عیسی اَ مکانِش ترک بکه.
فَریسیون و صَدّوقیون خمیر مایه
5وختی بِشنده دریاچه اَ دیم چو شاگرده متوجه ببنده که ویرشان شیاسه نان اوگورنده. 6عیسی اَجون بوات: «ویراجون ببا و فَریسیون و صَدّوقیون خمیره مایه د دوری بکراه.» 7شاگردِ اِشتن وَر بحثشون بکه و بواتنده: «اَما چما خَمنا نانمون نایرده.» 8امّا عیسی اَمش بزونسشه و اَجون بوات: «ای کم ایمانان، چرا چمه خونین که نان ندارا همدیگرییَم بحث کَرا؟ 9هنوز درک نکرا؟ اَ پنج نان و اَ پنج هزار نفر و چند سَبد مَنتَه غذاعه که جمعرون بکه ویررون نی؟ 10یا اَ هفت نان و اَ چهار هزار نفر و چند سَبد مَنته غذاعه که جمعرون بکه ویررون نی؟ 11پس چرا شَماهون حالی نِبی که از شَما را درباره نان لاوِم نکه؟ فَریسیان و صَدّوقیان خمیر مایه د دوری بِکَراه.» 12اُخُری شاگرده بزونسشونه که عیسی اجون نِواتِه که اِشتن نانه خمیر مایه دور نیا بدارنده، بلکم اجون واتِشه که اِشتن فَریسیان و صَدّوقیانِ تعلیمَ دَ دور نیا بدارنده.
پِطرُس اعتراف کره که عیسی مسیح موعود اِسه
13وختی عیسی آرسسشه قیصریۀ فیلیپی ناحیه، اِشتن شاگردان کودَ آپرسسشه: «مردمهِ وانده انسانه زا کیه؟» 14اَوه جواوشون بِدا: «بَعضی وانده ته یحیای تعمید دهندیش. بعضی نی وانده ته ایلیای پیغمبریش، بعضی نی وانده اِرِمیا یا ای نفر اَز پیغَمبران اِسیش.» 15عیسی آپرسسشه: «شَما چِه وایو؟ شَما وایو از کیم؟» 16شَمعون پِطرُس جواو بدا: «تَه مسیح موعودیش، زنده خدای زا!» 17عیسی بوات: «خُش به حال ته ای شَمعون، یونا زا! چون اَم حقیقته، انسان اِشرا آشکار نِکَردِه، بلکم چِمن په که آسمون دَ اسه اِشراش آشکار بِکَه. 18اَز نی اتَه وام که ته پِطرُسی، یعنی سِگ. و از اَم سِگ سر، چمن کلیسا رچ کَرم و هرگیز مرگ قدرت نتونه کلیسا نابود بکره. 19آسمونه پاتشاهی آچارون اَته دیم. اَ چی ای که زمینَ دَ دِبَندی، آسمون دَ نی دِبَسه بی و اَ چی ای که زمینَ دَ آکری، آسمون دَ نی آبی.» 20اُخُری عیسی اِشتن شاگردونش قدغن بکه که هیچکس را موانده اَو هه مسیح موعود اِسه.
عیسی پیشگویی درباره اشتن مرگ و زنده آبیین
21چو پَش عیسی اِشتن شاگردانش اَم حقیقتش آشکار بِکَه که گَوَن بیشی اورشلیم شهر. بِر شیخون و سران کاهنان و معلمین تورات دستییَم پِر اذیت و آزار وینه و کشتَه بی و سِومین روزَ هنی زنده بی. 22پِطرُس عیسیش ببه ای کنار گوشَه ای و تِندییم بِوات: «دور از اِشته جان، آقا! هِمنَه چی هرگز اِشته سر ما.» 23امّا عیسی آگردسشه پطرس طرف و اجو بِوات: «چَمَنَ دور آبِ ای شیطان، ته چمن راه پیش ایگَتیش تا متونم چمن کاران بکرم، چون اِشته فکره انسانینده نه خدایی.»
24اُخُری عیسی اِشتن شاگردونش بِوات: «اگم کسی بِگَوه چمن پیرو بیبی، اِشتن جانَ دَ گَوَن دس اوگوره، اِشتن عذاب و مرگه صلیبه اوگوره و چمن پش با. 25چون هر که بِگَوه اِشتن جان نجات بیدی، اَجو از دست دی؛ امّا هر که اشتن جان چمن خونین از دست بیدی، هنی اجو بدست آیره. 26انسان را چه فایده داره که تموم دنیا بداره، امّا اِشتن جانه از دَست بیدی؟ یا انسان اِشتن جانه پس ایگَتَنه را چه تونه کَردن؟
27«چون انسان زا اِشتن پِه جلالییم، اِشتن فرشته عون خمنا آ و اُخُری به هر که چو اعماله عوضِ دی. 28حقیقتن، شَمارا وام بعضیه بییا وِندَردِندِه که تا انسان زا مَویننده که اِشتن پاتشاهیه دَ آ، نِمَرنده.
നിലവിൽ തിരഞ്ഞെടുത്തിരിക്കുന്നു:
انجیلِ مَتّی 16: KTT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
@ 2024 Korpu Company
