Aba Levi 5
5
Ivyakwiyipa ivyakupepesezya imbibi
1“ ‘Nanti umuntu akunanga pakubikila ubwakaboni pamaso pa balongi pavintu vivyo akavyennya pamo akavimanya, kokuti umuntu yulayula akwiza pakuba ninongwa.
2“ ‘Pamo nanti umuntu apalamasya ichintu ichinyazu umwakusita kumanya, ngati chinyamana ichifwe chene, pamo ichitekwa, pamo ichinyamana ichakwavula ichifwe, kokuti umuntu yulayula aba munyazu, sona apalaghula inongwa.
3“ ‘Nanti umuntu apalamasya ichintu ichinyazu icha mumubili uwa muntu umwakusita kumanya, loli nanti amanya bulo, kokuti umuntu yulayula apalaghula inongwa. 4Pamo nanti umuntu alapa mwalwe ukuti akwiza pakubomba ichintu chimo, manyi chintu chila chibibi pamo chiza, napapo akulapa umwakusita kumanya, loli nanti amanya bulo, kokuti umuntu yulayula apalaghula inongwa. 5Nanti umuntu apalaghula inongwa pavintu vivyo twavitambula, kokuti ilate ukunanga kwache. 6Pisinda pache umuntu yula ize ni ng'ozi inkolo pamo imbuzi inkolo iya pamudimo wache ukuti chibanje chakwiyipa chakupepesezya imbibi zyache kwa Mwene. Po umuputi akwiza pakubika ichakwiyipa ichakupepesezya imbibi izya muntu yula.
7“ ‘Loli nanti umuntu yula ate ni ng'ozi pamo imbuzi, ize ni nkunda zibili ukuti chibanje chakwiyipa chakupepesezya imbibi zyache kwa Mwene. Inkunda yoka yibanje chakwiyipa ichakupepesezya imbibi, po iyinji yibanje chakwiyipa ichakocha. 8Amupe umuputi inkunda zyosi zibili, po umuputi yula abike tasi inkunda yiyo chakwiyipa ichakupepesezya imbibi. Ayinyonge bulo isingo yache umwakusita ukwefyako umutu wache, 9sona alinyafileko ibanda lyache limo kulubazu loka ulwa chighemo. Loli alikupulile ibanda ilyakusyala muntende umwa chighemo. Ichi cho chakwiyipa ichakupepesezya imbibi. 10Po umuputi yula abike inkunda iyinji yila ukuti chibanje chakwiyipa ichakocha ukuyana nu lulaghilo lwache, po bunubu akwiza pakubika ichakwiyipa ichakupepesezya imbibi izya muntu yula, po imbibi zyache zikwiza pakuhobokeliwa.
11“ ‘Loli nanti umuntu yula ate ni nkunda zibili pamo intozi zibili, ize ni kilogalamu lyoka ilya busu ubutinye ukuti chibanje chakwiyipa ichakupepesezya imbibi zyache. Atakapungulilemo amafuta pamo ukubikamo utwakufukizya utwakununkila, pakuti ichi cho chakwiyipa ichakupepesezya imbibi. 12Amupe umuputi ubusu bula, po umuputi yula atape ichikufi pakuba chikumbusyo ichakuti vyosi vinivi vyabikiwa kwa Mwene. Po akwiza pakuvyocha pachighemo. Ichi cho chakwiyipa ichakupepesezya imbibi. 13Bunubu umuputi akwiza pakubika ichakwiyipa ichakupepesezya imbibi izya muntu yula, po imbibi zyache zikwiza pakuhobokeliwa. Ubusu ubwakusyala bubanje bwa muputi, ukuyana namumo akabombela ni chakwiyipa icha busu.’ ”
Ivyakwiyipa ivyakupepesezya inongwa
14U Mwene akamubuzya u Mozesi akati, 15“Nanti umuntu ananga umwakusita kusubiliwa pakuchinyazya ichintu ichizelu icha Mwene, umuntu yulayula abike kwa Mwene ichakwiyipa ichakupepesezya inongwa zyache. Ichakwiyipa chache abanje we dubi umusita chilema nachimochimo. Umutengo uwa dubi yula ghubanje amashekeli agha siliva ukuyana ni chipimilo icha mu Buzilo Ubuzelu. Ichi cho chakwiyipa ichakupepesezya inongwa. 16Umuntu yula alipile ivintu vivyo akapotwa pakulipila, sona onjelezyepo ichigaba choka pavigaba vyosi fayivi nukumupa vyosi umuputi. Umuputi akwiza pakubika udubi yula ukuti chibanje chakwiyipa ichakupepesezya inongwa iya muntu yula, po akwiza pakuhobokeliwa.
17“Nanti umuntu ananga umwakusita kumanya nukubomba ivintu ivyamwiko pamaso pa Mwene, kokuti apalaghula inongwa, sona afundiwanje. 18Umuntu yula amupe umuputi udubi uwa pamudimo wache umusita chilema nachimochimo, abanje uwa mutengo ghugho ghupimiwe pa chakwiyipa ichakupepesezya inongwa. Po umuputi akwiza pakubika ichakwiyipa ichakupepesezya imbibi izya muntu yula, po imbibi zyache zikwiza pakuhobokeliwa. 19Ichi cho chakwiyipa ichakupepesezya inongwa zizyo umuntu amunangiye u Mwene.”
നിലവിൽ തിരഞ്ഞെടുത്തിരിക്കുന്നു:
Aba Levi 5: LMB2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lambya Bible © Bible Society of Malawi, 2024.