Aba Levi 14
14
Ukuswefiwa ukwa muntu uwa mambombo
1U Mwene akamubuzya u Mozesi akati, 2#Mat. 8.4; Mlko. 1.44; Luk. 5.14, 17.14“Ulu lo lwiho ulwakunena nizya muntu uwa mambombo pisiku ilya kuswefiwa kwache, bo biza nawe ku muputi: 3Umuputi amusendele umuntu yula kuzi ukwa visakasa pakumupima. Po nanti umuntu yula apola amambombo ghache, 4umuputi amulamule umuntu yula ukuti ize ni viyuni iviswepu vibili ivyabumi, poka nu lusamba ulwa mwale nu lupote uluchesamu, ni chisilo pakuba vintu ivyakumuswefezya navyo umuntu yula.” 5Umuputi abalamule abantu bala ukuti bachibolele ichiyuni choka musonta iya mizi agha pambwibwi. 6Po umuputi asende ichiyuni ichinji chila poka nu lusamba ulwa mwale lula nu lupote uluchesamu lula, ni chisilo, nukuvidwibika mwibanda ilya chiyuni, chicho chikaboleliwa pamizi agha mbwibwi ghala. 7Pisinda pache umuputi yula amunyafile akaseveni umuntu yuyo akaswefiwa amambombo nukumunena pakuba muntu muswepu. Po achilekezye ichiyuni ichabumi chila ukuti chibulukile mwisote.
8Umuntu yuyo aswefiwa amambombo achape amenda ghache, amwe isisi zyache, sona oghe, po akuba muntu muswepu. Pisinda pache anginjila muvisakasa, loli ikale kuzi ukwa chisakasa chache amasiku seveni. 9Pisiku ilyaseveni amwe isisi izya kumutu, amwe indevu zyache, ni vikumbi vyache, sona ni sisi zyache zyosi izya mumubili wache. Achape amenda ghache nukogha, po akuba umuntu muswepu.
10Pisiku ilya eyiti, ize nutwana utwadubi tubili utusita chilema nachimochimo nu mwana umukolo uwa ng'ozi weka, umusita chilema nachimochimo, uwa mwaka ghoka nu busu ubwakongannya na mafuta agha misyunguti, sona na mafuta agha misyunguti pakuba chakwiyipa cha busu ubwakukwana ichigaba choka pavigaba vyosi vitatu ivya lita. 11Umuputi yuyo akumunena umuntu yula pakuba muntu muswepu amusendele poka ni chakwiyipa chache pamulyango uwa Chisakasa icha Mwene.
12Po umuputi asende akadubi koka poka na mafuta aghakukwana ichigaba choka pavigaba vyosi vitatu ivya lita ukuti chibanje chakwiyipa ichakupepesezya inongwa. Avizyunguzye mumwanya ukuti chibanje chakwiyipa ichakuzyunguzya mumwanya pamaso pa Mwene. 13Umwana udubi yula amubolele pabuzilo bubo ichakwiyipa ichakupepesezya imbibi ni chakwiyipa ichakocha chikuboleliwapo. Ichakwiyipa ichakupepesezya inongwa chikuba cha muputi, ukuyana namumo ichakwiyipa ichakupepesezya imbibi chikubela. Ichi cho chakwiyipa ichizelu nkani. 14Umuputi asendeko ibanda ilya ichakwiyipa ichakupepesezya inongwa chila nukulipaka kubumalilo ubwa ikutu ilya ndilo ilya muntu yuyo akuswefiwa na pamusumwe uwa ndilo sona na pamusumwe umukulu uwa lwayo ulwa ndilo. 15Po umuputi asendepo ghamo amafuta aghakukwana ichigaba choka pavigaba vyosi vitatu ivya lita nukughapungulila muchikufi chache icha mongo. 16Adwibike akafingwi kache aka ndilo mumafuta ghagho ghali muchikufi chache nukughanyafila akaseveni pamaso pa Mwene. 17Pisinda pache apake amafuta aghakusyala muchikufi chache ghala kubumalilo ubwa ikutu ilya ndilo ilya muntu yuyo akuswefiwa na pamusumwe uwa ndilo sona na pamusumwe umukulu uwa lwayo ulwa ndilo. 18Umuputi aghapungulile amafuta aghakusyala muchikufi chache pamutu uwa muntu yuyo akuswefiwa ukuti chibanje chakwiyipa ichakupepesezya imbibi zyache pamaso pa Mwene.
19Pisinda pache umuputi abike ichakwiyipa ukuti chibanje ichakupepesezya imbibi izya muntu yuyo akuswefiwa umwakuti aswefiwe amambombo ghache. Umuputi abole ichinyamana ukuti chibanje chakwiyipa ichakocha, 20po umuputi abike ichakwiyipa icha busu pachighemo, poka ni chakwiyipa icha busu ukuti chibanje chakwiyipa ichakupepesezya imbibi izya muntu yula, po umuntu yula akuba muntu muswepu.
21Loli nanti umuntu yula mupina umwakuti ate na badubi babili, abike bulo umwana udubi weka ukuti chibanje chakwiyipa ichakupepesezya inongwa zyache ichakuzyunguzya mumwanya, poka nu busu ubwakongannya na mafuta agha misyunguti ukuti chibanje chakwiyipa icha busu, na mafuta aghakukwana ichigaba choka pavigaba vyosi vitatu ivya lita. 22Abike sona intozi zibili pamo inkunda zibili, yoka ukuti chibanje chakwiyipa ichakupepesezya imbibi, iyinji ukuti chibanje chakwiyipa ichakocha.
23Pisiku ilya eyiti ize navyo ku muputi pamulyango uwa Chisakasa pamaso pa Mwene umwakuti umuntu yula aswefiwe. 24Umuputi asende umwana udubi yula uwa chakwiyipa ichakupepesezya inongwa, poka na mafuta agha misyunguti ghala nukuvizyunguzya mumwanya ukuti chibanje chakwiyipa ichakuzyunguzya mumwanya pamaso pa Mwene. 25Po abole umwana udubi uwa chakwiyipa ichakupepesezya inongwa sona asendepo ibanda limo nukulipaka kubumalilo ubwa ikutu ilya ndilo ilya muntu yuyo akuswefiwa na pamusumwe uwa ndilo sona na pamusumwe umukulu uwa lwayo ulwa ndilo. 26Umuputi apungulile ghamo amafuta muchikufi chache icha mongo, 27nukughanyafila na kafingwi kache aka ndilo akaseveni pamaso pa Mwene. 28Amupake ghamo amafuta gha syunguti agha muchikufi chache umuntu yuyo akuswefiwa kubumalilo ubwa ikutu ilya ndilo na pamusumwe uwa ndilo sona na pamusumwe umukulu uwa lwayo ulwa ndilo. 29Apake amafuta aghakusyala muchikufi chache pamutu uwa muntu yuyo akuswefiwa ukuti chibanje chakwiyipa ichakupepesezya imbibi zyache pamaso pa Mwene. 30Po umuntu yula abike intozi pamo inkunda zibili zila zizyo umuntu yula angaba nazyo 31yoka ukuti chibanje chakwiyipa ichakupepesezya imbibi sona iyinji ukuti chibanje chakwiyipa ichakocha poka ni chakwiyipa icha busu. Bunubu umuputi akwiza pakubika ichakwiyipa pamaso pa Mwene ichakupepesezya imbibi izya muntu yuyo akuswefiwa.
32Ulu lo lulaghilo ulwakunena nizya muntu uwa mambombo, sona yuyo atangakwanisya pakubika ichakwiyipa icha bwila na bwila umwakuti aswefiwe.
Nizya chuku ichakoghofya munyumba
33U Mwene akamulamula u Mozesi nu Aloni akati, 34Bo mwinjila mu Kenani, ichisu chicho nkubapa pakuba chinyu, sona nanti nabawisizya ichuku munyumba zyinyu muchisu chicho mukwikalamo, 35umwenecho uwa nyumba abuke pakumubuzya umuputi ukuti, nkwennya ngati po ichuku chighuye munyumba yane. 36Bo umuputi achili nukuchipima ichuku chila, alamule ukuti abantu befyemo ukatundu wesi munyumba yila, umwakuti nachimochimo ichintu icha munyumba mula chineniwanje pakuba chinyazu. Pisinda pache umuputi yula injile munyumba mula pakuyipima. 37Umuputi achipime ichuku chila muvibumba ivya nyumba, nanti agha amabala agha gilini, pamo amachesamile, sona nanti chibiye muvibumba, 38umuputi epemo munyumba mula nukuyighalila inyumba yila amasiku seveni. 39Pisiku ilyaseveni umuputi anyokele kunyumba yila pakuyipima. Nanti ichuku chila chasata muvibumba, 40po umuputi alamule ukuti abantu befyemo amabwe ghene ghagho ghali ni chuku nukughasumbila ku chintuntululu kuzi ukwa akaya akakulu. 41Pisinda pache umuputi ababuzye abantu ukuti bavipale ivibumba, nukulisumbila itope lilyo lyapaliwa ku chintuntululu kuzi ukwa akaya akakulu. 42Po bapyanizyepo na mabwe aghanji, sona basende itope ipya nukuyisingula inyumba yila.
43Nanti ichuku chaboneka sona munyumba mula, bo befyamo amabwe, sona nanti bayipala nukuyisingula, 44umuputi anyokele pakuyipima, po nanti ichuku chila chisatite munyumba mula, kokuti inyumba yila yaba nyazu. 45Ayimongolannye inyumba yila, po asumbile amabwe ghache, ni sondo zyache, sona ni tope lilyo bakasingulila inyumba yila kuchintuntululu kuzi ukwa akaya akakulu nkani.
46Umuntu wesi yuyo akwinjila munyumba bo yighaliliwe, akuba muntu munyazu mupaka pachamabwila. 47Umuntu wesi yuyo akughonamo, pamo akulyela munyumba mula, achape amenda ghache.
48Loli nanti umuputi anyokela pakuyipima inyumba yila nukwagha ukuti ichuku chila chitasatitemo, bo inyumba yila yasinguliwa kale, umuputi ayinene pakuba nyumba inswepu, pachifukwa ichakuti ichuku chamalamo. 49Pakulanjizya ukuti inyumba yila yaswefiwa, umwenecho uwa nyumba ize nu tuyuni tubili nu lusamba ulwa mwale nu lupote uluchesamu, sona ni chisilo. 50Abolele ichiyuni choka musonta mumo muli amizi agha pambwibwi. 51Po asende ulusamba ulwa mwale lula ni chisilo nu lupote uluchesamu ni chiyuni ichabumi chila nukuvidwibika mwibanda ilya chiyuni chicho chikaboleliwa mumizi agha pambwibwi ghala. Po ayinyafile inyumba yila akaseveni. 52Po bunubu umuputi akwiza pakuyiswefya inyumba yila ni banda ilya chiyuni chila na mizi agha pambwibwi ghala ni chiyuni ichabumi chila nu lusamba ulwa mwale ni chisilo sona nu lupote uluchesamu lula. 53Pisinda pache akwiza pakuchibulusizya ichiyuni ichabumi kwisote kuzi ukwa akaya akakulu nkani. Bunubu umuputi akwiza pakubomba ulwiho ulwakuyiswefezya inyumba yila, po yikuba nyumba inswepu.
54Ulu lo lulaghilo ulwakunena nizya muntu yuyo ali na mambombo 55nanti ichuku chawa pamwenda, pamo munyumba 56pamo amapumba pamo ichitufya pamo ibala 57umwakuti mungamanya nanti ichintu chaba chintu ichiswepu pamo chinyazu.
Ulu lo lulaghilo ulwakunena nizya mambombo ni chuku.
നിലവിൽ തിരഞ്ഞെടുത്തിരിക്കുന്നു:
Aba Levi 14: LMB2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lambya Bible © Bible Society of Malawi, 2024.