Aba Levi 11
11
Ivinyamana iviswepu nivinyazu
(Ukk. 14.3-21)
1U Mwene akamubuzya u Mozesi nu Aloni akati, 2“Ubabuzye aba Izilayeli uti, ‘Ivi vyo vinyamana vivyo mungalya pa vinyamana vyosi ivya pachisu ichapasi: 3Mungalya ichinyamana chosi chicho inyayo zyache zigabinkanite pabili, sona chitakubukula.’ ”
4“Vilipo ivinyamana vimo vivyo vikubukula, sona na vivyo inyayo zyabo zigabinkanite pabili, loli abantu batakalyanje ivinyamana vinivi. Napapo ingamila yikubukula, loli inyayo zyache zitagabinkanite pabili. Ingamila cho chinyamana ichinyazu.” 5Upelemende, cho chinyamana ichinyazu, napapo inyayo zyache zitagabinkanite pabili, loli akubukula. 6Ukalulu, cho chinyamana ichinyazu, napapo inyayo zyache zitagabinkanite pabili, loli akubukula. 7Ingulube, cho chinyamana ichinyazu, napapo inyayo zyache zigabinkanite pabili loli chitakubukula, chinichi cho chinyamana ichinyazu. 8Mutakalyanje inyama yache, pamo ukuyipalamasya bulo nanti yifuye, pakuti vinivi vyo vinyamana ivinyazu.
9“Mungalya ivyabumi vyosi ivya mumizi vivyo vili nu mupepe, sona nu tupapa. 10Loli mutakalyanje ivyabumi vyosi ivya munyanja pamo ivya mulusoko vivyo vite nu mupepe sona nu tupapa, pakuti vyo vinyamana ivinyazu. 11Ivyabumi vinivi muvipime pakuba vinyazu. Mutakalyevyo sona mutakavipalamasyanje nanti vifuye. 12Mutakalyanje ivyabumi vyosi ivya mumizi vivyo vite nu mupepe nu tupapa.”
13“Iviyuni vivyo muvipimaye pakuba vinyazu, sona mutakalyanje, pakuti vinyazu vyo ivi: Amakubi na mazwanga ni sisimusi 14na mabimba ni njela izyakulekanalekana 15na bachigobe abakulekanalekana 16ni bututu na masisimusi ni nyangenyange na bakapula abakulekanalekana 17na mazwanga aba mpughulu ni nombo sona na mabimbi aghakulekanalekana 18na mazwanga aghakulekanalekana nu chipungu 19ni nyangenyange, na basele abakulekanalekana, sona nu kasyusyu.”
20Utwakubuluka tosi tuto tukwavula tunyazu. 21Loli mungalya utwakubuluka tosi tuto tuswepu. 22Utwakubuluka tuto mungalya to utu: Umakanta intafu sona ni mpazi. 23Loli utwakubuluka tosi utunji utwakwavula mutupimaye pakuba tunyazu.
24Vilipo ivinyamana vimo vivyo vingabanyazya. Umuntu wesi yuyo akuvipalamasya ivinyamana vinivi nanti vifuye, akuba muntu munyazu mupaka pachamabwila. 25Nanti umuntu aseba bulo ichinyamana ichifwe, achape amenda ghache, sona akuba muntu munyazu mupaka pachamabwila.
26Ichinyamana chosi chicho chili ni nyayo zizyo zigabinkanite pabili, loli zitagabinkanite apinji pamo chitakubukula chinyazu sona umuntu nanti akuchipalamasya akuba muntu munyazu. 27Pa vinyamana vyosi ivya nyayo folo, vivyo vili ni zula, muvipimaye pakuba vinyazu, sona umuntu wesi yuyo akuvipalamasya nanti vifuye, akuba muntu munyazu mupaka pachamabwila. 28Umuntu wesi yuyo aseba ivinyamana vinivi nanti vifuye, achape amenda ghache, sona akuba muntu munyazu mupaka pachamabwila.
29Ivyakwavula vyosi vivyo vinyazu vyo ivi: Udunko ni mbeba nu lubulu nu syololi uwa muzi 30nu syololi uwa munyumba nu lubulu nu sindi sona nu luvwi. 31Muvipimaye ivinyamana vinivi pakuba vinyazu. Umuntu wesi yuyo akuvipalamasya nanti vifuye, akuba muntu munyazu mupaka pachamabwila. 32Nanti choka icha vinyamana vinivi chifuye pamo chawila pa chintu, ichintu chilachila chikuba chinyazu, manyi chikwi manyi mwenda manyi likwela manyi lisaka. Ichintu chinichi muchidwibike mumizi, loli pope bulo chikuba chinyazu mupaka pachamabwila. Pisinda pache chikuba chintu ichiswepu. 33Nanti ichintu chawila musonta, kokuti ichintu chosi musonta mula chikuba chinyazu, po isonta yilayila muyifwantannyanje. 34Nanti amizi agha musonta yila ghakupukila ichakulya, kokuti ichakulya chilachila chikuba chinyazu, sona ichakung'wela chosi chicho chili musonta yila chikuba chinyazu. 35Nanti ichintu ichifwe chawila pachintu chimo, kokuti ichintu chilachila chikuba chinyazu manyi muvuno manyi sonta, vyosi vinivi muvifwantannyanje, pakuti vinyazu. 36Nanti ichintu ichifwe chawila pa mbwibwi pamo muchiziba icha mizi, kokuti amizi ghalaghala ghakuba miza bulo, loli nanti umuntu akuchiseba ichintu ichifwe chila, kokuti umuntu yulayula akuba muntu munyazu. 37Nanti ichintu ichifwe chawila pa mbeyu yiyo abantu bakulonda pakubyala, kokuti imbeyu yilayila yikuba mbeyu swepu. 38Loli nanti imbeyu yila yanyeka na mizi ghalaghala, sona nanti ichintu ichifwe chila chawila pa mbeyu yila, kokuti imbeyu yilayila yikuba nyazu.
39Nanti umuntu achipalamasya ichinyamana ichifwe chene, chicho mwitikiziwe pakulya, kokuti umuntu yulayula akuba muntu munyazu mupaka pachamabwila. 40Nanti umuntu akulya inyama iya chinyamana chinichi, achape amenda ghache, sona akuba muntu munyazu mupaka po pachamabwila. Umuntu wesi yuyo akuseba ichinyamana ichifwe chene chila, achape amenda ghache, sona akuba muntu munyazu mupaka pachamabwila.
41Mutakalyanje ivyabumi vyosi ivyakwavula, pakuti vinyazu. 42Mutakalyanje ivyabumi ivyakwavula manyi vya vinama folo manyi vyakwendela ivinama ivyinji, pakuti vinyazu. 43Mutakinyazyanje mwebene pakulya ivintu vinivi. 44#Lev. 19.2; 1 Pit. 1.16Ane ne Mwene, u Chala winyu. Polelo mwiswefye mwebene pakuba bantu bazelu, pakuti ane ne Muzelu. Mutakinyazyanje mwebene ni vinyamana ivyakwavula. 45Ane ne Mwene, nene nkabefyamo mu Ijiputi, umwakuti imbanje ne Chala winyu. Mubanje mwe bantu bazelu, pakuti ane ne Muzelu.
46Ulu lo lulaghilo ulwakunena nizya vinyamana ni viyuni, ni vyabumi vyosi ivya mumizi, sona na vyosi ivyakwavula. 47Mulesannyanje pakasi pa vintu ivinyazu ni vintu iviswepu, sona na pakasi pavipeliwa pavyabumi vivyo mungalya ni vyabumi vivyo mutangalya.
നിലവിൽ തിരഞ്ഞെടുത്തിരിക്കുന്നു:
Aba Levi 11: LMB2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lambya Bible © Bible Society of Malawi, 2024.