Ubwandilo 50
50
1U Yosefu akisumbila pa muvimba uwa wise bo akulila nukughufyofyonta. 2Po u Yosefu akabalamula abaghanga babo bakamubombelagha ukuti baghuyannye umuvimba uwa wise na malembo. 3Imbombo iyakughuyannya umuvimba na malembo yikasenda masiku 40 ukuyana namumo zikalondeliwanga. Aba Ijiputi bakamulila umuyazi u Yakobo amasiku 70.
4Bo amasiku agha chililo ghamala, u Yosefu akaghabuzya amakambala agha Falabo akati, “Nalamba, mumbuzizyeko u Falabo muti, 5#Ubw. 47.29-31‘Utata wane akandapizya akati, “Ane indi papipi pakufwa. Munsyile mwipumpa lilyo nkikumbila muchisu icha Kenani.” Polelo unyitikizye ukuti imbuke pakumusyila utata wane, po nkwiza pakwiza sona.’ ”
6U Falabo akamwamula akati, “Buka, umusyile ughuso ukuyana namumo akakulapizya.”
7Po u Yosefu akabuka pakumusyila uwise. Amakambala ghosi agha Falabo, poka na bantu abinji abamanyikwe aba mu Ijiputi bakamusindikila u Yosefu, 8poka na bamunyumba iya Yosefu, na bawamwabo, sona na bamunyumba iya wise. Loli abana ni midimo vikasyala mu Gosheni. 9Abantu abakukwela pangolo izya bwite ni falasi bope bakabuka nawe umwakuti kakaba kabukatila akakulu nkani.
10Bo bafika pabuzilo ubwakukomelapo inyinulo ubwa Atadi, kubufumilo bwizuba ubwa Yolodani, bakamulila ni chitima ichikulu nkani. Po kulakula bakakonka inyiho zyabo pakumulila uwise amasiku seveni. 11Bo abenekaya aba muchisu icha Kenani bennya abantu bakulila pa Atadi bakati, “Ichi cho chililo icha ba Ijiputi.” Cho chifukwa ubuzilo bula bakabwita ukuti Abeli Mizilayimu#50.11: Abeli Mizilayimu: Itabwa ili likwivwika ngati ilya mu Chihebeli kokuti, Ukulila ukwa ba Ijiputi. kupipi nu lusoko ulwa Yolodani.
12Po abana aba Yakobo bakabomba vivyo uwise akabalamula. 13#Imbo. 7.16Bakaghunyamula umuvimba wache mupaka kuchisu icha Kenani nukumusyila mwipumpa lilyo likaba mumughunda uwa Makipela, kubufumilo bwizuba ubwa Mamule, mumughunda ghugho u Abulahamu akaghula kwa Efuloni umu Hiti ukuti ghubanje wa mapumpa. 14Bo u Yosefu amusyila uwise, akanyokela kuchisu icha Ijiputi na bakamu bache, sona na bantu bosi babo bakabuka nawe pakumusyila uwise.
U Yosefu akubakazya amoyo abawamwabo
15Bo abakamu aba Yosefu bennya ukuti uwise afwa bakati, “Nkimba buli nanti u Yosefu anda pakutubenga nukubatika pakutanizya pabubibi bubo tukamubombela?” 16Po bakamutumila amazyu u Yosefu aghakuti, “Bo ughuso atafuye akatulaghila 17ukuti, ‘Twalamba, ubahobokele abawamwinyu kububibi bubo bakakunangila.’ Aswe twe bambombo aba Chala uwa ghuso, tukulaba uluhobokelo.” Bo u Yosefu apokela amazyu ghanagha akalila.
18Abawamwabo bakiza nukufughamila pamaso papache, bakati, “Ennya, aswe twe bazya bako.”
19Loli u Yosefu akababuzya akati, “Mutakanyilaye, nkimba ane ne Chala, ne nkubahobokela abantu imbibi? 20Mukabatika ukuti mumbombele ububibi, loli u Chala akabatika ubwiza, ukuti bupoke ubumi ubwa bantu abinji, babo bumi ilelo pachifukwa icha zizyo zikaboneka. 21Polelo mutakanyilaye, nkwiza pakubasungilila poka na bana binyu.” Po akabakazya amoyo abawamwabo nukubasangalusya.
Ubufwe ubwa Yosefu
22U Yosefu akikala muchisu icha Ijiputi poka na bamunyumba iya wise bosi. U Yosefu akafwa bo ali na amaka 110. 23Akaba nubumi mupaka akennya abana aba Efulayimu ni nkulilo iyabutatu, akabennya sona abana aba Makili yuyo akaba mwana wa Manase.
24Po u Yosefu akababuzya abawamwabo akati, “Indi papipi pakufwa; loli u Chala akwiza pa pakubasungilila nukubefyamo muchisu ichi ukubuka kuchisu chicho akamulayizya u Abulahamu nu Yisaki, sona nu Yakobo.” 25#Ukf. 13.19; Yos. 24.32; Heb. 11.22Po u Yosefu akabalapizya abana aba Izilayeli pakulapa ichilapo ukuti, “Bo u Chala akubalongozezya kuchisu chila, mukwiza pakunyamula amafupa ghane pakufuma nagho kuno.”
26Po u Yosefu akafwila muchisu icha Ijiputi, bo ali na maka 110. Bakaghuyanyamula umuvimba wache nukughupaka amalembo nukughubika mubokosi mu Ijiputi.
നിലവിൽ തിരഞ്ഞെടുത്തിരിക്കുന്നു:
Ubwandilo 50: LMB2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lambya Bible © Bible Society of Malawi, 2024.
