Ubwandilo 40
40
U Yosefu akung'anamula ivilota ivya bakayidi
1Bo pachilapo akabalilo, uwakumupa uvinyo nu wakupiya ivibama bakamunangila u mwene wabo uwamu Ijiputi. 2U Falabo akaghakalalila nkani amakambala ghache mabili ghala, uwakumupa uvinyo, sona nu wakupiya ivibama. 3Akabighalila mujela nukubabika munyobe izya musilikali usongo yuyo akalindililagha kunyumba iya mwene yula, mujela mumo u Yosefu akasungiwa. 4Usongo uwa balindilili bala akababika munyobe izya Yosefu ukuti abenelezyanje abantu babili bala. Bakikalamo akabalilo akatali nkani. 5Isiku limo mujele mulamula abantu babili bala, uwakumupa uvinyo nu wakupiya ivibama bakalota ivilota. Wesi akalota ichilota icha ching'anamulo ichakulekanalekana.
6Pandabindabi bo u Yosefu iza pakubennya, akabennya ukuti ivyeni vyabo vyandukite. 7Akabalalusya akati, “Nkimba choni chicho muli ni chitima?”
8Bakamwamula bakati, “Twebosi tulotite ivilota, loli atalipo nayumo yuyo angaving'anamula ivilota vila.”
Po u Yosefu akababuzya akati, “We Chala mwene yuyo angaving'anamula ivilota.”
9Po usongo uwakumupa uvinyo akanda pakumulingannya ichilota chache ukuti, “Nkalota ukuti ikwi ilya mampesya lili pantazi papane, 10loli likaba ni samba zitatu. Bo lyalemba bulo amani, ubwezya bukaboneka, pisinda pache pakaboneka amampesya amatonu. 11Ulubako ulwa Falabo lukaba munyobe yane, po nkasenda amampesya nukufinyila mulubako lula nukumupa u Falabo.”
12Po u Yosefu akamwamula akati, “Ichi cho ching'anamulo icha chilota chako: Isamba zitatu zila gho masiku matatu. 13Bo ghachilapo amasiku matatu u Falabo akwiza pakukufumyamo muno, akwiza pakukuhobokela, sona nukukunyosezya pambombo yako. Ukwiza pakumupa ulubako lwache ngati mumo ukabombelagha kwisinda uko. 14Loli bo vyosi vyanda pakukwendela akiza ukankumbuke. Nalamba umpelele ichisa pakuntambula kabilikabili kwa Falabo umwakuti infume mujele muno. 15Pakuti naloli nkibiwa muchisu icha ba Hebeli, sona na kuno bulo intanangitepo nachimo ichakuti banyighalile nacho mujele.”
16Bo uwakupiya ivibama yula ennya ukuti iching'anamulo icha vilota chila chikaba chiza, wepe akamubuzya u Yosefu akati, “Nane bulo nkalota: Inyamuye pamutu ividudunga vitatu ivya vibama. 17Muchidudunga ichapamwanya nkani mukaba ivyakulya ivya Falabo ivyakulekanalekana, loli iviyuni vikalyanga ivyakulya vila.”
18Po u Yosefu akamwamula akati, “Ichi cho ching'anamulo icha chilota chako: Ividudunga vitatu vila gho masiku matatu. 19Bo ghachilapo amasiku matatu u Falabo akwiza pakukufumya muno, sona akwiza pakukudumula umutu wako. Umuvimba wako akwiza pakughupayika pikwi, sona iviyuni vikwiza pakughulya.”
20Naloli bo ghachilapo amasiku matatu pakaba ulusekelo ulwakupapiwa ukwa Falabo, po u Falabo akaghitizya amakambala ghache ghosi. Akamufumya mujele uwakumupa uvinyo nu wakupiya ivibama yula nukubimika pamaso pa makambala ghache. 21U Falabo akamunyosezya pambombo yache uwakumupa uvinyo yula. 22Loli uwakupiya ivibama yula akamupayika pikwi ukuyana namumo u Yosefu akanenela, bo akusanusya ivilota vyabo vila.
23Loli uwakumupa uvinyo u mwene yula atakamukumbuka u Yosefu nukumuluvizya zila.
നിലവിൽ തിരഞ്ഞെടുത്തിരിക്കുന്നു:
Ubwandilo 40: LMB2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lambya Bible © Bible Society of Malawi, 2024.
