Ubwandilo 35
35
U Chala akumusaya u Yakobo
1 #
Ubw. 28.11-17
U Chala akamubuzya u Yakobo akati, “Nyamuka bukagha ku Beteli nukwikalana kulakula. Kulakula umuzengele ichighemo u Chala yuyo akakubonekela, bo ukumuchimbila umukulu wako u Esabu.”
2Po u Yakobo akababuzya abamunyumba yache, sona na bosi babo bakaba nawe akati, “Tagha utwachala utuyeni tuto muli nato pakasi papinyu. Mwiswefye mwebene, sona muvwalaye amenda aghanji amiza. 3Tukwiza pakwepamo muno nukubuka ku Beteli, kuko nkwiza pakumuzengela ichighemo u Chala, yuyo akanyavwa muntamyo zyane, sona yuyo akaba nane kosi kuko nkabukagha.” 4Po bakamupa u Yakobo utwachala tosi tuto bakaba nato, sona ni ndelebele zizyo bakavwala. U Yakobo akavifukila pasi muntende mwikwi ilya mupandapanda lilyo likaba papipi nu Shekemu.
5Bo u Yakobo na bana bache bakunyamuka, ubogha ubukulu nkani bukabalema abantu bosi aba mutwaya utwakuzyungulila, umwakuti atakabapo nayumo uwakubakonka.
6U Yakobo na bantu bache bosi bakafika mu Luzi (kokuti Beteli) muchisu icha Kenani. 7Kulakula akazenga ichighemo nukubwita ubuzilo bula ukuti Eli Beteli#35.7 Eli Beteli: Kokuti, U Chala uwa Beteli. pachifukwa ichakuti bukaba buzilo bubo u Chala akivumbulila mwene kwa Yakobo, bo akumuchimbila umukulu wache.
8U Debola uwambombo yuyo akamulelagha u Labeka akafwa. Bakamusyila muntende mwikwi ilya mupandapanda mu Beteli mulamula. Po ubuzilo bula bakabwita ukuti Aloni Bakuti#35.8 Aloni Bakuti: Kokuti, Ikwi ilya mupandapanda ilya kulila..
9U Chala akamubonekela sona u Yakobo, bo abwelako ku Mesopotamiya, po akamusaya. 10#Ubw. 32.28Po u Chala akamubuzya akati, “Itabwa lyako we Yakobo, loli ukwanda ilelo ukwiza pakwitiziwanga we Izilayeli.” U Chala akamwita ukuti we Izilayeli.
11U Chala akamubuzya akati, “Ane ne Chala Uwamaka Ghosi. Papa abana abinji, sona inko izya bantu inyinji nkani bakwiza pakufuma mumwako, sona ukwiza pakuba we munyenya uwa bamwene. 12#Ubw. 17.4-8Nkwiza pakukupa nawe ichisu chicho nkamupa u Abulahamu nu Yisaki, nukubapa sona abaluko lwako babo bakwiza pisinda papako.” 13Po u Chala akamuleka u Yakobo pabuzilo bubo akanenagha nawe nukubuka.
14 #
Ubw. 28.18-19
Po u Yakobo akimikapo ibwe pakuba chikumbusyo pabuzilo bubo akanena nawe. Akalipaghula pakulipungulila uvinyo na mafuta agha misyunguti. 15Po u Yakobo akabwita ubuzilo bubo u Chala akanenagha nawe ukuti Beteli#35.15 Beteli: Kokuti, Inyumba iya Chala..
Ubufwe ubwa Lakelo
16Pisinda pache u Yakobo na bamunyumba yache bakepamo mu Beteli. Loli bo bakupalamila kukaya aka Efulati, akabalilo akakuti u Lakelo asayiwe kakakwana, sona akatamiwa nkani ni mpapo yache. 17Po bo ali pakutamiwa nu bubavu ubwa kupapa, umuzamba akamubuzya akati, “Wee Lakelo, utakanyilaye pakuti uyu we mwana umulumendo uyunji.” 18Sona bo umuzimu wache akubuka pakuti akafwa, akamwita umwana wache ukuti we Benoni,#35.18 Benoni: Itabwa ili mu Chihebeli kokuti, Umwana umulumendo uwa chitima chane. loli uwise akamwita ukuti we Benjamini.#35.18 Benjamini: Itabwa ili mu Chihebeli kokuti, Umwana umulumendo yuyo akwiza pakuba nu lusako.
19Bo u Lakelo afwa, akasyiliwa mulubazu ulwa zila iyakubukila ku Efulati kokuti Betelehemu. 20Po u Yakobo akimikapo ibwe pipumpa ilya Lakelo pakuba chikumbusyo. Nilelo bulo ibwe lila lichili lilipo.
21U Yakobo akendelela nu bulendo bwache, nukuzenga ivisakasa vyache kulubazu ulunji ulwa chitembe icha Edeli.
Abana aba Yakobo
(1 Imb. 2.1-2)
22 #
Ubw. 49.4
Bo u Yakobo akwikala muchisu chilachila, u Lubeni akaghona nu Biliha umuchi umuzya uwa wise. Po u Yakobo akazyivwa zinizi. U Yakobo akaba na bana abalumendo 12.
23Abana aba Leya bo aba: U Lubeni ukatote uwa Yakobo nu Simiyoni nu Levi nu Yuda nu Isakala nu Zebuloni. 24Abana aba Lakelo bo aba: U Yosefu nu Benjamini. 25Abana aba Biliha, uwambombo umukolo uwa Lakelo bo aba: U Dani nu Nafutali.
26Abana aba Zilipa, uwambombo umukolo uwa Leya bo aba: U Gadi sona nu Asheli. Banaba bakaba bana aba Yakobo babo bakapapiliwa muchisu icha Mesopotamiya.
Ubufwe ubwa Yisaki
27 #
Ubw. 13.18
U Yakobo akabuka kwa wise u Yisaki ku Mamule, papipi nu Kiliyati Aliba (kokuti Hebuloni), kuko u Abulahamu nu Yisaki bakikalagha kale 28U Yisaki akafwa, bo ali na maka 180. 29Po akafwa nukubikiwa mwipumpa bo mughosi nkani. Po abana bache u Esabu nu Yakobo bakamusyila.
നിലവിൽ തിരഞ്ഞെടുത്തിരിക്കുന്നു:
Ubwandilo 35: LMB2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lambya Bible © Bible Society of Malawi, 2024.
