Ubwandilo 33
33
U Yakobo akukomana nu Esabu
1Bo u Yakobo atalankannya, akamwennya u Esabu akwiza na bantu 400. Po abana bamo akamugabila u Leya, abanji akamugabila u Lakelo sona abanji akabagabila abambombo abalindu babili bala. 2Akabalongolezya abalindu abambombo bache poka na bana babo, po akonka umuchi u Leya na bana bache, pisinda pache pakonka umuchi u Lakelo nu Yosefu. 3Po u Yakobo umwene akalongolela kuntazi nukufughama akaseveni bo akumupalamila umukulu wache u Esabu.
4Loli u Esabu akachimbila pakukomana nawe akamukumbatila nukumukukila. Abantu bosi babili aba bakalilagha. 5Bo u Esabu akutalankannya, akennya abakolo babili poka na bana. Po akabalalusya akati, “Nkimba abantu banaba bawenu?”
U Yakobo akamwamula akati, “Banaba bo bana babo u Chala muchisa chache ampiye.”
6Po abambombo abalindu babili bala na bana babo bakiza pantazi papache nukumufughamilila. 7Pisinda pache wepe u Leya na bana bache, bakamufughamilila. Pabumalilo u Yosefu nu Lakelo bakiza nukumufughamilila.
8U Esabu akalalusya akati, “Nkimba akabukatila aka vitekwa kako nakomana nako kachoni?”
U Yakobo akamula akati, “Mwene wane, vila vyabupi ukuti tuchaghe ichisa pantazi papako.”
9Loli u Esabu akati, “Wee muzuna wane, indi navyo ivyinji. Isungila vivyo uli navyo.”
10U Yakobo wepe akamula pakulambilizya ukuti, “Awe, nanti wampelela ichisa, senda ivyabupi ivi. Nanti nkwennya icheni chako chikuba ngati po nkwennya icheni icha Chala pachifukwa ichakuti wampokela ni nyobe zibili. 11Nalamba pokela ivyabupi vivyo niza navyo, pakuti u Chala ampelela ichisa, sona ampa ivyakusobelwa vyane vyosi.” U Yakobo akamulambilizya nkani u Esabu, mupaka pabumalilo akatonta nukupokela.
12Po u Esabu akati, “Zagha tubukaye, ane nkwiza pakulongolela.”
13Loli u Yakobo akati, “Wee mwene wane, uzimenye ukuti abana aba balita, sona imbaghiye pakuzisungilila ing'ozi ni ng'ombe zizyo zili na bana. Nanti navivulunga nkani nukwenda napapo lisiku lyoka, vyosi vikwiza pakufwa. 14Wee mwene wane, nalamba longolela, po nkwiza pakukonka panandipanandi kwisinda ukwa vitekwa vyane na bana bane mupaka nkwaghe mu Seyili.”
15Po u Esabu akati, “Unyitikizye ukuti nkulekele abantu bane bamo.”
Loli u Yakobo akamwamula akati, “Awe mwene wane, nkimba bangalondiwa ba choni? Chene chicho nalondagha ichakuti umpelele ichisa.”
16Po pisiku lilalila u Esabu akanyamuka nu bulendo bwache ubwakubwela kukaya aka Seyili. 17Loli u Yakobo akabuka kukaya aka Sukoti, nukuzenga inyumba yache ni vibagha ivya vitekwa vyache. Ichi cho chifukwa ubuzilo bula bukwitiziwa ukuti Sukoti.#33.17 Sukoti: Itabwa ili mu Chihebeli kokuti, Ivisakasa.
18U Yakobo akafika akiza nkani muchisu icha Kenani, pabulendo bwache ubwakufuma ku Mesopotamiya. Akazenga ivisakasa vyache pabuzilo bumo ubwakwenannya nakaya akakulu nkani aka Shekemu. 19#Yos. 24.32; Yoh. 4.5Akaghula umughunda ghula kubaluko ulwa Hamoli uwise uwa Shekemu ni ndalama izya isalabazya izya siliva 100. 20Palapala akazengapo chighemo nukuchita ukuti Eli Elohi Izilayeli chicho chikung'anamula ukuti u Chala, we Chala uwa Izilayeli.
നിലവിൽ തിരഞ്ഞെടുത്തിരിക്കുന്നു:
Ubwandilo 33: LMB2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lambya Bible © Bible Society of Malawi, 2024.
