Ukufuma 8
8
Ichiwaya icha bachula
1Po u Mwene akamubuzya u Mozesi akati, “Buka kwa Falabo umubuzye uti, u Mwene akuti, ‘Ubitikizye abantu bane ukuti babukaye, umwakuti banganyiputa. 2Nanti ukukana ukuti babukaye, nkwiza pakuchifunda ichisu chako chosi pakuchizuzya na bachula. 3Ulusoko ulwa Nayilo lukwiza pakwizula na bachula, umwakuti bakwiza pakwepamo mulusoko nukwinjila munyumba yako na muchipinda chako, mupaka nukukwela pachitala chako. Bakwiza pakwinjila na munyumba izya makambala ghako, nizya bantu bako, sona nu buzilo bosi ubwakupiyilapo nu bwakupiyilapo ivibama. 4Abachula banaba bakwiza pakukukwelakwela awe na bantu bako, sona na makambala ghako.’ ”
5Po u Mwene akamubuzya sona u Mozesi akati, “Mulamule u Aloni ukuti, ‘Sontezya indisa yako pa soko ni viziba, sona nu tusoko tosi, umwakuti abachula bepemo mumizi nukuchizuzya ichisu icha Ijiputi.’ ”
6U Aloni akasontezya indisa yache pamizi. Po abachula bakepamo mumizi nukuchizuzya ichisu icha Ijiputi. 7Loli abamayele bala bakabomba bunubu, bope bakabapela abachula ukuti bepemo mumizi nukuchizuzya ichisu icha Ijiputi.
8U Falabo akamwitizya u Mozesi nu Aloni nukuti, “Iputa kwa Mwene ukuti efyeko abachula kukwane na ku bantu bane, po nkwiza pakubitikizya abantu bako ukuti babukaye pakubika ivyakwiyipa kwa Mwene.”
9U Mozesi akamula akati, “Wee mwene, mbuzya bulo akabalilo akakuti nkwiputile, awe na makambala ghako, sona na bantu bako, umwakuti abachula banaba baleke pakubatamya, sona nukuti bepemo na munyumba yako nukusyalikila bulo mulusoko ulwa Nayilo.”
10U Falabo akamula akati, “Indabi.”
U Mozesi akati, “Nkwiza pakubomba vivyo walaba. Polelo awe ukwiza pakumanya ukuti atalipo u Chala uyunji uwakuyana nu Mwene, u Chala witu. 11Abachula banaba bakwiza pakwepamo munyumba yako, na munyumba izya makambala ghako, sona na munyumba izya bantu bako. Loli bakwiza pakusyalikila bulo mulusoko ulwa Nayilo.”
12U Mozesi nu Aloni bakepapo pamaso pa Falabo, po u Mozesi akiputa kwa Mwene ukuti abachula bala baleke pakumutamya u Falabo. 13U Mwene akabomba zizyo u Mozesi akamulaba, po abachula bosi babo bakaba munyumba, na mulubinjilo, sona na mumaghunda bakafwa. 14Aba Ijiputi bakababungannya abachula bala muvibunga, umwakuti ichisu chosi chikanunka nkani pachifukwa icha bachula bala. 15Loli bo u Falabo ennya ukuti abachula bala bafwa, pope bulo umoyo wache ghukaba mukafu nkani ukuyana namumo u Mwene akanenela, umwakuti atakamuteghelezya u Mozesi nu Aloni.
Ichiwaya icha tusyakuku
16Po u Mwene akamubuzya u Mozesi akati, “Mulamule u Aloni ukuti akome palufumbi ni ndisa yache, po ulufumbi lula lukwiza pakwanduka tusyakuku muchisu chosi icha Ijiputi.” 17Po u Mozesi nu Aloni bakabomba bunubo, ulufumbi ulwa muchisu chosi icha Ijiputi lukanduka tusyakuku. Utusyakuku tunutu tukaba posi na posi mumabili agha bantu, namu vinyamana bulo. 18Abamayele bope bakayezya pakubombezya amayele ghabo ukuti bapele utusyakuku, loli bakapotwa, pakuti utusyakuku tula tukaba posi na posi.
19 #
Luk. 11.20
Abamayele bala bakamubuzya u Falabo bakati, “Agha gho maka agha Chala.” Pope bulo umoyo uwa Falabo ghukaba mukafu nkani, ukuyana namumo u Mwene akanenela, umwakuti atakamuteghelezya u Mozesi nu Aloni.
Ichiwaya icha mbwele
20Po u Mwene akamulamula u Mozesi akati, “Pandabindabi kakomane nu Falabo, bo akubuka kulusoko. Mulamule ukuti u Mwene ati, ‘Ubitikizye abantu bane ukuti babukaye, umwakuti banganyiputa. 21Nanti ukukana, nkwiza pakukutumila imbwele inyinji nkani, awe na makambala ghako na bantu bako. Imbwele zinizi zikwiza pakwizula munyumba zyinyu, sona zikwiza pakuba posi na posi mu Ijiputi.
22“ ‘Loli pisiku lilalila ntakwiza pakuchipalamasya ichigaba icha Gosheni kuko abantu bane bakwikala, umwakuti kutakabeko imbwele. Po ukwiza pakummanya ane ukuti ne Mwene uwa chisu chosi ichapasi. 23Nkwiza pakubika ukulekana pakasi pabantu bane na bantu bako. Ichiswigho chinichi chikwiza pakubombiwa indabi.’ ”
24U Mwene akabomba zizyo akanena, po imbwele inyinji nkani zikinjila munyumba iya Falabo, na munyumba izya makambala ghache. Imbwele zila zikaba posi na posi mu Ijiputi. Po ichisu chosi icha Ijiputi chikananganika pachifukwa icha mbwele zila.
25U Falabo akamwitizya u Mozesi nu Aloni nukuti, “Bukagha pakubika ivyakwiyipa kwa Chala winyu, loli muchisu chinichi.”
26U Mozesi akamula akati, “Chitangaba chiza napo panandi pakuti ivyakwiyipa vivyo tukubika kwa Mwene u Chala witu vingaba vyamwiko pamaso paba Ijiputi. Nanti tukubika ivyakwiyipa vivyo vingaba vyamwiko pamaso paba Ijiputi, nkimba batangatusumba na mabwe? 27Tubaghiye pakwenda ubulendo ubwa masiku matatu munkolongo pakubika ivyakwiyipa kwa Mwene u Chala witu, ukuyana namumo akatulamulila.” 28U Falabo akati, “Nkwiza pakubitikizya ukuti mubukaye pakubika ivyakwiyipa kwa Mwene u Chala winyu munkolongo, loli mutakabukaye kubutali nkani. Po munyiputile.”
29U Mozesi akati, “Bo nepapo pamaso papako, nkwiza pakukwiputila kwa Mwene ukuti indabi imbwele zileke pakukutamya, awe na makambala ghako, sona na bantu bako. Loli utakatuzimbulaye sona pakubakanizya abantu ukuti babukaye pakubika ivyakwiyipa kwa Mwene.”
30Bo u Mozesi epapo pamaso pa Falabo, akiputa kwa Mwene. 31Po u Mwene akabomba zizyo u Mozesi akamulaba. Akefya imbwele zyosi zizyo zikamutamyanga u Falabo, na makambala ghache, sona na bantu bache. Nalumolumo ulubwele lulo lukasyalikilapo. 32Loli pope bulo umoyo uwa Falabo ghukaba mukafu nkani, sona atakabitikizya abantu bala ukuti babukaye.
നിലവിൽ തിരഞ്ഞെടുത്തിരിക്കുന്നു:
Ukufuma 8: LMB2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lambya Bible © Bible Society of Malawi, 2024.
