Ukufuma 39
39
Ukusona inkazo izya baputi
(Ukf. 28.1-14)
1Bakasona amenda amiza nkani agha buluu na machesamile sona na machesamu pakuba menda agha muputi, bo akubomba mu Buzilo Ubuzelu. Bakamusonela u Aloni amenda amapaghuliwa ukuyana namumo u Mwene akamulamulila u Mozesi.
2Bakabombezya akiza nkani u efodi uwa golide uwa mwenda umutonte uwa buluu nu muchesamile sona nu muchesamu, vinivi vikasoniwa nabafundi abenecho. 3Bakatiza nkani utwela utwa golide pakuba tupapate nukuluka nu buzi ubwa buluu nu buchesamile, sona nu buzi ubuchesamu sona numwenda umutonte. 4Bakasona pa efodi utwenda tubili ututonte pavipunko, tuto tukasoneleliwa munkuto zyache zibili. 5Bakasona sona ulamba umulabannye uwa mwenda umutonte uwa buluu nu muchesamile, sona nu muchesamu, yuyo apangiwe akiza nkani ukuti apinyililiwe ku efodi umwakuti ghukaba mwenda ghoka ukuyana namumo u Mwene akamulamulila u Mozesi. 6Bakayannya amabwe agha onikisi nukughabika muvyakubikilamo ivya golide, nukubizapo amatabwa agha bana aba Izilayeli. 7Bakaghasonelela mutwenda utwa efodi pavipunko pakwimilila inko 12 izya ba Izilayeli, ukuyana namumo u Mwene akamulamulila u Mozesi.
Ukusona icha pachifuba
(Ukf. 28.15-30)
8Bakasona akiza nkani akanyambi akakuvwala pachifuba. Bakasona ukuyana namumo bakusonela u efodi uwa mwenda umutonte uwa golide, nuwa buluu nu muchesamile nu muchesamu, yuyo alukiwe akiza nkani. 9Kanaka ubukulu bwache bukayana bulo nu mwenda, ghugho wapetekiwa kabili, mubutali ghukaba amasentimita 22, sona mububaba ghukaba amasentimita 22. 10Bakasonelamo imizele folo iya mabwe aghamutengo. Mumuzele uwakwanda bakabikamo utumabwe utwamutengo utwa lubi nutwa topazi sona nutwa galaneti. 11Mumuzele uwabubili bakabikamo amabwe agha emeladi nagha safile sona nagha dayimondi. 12Mumuzele uwabutatu bakabikamo utumabwe utwamutengo utwa yakinti, nutwa agate, sona nutwa ametisiti. 13Mumuzele uwafolo bakabikamo utumabwe utwamutengo utwa belili nutwa onikisi sona nutwa yasipala. Bakatubika utumabwe tunutu muvyakubikamo ivya golide. 14Utumabwe tunutu tukabapo 12 ukuyana na matabwa agha bana aba Yakobo. Pibwe lyoka bakabizapo itabwa lyoka ilya luko ulwa Izilayeli. 15Bakachipangila icha pachifuba iminyololo iya golide umwenecho, yiyo yili ngati mpote. 16Bakapanga ivyakubikamo ivya golide vibili, ni mpete zibili izya golide nukuzipinyilila kunkuto izya mumwanya izya akakuvwala akapachifuba. 17Bakapinyilila iminyololo mibili iya golide yila kumpete zibili zila kunkuto izya akakuvwala akapachifuba. 18Upinyilile ubumalilo bubili ubunji ubwa minyololo ku vyakubikilamo amabwe vibili ivya pavipunko vila, vivyo vili kuntazi kwa efodi. 19Bakapanga impete zibili izya golide, po bakazipinyilila muntende kunkuto izya akakuvwala akapachifuba mulubazu ulwa mukasi papipi nu efodi. 20Bakapanga impete izinji zibili izya golide, po bakazipinyilila muntende kuntazi ukwa twenda tubili utwa efodi pavipunko kupipi nu busone pamwanya pa lamba uwakulukiwa akiza nkani yula. 21Bakapinyilila impete izya akakuvwala akapachifuba kumpete izya efodi ni mpote izya buluu umwakuti akakuvwala akapachifuba kakaba pamwanya palamba ukuti katakazebaye, ukuyana namumo u Mwene akamulamulila u Mozesi.
Ukusona amenda aghanji agha buputi
(Ukf. 28.31-43)
22Bakasona inkazo iya efodi iya mwenda uwa buluu umwenecho. 23Inkazo yiniyi yikaba nu bwazi ubwakwinjizyamo umutu, ghugho ghukasoniwa na kamwenda akakupeteka mulubazu lwache umwakuti ghutakazepukaye. 24Ukuzyungulila mubupeteke muntende munkazo yila, bakalabannyamo ni vifwani ivya vikomwa ivya manyele agha buluu, na machesamile, sona na machesamu nu twa belu utwa golide pakasi, ukuyana namumo u Mwene akamulamulila u Mozesi. 25Bakapanga utwa belu utwa golide umwenecho pakasi pa vifwani vila nukuvisonelela umwakuzyungulila. 26Umwakuzyungulila mubupeteke bosi bula bakabikamo amanyele agha buluu na machesamile na machesamu naka belu aka golide, ngati mumo u Mwene akamulamulila u Mozesi. 27Bakamusonela u Aloni na bana bache amalaya amantonte, ghagho ghakasoniwa akiza nkani. 28Bakamusonela sona impumpu iya mwenda umutonte nu lamba umutonte, sona na bakabuntu abatonte abakusoniwa akiza nkani. 29Bakapanga sona ulamba umutonte yuyo alabiwe akiza nkani uwa mwenda uwa buluu nu muchesamile, sona nu muchesamu ukuyana namumo u Mwene akamulamulila u Mozesi. 30Bakapanga imbale iya mpumpu izelu iya golide umwenecho, po bakabizapo amazyu aghakuti, “Yapaghuliliwa kwa Mwene.” 31Bakakapinya kuntazi ukwa mpumpu nu lupote ulwa buluu, ukuyana namumo u Mwene akamulamulila u Mozesi.
Ukumalizya imbombo
(Ukf. 35.10-19)
32Po imbombo yosi iyakuzenga Ichisakasa icha Mwene yikamala. Aba Izilayeli bakabomba vyosi ukuyana namumo u Mwene akamulamulila u Mozesi. 33Po bakiza nacho kwa Mozesi, poka ni vibombelo vyache vyosi nu tulemelo na mafulemu ni ntatikilo ni mpanda sona nubwikalilo bwache 34na makwela agha dubi amadwibike mu inki inchesamu nagha mbuzi aghakuvwinkila na menda aghakuzighila 35ni Bokosi ilya Lufingo na makwi aghakunyamulila sona ni chikupikizyo chache 36ni tebulo poka ni vibombelo vyache vyosi sona ni chibama ichakupeghiwa kwa Chala 37ni chakubikapo inyale icha golide umwenecho ni nyale poka ni vibombelo vyache vyosi sona na mafuta agha nyale 38ni chighemo icha golide na mafuta aghakupakazya nu twakufukizya utwakununkila, sona nu mwenda uwakuzighila pamulyango uwa Chisakasa 39ni chighemo icha mukuba ni chakupembelapo umoto icha mukuba na makwi ghache aghakunyamulila sona ni vibombelo vyache vyosi ni beseni ilyakusukusulila, poka nu bwikalilo bwache 40na menda aghakuzighila pabalaza ni mpanda zyache poka nu bwikalilo bwache nu mwenda uwakuzighila pamulyango uwa pabalaza poka ninkusa zyache nu tukwi utusongole sona ni vibombelo vyosi ivyakuzengela Ichisakasa 41na menda aghakulukiwa akiza nkani ghagho abaputi bavwalaye, bo bakubomba mu Buzilo Ubuzelu. Ghanagha gho menda agha muputi u Aloni na bana bache. 42Aba Izilayeli bakabomba imbombo yosi ukuyana namumo u Mwene akamulamulila u Mozesi. 43U Mozesi akendela imbombo yosi yiyo bakabomba nukwagha ukuti bakabomba vyosi ukuyana namumo u Mwene akamulamulila, po u Mozesi akabasaya.
നിലവിൽ തിരഞ്ഞെടുത്തിരിക്കുന്നു:
Ukufuma 39: LMB2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lambya Bible © Bible Society of Malawi, 2024.
