Ukufuma 1
1
Aba Izilayeli bakuyiviwa mu Ijiputi
1 #
Ubw. 46.8-27
Abana aba Yakobo babo bakabuka muchisu icha Ijiputi poka nu wise sona na bamunyumba yache bakaba bo aba: 2U Lubeni nu Simiyoni nu Levi nu Yuda 3nu Isakala nu Zebuloni nu Benjamini 4nu Dani nu Nafutali nu Gadi sona nu Asheli. 5Ubwinji bosi ubwa abaluko ulwa Yakobo bukaba 70. Umwana wache u Yosefu akaba ukuti ali kale mu Ijiputi.
6Pisinda pache u Yosefu na bawamwabo bosi poka na bankulilo yila bakafwa. 7#Imbo. 7.17Loli abaluko lwabo, aba Izilayeli bakapapana nkani sona bakaba binji, na bamaka, umwakuti bakizulana posi na posi muchisu icha Ijiputi.
8 #
Imbo. 7.18
Po u mwene umupya yuyo atakazimanyapo nizya Yosefu akanda pakulaghila muchisu icha Ijiputi. 9Akababuzya abantu bache akati, “Ennya aba Izilayeli banaba, baba binji nkani, na bamaka ukutuchila aswe sona bakutoghofya. 10Polelo aswe tubombe nabo zimo. #Imbo. 7.19Tubachevye ukuti batakabale sona, umwakuti nanti ubwite bwanda batakize babanje poka na balwani bitu ukuti balwe naswe nukuchimbilamo muchisu.”
11Po aba Ijiputi bakabika abakapitawa pakubabombezya imbombo inkafu nkani. Aba Izilayeli bakamuzengela u Falabo utwaya utukulu nkani utwa Pitomu nu Lamesesi, kuko aba Ijiputi bakasungaghako ivyakulya vyabo. 12Napapo aba Ijiputi bakababombezyanga nkani aba Izilayeli, loli aba Izilayeli bakabalagha nkani, sona bakasata posi na posi muchisu chosi, 13sona bakababombezyanga nkani imbombo iya buzya. 14Ubumi ubwa ba Izilayeli bukaba bwakubaba pachifukwa icha mbombo inkafu iyakukoma injelwa ni mbombo izyakulekanalekana izya mumaghunda. Aba Ijiputi bakabafyengagha bulo pakubomba imbombo ukwa kabalilo akatali nkani.
15U mwene uwa Ijiputi akababuzya abazamba aba Chihebeli babo bakapapizyanga abakolo, babo bakaba we Shifula nu Puwa akati, 16“Bo mukubapapizya abakolo aba Chihebeli mubenelezye nkani, nanti mwana mulumendo, mumughoghe, loli nanti mwana mulindu mumuleke mumi.” 17Loli abazamba bala bakaba bakumunyila u Chala, po batakabomba zizyo u mwene yula akababuzya ukuti babombe, po bakabaleka abana abalumendo bumi. 18Po u mwene yula akabitizya abazamba bala nukubalalusya ukuti, “Nkimba choni chicho mukubomba bunubu? Nkimba choni chicho mukubaleka abana abalumendo bumi?”
19Abazamba bala bakamwamula bakati, “Abakolo aba Chihebeli batayanite na bakolo aba Ijiputi. Abene bamaka, bo umuzamba atafikite, ukwagha ukuti umwana apapiwe kale.”
20Po u Chala akabapelela ichisa abazamba bala umwakuti aba Izilayeli bakonjelela nukuba bamaka nkani. 21Pachifukwa ichakuti abazamba bala bakaba bakumunyila u Chala, u Chala akabapa abana ababo na babo. 22#Imbo. 7.19Po u Falabo akabalamula abantu bache akati, “Ubonda wesi ukatote umulumendo umu Hebeli mumusumbilaye mulusoko ulwa Nayilo, loli mubaleke ababonda bosi abalindu bumi.”
നിലവിൽ തിരഞ്ഞെടുത്തിരിക്കുന്നു:
Ukufuma 1: LMB2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Lambya Bible © Bible Society of Malawi, 2024.
