Ап. керӧммез 14
14
1Иконияын Павел Варнавакӧт пырисӧ синагогаӧ да висьтасисӧ Бур Юӧрсӧ. Висьтасьӧмныссянь иудейез да мӧдік отир ӧддьӧн унаӧн пондісӧ веритны. 2Сэтӧн вӧлісӧ иудейез, кӧдна эзӧ веритӧ. Нія ентӧдтӧм йӧзсӧ ызйӧтісӧ лэбтісьны веритіссес вылӧ. 3Апостоллэс дыркодь вӧлісӧ сэтӧн. Повтӧг висьтасисӧ Дӧсвидзись йылісь. Дӧсвидзисьыс ны пыр аркмӧтіс пассэсӧ да адззывлытӧммесӧ. Сідз Сія вынсьӧтіс висьтасьӧмсӧ Аслас бурсетӧм йылісь.
4Отирыс карас янсӧтчисӧ: ӧтіккез вӧлісӧ иудейез дор, а мӧдіккез ─ апостоллэз дор. 5Иудейес веськӧтліссезныскӧт да мӧдік йӧзкӧт лӧсьӧтчисӧ уськӧтчыны апостоллэс вылӧ. Нійӧ мӧдісӧ умӧльтны да шупкавны иззэзӧн. 6Апостоллэс эта йылісь кылісӧ да сэтісь пышшисӧ. Нія локтісӧ Ликаония муӧ. Сэтчин Листра, Дервия каррезын да сы гӧгӧр муэзын 7висьтасисӧ Бур Юӧрсӧ.
Павел да Варнава Листраын да Дервияын
8Листраас вӧлі коккезнас шогалісь морт. Сія шогмӧмсянь абу вермӧм ветлӧтны. 9Мортыс кывзіс Павеллісь баитӧмсӧ. Павелыс видзӧтӧв-керис сы вылӧ да казяліс: мортыслӧн эм веритӧмыс, медбы веськавны. 10Павелыс горӧн висьталіс: «Тэныт шуа: Дӧсвидзись Кристос Исус нимӧн сувт аслат коккез вылӧ». Сія чепӧссис-чеччис да пондіс ветлӧтны.
11Отирыс адззылісӧ лоӧмсӧ. Нія горӧн пондісӧ баитны ликаония кыв вылын: «Еннэс морттэз моз лэдзчисӧ миян дынӧ». 12Варнавасӧ шуисӧ Зевсӧн, а Павелсӧ шуисӧ Ермийӧн сійӧн, мыля сія унажык висьтасис кывсӧ. 13Карӧ пыранінас вӧлӧм Зевс енлӧ юрбитанін. Зевсыслӧ езъялансӧ ваялісьыс сэтчӧ вайӧтӧм пороззэзӧс да вайӧм юркытшшез. Ӧтлаын отиркӧт сія мӧдӧм вайны езъялан козин апостоллэслӧ.
14Апостоллэс кылісӧ эта йылісь. Варнава да Павел косялісӧ ассиныс паськӧмнысӧ да уськӧтчисӧ отирыс коласӧ. Апостоллэс горӧтӧмӧн висьталісӧ: 15«Мый тійӧ керат? Мийӧ эд тіян кодьӧсь жӧ морттэз. Бур Юӧр мийӧ тіянлӧ висьтасям, медбы тійӧ ковтӧм еннэзныт дынісь бергӧтчитӧ ловья Енлань. Сія аркмӧтіс енӧжсӧ мунас, саридзсӧ да быдӧс ны пытшкисьсӧ. 16Сія одзза каддэзӧ олісь отирпӧлӧссӧ быдӧннысӧ лэдзис ветлӧтны асланыс туйезӧт. 17Но Еныс эта коста эз дугдыв висьтасьны отирыслӧ Ас йывсис бурсӧ керӧммез пыр: енӧжсянь зэр сетӧмӧн, нянь да карч воӧмӧн, сёянӧн вердӧмӧн да гажнас сьӧлӧммезнымӧс тыртӧмӧн». 18Сідз баитӧмнаныс нія ӧдва вермисӧ ӧвны отирсӧ, эзӧ лэдзӧ вайны нылӧ езъялан козинсӧ. Нія быдӧннысӧ тшӧктісӧ мунны горттэзӧ.
Павел да Варнава кольччисӧ Листраас да велӧтісӧ отирсӧ. 19Апостоллэз повтӧг висьтасисӧ Бур Юӧрсӧ. Сы коста Антиокия да Икония каррезісь локтісӧ иудейез. Нія велӧтісӧ отирсӧ янсӧтчыны апостоллэс дынісь. Иудейес висьталісӧ: «Нылӧн баитӧмыс абу быль, нія бӧбӧтчӧны». Иудейес ызйӧтісӧ отирсӧ лэбтісьны апостоллэс вылӧ. Павелсӧ шупкалісӧ иззэзӧн. Сэсся кыскисӧ кар сайӧ, чайтісӧ кулӧмӧн да. 20Но кӧр велӧтчиссес ӧксисӧ Павел гӧгӧрӧ, сія чеччис да пырис карас. Мӧд лунас Варнавакӧт сія муніс Дервияӧ. 21И сія карын нія висьтасисӧ Бур Юӧрсӧ. Сэтӧн адззисӧ уна виль велӧтчисьӧс.
Сирияись Антиокияӧ бертӧм
Сэсся Павел да Варнава бӧра мунісӧ Листра, Икония да Антиокия каррезӧт. 22Сэтчинісь веритіссесӧ нія вынсьӧтісӧ, велӧтісӧ нійӧ видзсьыны веритӧмас. Нія висьталісӧ: «Уна пессьӧм-мырсьӧм пыр эд колас мунны, медбы пырны Енлӧн Юраланінӧ». 23Быд вичкуын нія сувтӧтісӧ веськӧтліссезӧс. Кӧслуналӧм да кеймӧм бӧрын веритіссес сетісӧ нійӧ Дӧсвидзись киӧ. Сылӧ эд нія и пондісӧ веритны.
24Сэсся Писидия муӧт мунӧм бӧрын локтісӧ Памфилия муӧ. 25Пергия карын Бур Юӧрсӧ висьтасьӧм бӧрсянь лэдзчисӧ Атталияӧ. 26Сэсся бертісӧ Антиокия карӧ. Сэтчинсянь и иньдылӧмась вӧлі нійӧ воннэзныс Еныс отсӧтӧн керны уджсӧ. Ӧні сія уджыс керсис. 27Сэтчин локтӧм бӧрын ӧктісӧ вичкусӧ. Нія висьтасисӧ быдӧс, мый ны пыр аркмӧтіс Еныс да кыдз мӧдік отирыслӧ осьтіс ыбӧссӧ веритӧмас. 28Сэтӧн Павел да Варнава дыркодь олісӧ ӧтлаын велӧтчиссескӧт.
Ерусалимын ӧксьӧм коста баитчӧм
നിലവിൽ തിരഞ്ഞെടുത്തിരിക്കുന്നു:
Ап. керӧммез 14: БЮ19
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
