Roma 4
4
1Kiki mumu yatijowe kukita Ibrahim, dadi witu wa palongolo kwa ndingo wa nyama akolili? 2Pakuya wona Ibrahim akagolosiki kipitile pa makitiko, ayii nakyo kyakulumba; koma nukuya kwa Mulungu. 3Pakuya kiki lijowa lilembo? Ni Ibrahim akankeliti Mulungu, ni kuwalangiki kwake kugoloka. 4Leka kwa yula wakukita, njombe yiwalangiki lepa kwa ndingo wa neema, koma kwa ndingo wa nsigilo. 5Koma kwa yula alema kuhenga, leka akela pa yula wakugolosa mbifu, kiyitakiso kyake kiwalangiki kugoloka. 6Ngati umu Daudi kawili akampili kihomo mundu, kwa yula Mulungu ambalangila ugolofu pangali makitiko,
7Wanya kihomo wala mahoko gawe gatutuwusiki,
Ni sambi syawe sifunakaliki.
8Anya kihomo mundu yula Bambo yambalange wangali sambi.
9Kihomo iki mumu kiyii pa kusilimuka, pangi pangali kusilimuka kawili? pakuya tijowa, Kwa Ibrahim kiyitakiso kyake kiwalangiki kwa ugolofu. 10Kikawalangiki mumu wuli? pala akayili pa kusilimuka, pangi pangali kusilimuka? Nukuya pa kusilimuka, koma pangali kusilimuka: ni akakiyupiti kiwalalilo kya kusilimuka, 11kya kukomalela kya ugolofu wa kiyitakiso kila akayili nakyo pangali kusilimuka: nausi aye dadi wa woha awa wakela, haka wayii pangali kusilimuka, kukita kugoloka kuwawalangile; 12nu dadi wa kusilimuka kwa wombe wala nukuya wa kusilimuka wakape, koma wa wala kawili wagenda pa njayo sya kiyitakiso kya dadi witu Ibrahim, kila akayili nakyo pangali kusilimuka. 13Pakuya nukuya kipitile pa torah kikayili kilago kwa Ibrahim ni mbeyu yake, kukita aye wakuyingila lipwela lya ndima woha, koma kipitile pa ugolofu wake kiyitakiso. 14Pakuya wona wala wa torah wayingila lipwela, kiyitakiso kikitiki kya waka, ni kilago kiwusiki: pakuya torah yihengela kudada; 15koma pala pa waka torah, kwipatukila pa waka kawili. 16Kwa ndawa iyi kiyii kipitile pa kiyitakiso, nausi kiye kwa ndingo wa neema; kukita kilago kikangamasike kwa mbeyu yoha; nukuya kwa yila yakape ya torah, koma kwa yila kawili ya kiyitakiso kya Ibrahim, 17uyu ayii dadi wa tenga tawoha, (umu yilembekili, Dadi wa wa mihuku mingi nikuwikiti) palongolo pa yula uyu akankeliti, yuyu Mulungu, wakulamisa wakufwa, akemela fila fyakona fyangaya ngati fila fiyii. 18Yula akakeliti pa kihuwalilo kupindika kihuwalilo, nausi aye dadi wa wa mihuku mingi, kwa ndingo wa lila likajowiki, Wiwi mbeyu yako yayiye. 19Ni wangali kulegeleka pa kiyitakiso akauholalili mbili wake umaliti kufwa (pakuya mwene ngati miaka mia), ni kufwa kwake luleme lwa Sara: 20ena, kilolalile kilago kya Mulungu, akaganaganiti lepa pangali kiyitakiso, koma akapeliwi mbafu pa kiyitakiso, kumpela Mulungu kukwisika, 21kumanya ngani kukita kila akakilapili, ahotola kawili kukita. 22Kwa ndawa iyi kawili yikambalangili kwa kugoloka. 23Koma kukalembiki lepa kwa ndawa ya yombe wakape, kukita kukambalangili; 24koma ndawa ya tenga kawili, kwa tenga yakuwalangike, wakukela pa yombe uyu akansyusiti Yesu Bambo witu pa wakufwa, nuyombe akafumbukasiki ndawa ya mahoko gitu, 25ni akasyusiki kawili kwa kutigolosa.
നിലവിൽ തിരഞ്ഞെടുത്തിരിക്കുന്നു:
Roma 4: MGS1937
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
First published by the British and Foreign Bible Society in 1937.
