Makitiko Ga Maapostolo 9
9
1Leka Saul, nukuleka kuwapulalila wanafunsi wa Bambo fyakuyogofya na fyakukoma, akanchilili kasisi nkulungu, 2na akaluwiti kwake mabarua kilutile ku Damasek kwa masunagoge, nausi wona akawakolili wangi wa Ndila iyi, wagosi pangi wadala, achite nawo wakukungika mpaka pa Yerusalem. 3Leka pa mwanja mwake yikayili kukita akawandamili ku Damasek: ni kikenyemukile lulangalila lukamuliki kinsyungutile yombe kuhumila kunani: 4na akagwili pasi akayufwini lilowe lya kunjowela, Saul, Saul, unikimbisila kiki? 5Leka akajowiti, Wenga uyii wa naa, Bambo? Leka akajowiti, Nenga niyii Yesu, uyu uyii mu kumhyunga: 6koma uyimaye uyingile pa likaya, na yakijoweke kwako iki ulinganila kukikita. 7Leka wagosi wakugenda pamonga nuyombe wakayimiti nuu, kuyufwana chakaka njowo, koma nukulolakesa lepa mundu. 8Leka Saul akawukiti pa lidupi; ni apa miho gake gakadinduliki, nukulola lepa kandu; ni wakakamwili kiwoko kyake, wakampelakisi kiyingalile pa Damasek. 9Ni akayili magono gadatu wangali kulola, nukulya nukunywa lepa.
10Leka akayili mwanafunsi nunuyu pa Damasek, lihina lyake Anania; leka Bambo akanjowili pa mangumbisi, Anania. 11Leka akajowiti, Lola, nenga Bambo. Leka Bambo akanjowili, Uyimaye, ubitaye ku ndila yakukemaleka Yakugoloka, na ulondelonde pa nyumba ya Yuda mundu lihina lyake Saul, mTarso: 12pakuya lola, asali; na ambweni mundu lihina lyake Anania kuyingila, ni kumbikila mawoko, nausi alole kawili. 13Leka Anania akahigiti, Bambo, niyufwini kwa wingi fya mundu uyu, fiwifu fyoha ifi akawakitili wawalafu wako pa Yerusalem: 14na apa ayii ni chengo kuhumila makasisi wakulungu kuwakunga woha wakulikemalela lihina lyako. 15Leka Bambo akanjowili, Ubitaye mwanja wako: pakuya uyu ni kiwiga kyangu kyakuhagulika, kupinda lihina lyangu palongolo pa Mihuku ni pa watwa, ni pa wana wa Israel: 16pakuya yanindase mahumbuso aga goha alinganila kugawona ndawa ya lihina lyangu. 17Leka Anania akabiti, akayingili mu nyumba; na kumwikila mawoko akajowiti, Ndongo Saul, Bambo, yuyu Yesu, uyu akakuwonakili mu ndila umu ukachilili, akanitumiti, nausi ulole kawili, nu umeme nu Roho Mbalafu. 18Na hino apa gakagwili pa miho gake kihwanakiso kya magamba, ni akaloliti kawili; ni akayimiti ni akabatasiki; 19ni pakayupiti kyakulya, akalinganasiki.
Leka akayili magono gangi pamonga nawo wanafunsi wa pa Damasek. 20Na hino apa pa masunagoge akamwandisi Yesu, kukita ayii Mwana wa Mulungu. 21Leka woha wakunjufwanila wakakangichi, kujowa, Ati si uyu ayii wakuyananga pa Yerusalem awa wakulikemelela lihina ili? na achiti apa nausi abite nawo wakukungika kwa makasisi makulungu? 22Koma Saul akayonjakasiki ni mbafu muni muni, kuwakita waYehudi nuu, awa wakahweliti pa Damasek, apa akalasiti ulungamakiso kukita uyu ayii Kristo.
23Leka baho magono mingi gamemesiki, wa Yehudi wakapangini luhala kunkoma: 24leka luhala lwawe lwamanyiki kwa Saul. Ni wakalindalili pa milyango musi ni kilo nausi wankome: 25koma wanafunsi wake wakantoliti kilo, ni wakanselisi pa lihiliwiga, kunselesa pa likong’ondela.
26Na pala akayichiti ku Yerusalem, akagesiti kuwungana na wanafunsi: na woha wakanjogwipi, nukukela lepa kukita ayii mwanafunsi. 27Leka Barnaba akantoliti, na akachiti nuyombe kwa maapostolo, na akawakokosili umu wambonakili Bambo pa ndila, nu kukita akalongili nako, ni umu akawandasili pa kusindimala pa Damasek pa lihina lya Yesu. 28Ni akayili nawo kuyingila ni kupita pa Yerusalem, kuwandisa pa kusindimala pa lihina lya Bambo: 29ni akalongili kukotana na waHebrayo awa wajowa kiGriki; leka wakagesiti kunkoma. 30Leka walongo pawakamanyiti wakaselili nuyombe ku Kaisaria, wakampili mwanja ku Tarso.
31Mumu kanisa likayili ni kindamba pa Yudaya poha ni Galilaya ni Samaria, kujengeka; ni kugendagenda pa woga wa Bambo ni pa kunyamasa kwake Roho Mbalafu, likayonjakasiki.
32Leka yikayili kukita apa Petro akagenditi poha poha, akaselili kawili pa wawalafu wakuhwela pa Ludda. 33Na bahapo akankolili mundu lihina lyake Enea, kigonile pa kitanda miaka mhano ni yidatu; pakuya akayili wa kindengundengu. 34Na Petro akanjowili, Enea Yesu Kristo akulamisa: uyimaye ni kuyanula kitanda kyako. Na hino apa akayimiti. 35Na woha wakuhwela pa Ludda ni Saron wakambweni, wala nawombe wakang’anamukili Bambo.
36Leka akayili pa Yoppa mwanafunsi yumonga Tabitha, lihina lyake lili pakukokoseka Dorkas: ndala uyu akamemiti ni mahengo manofu ni ga lipyana akagakiti. 37Leka yikayili pa magono gala, kukita akalwaliti akafwili: na pawakanjositi wakantambalisi pa kindemula kya kunani. 38Leka pakuya Ludda papipi ni Yoppa, wanafunsi, pawakayufwini kukita Petro ayii bahapo, wakatumiti kwake wandu wawili, kumpembesa, kukita Usisyela kugendela mpaka tenga. 39Na Petro akayimiti akachiti nu wombe. Na pakachiti wakakweliti nako pa kindemula: na wafwili woha wakayimiti bahapa pa yombe kulilalila, ni kulasa malaya ni mingila akitaga Dorkas, pakuya pamonga nawombe. 40Leka Petro akawawusiti woha kunja, akafugimi ni kusali; na kung’anamukila ntufi, akajowiti, Tabitha uyimaye. Leka akadindwili miho, na pakambweni Petro, akatemi utama. 41Leka akankamwili kiwoko, akanjimwisi; leka pakakemili wawalafu na wafwili, akampeliki wakulama. 42Leka yikamanyiki pa Yoppa poha: na wingi wakankeliti Bambo. 43Leka yikayili kukita akahweliti magono mingi pa Yoppa, kwa nunuyu Simon wakukita makumba.
നിലവിൽ തിരഞ്ഞെടുത്തിരിക്കുന്നു:
Makitiko Ga Maapostolo 9: MGS1937
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
First published by the British and Foreign Bible Society in 1937.
