Makitiko Ga Maapostolo 7
7
1Leka kasisi nkulungu akajowiti, Ati findu ifi fiyii wilawila? 2Leka yombe akatawili,
Walongo na wakadadi, muyufwanilaye. Mulungu wa kukwisika akambonakili dadi witu Ibrahim, pakuya pa Mesopotamia, palongolo nakutamasika pa Haran, nakanjowili, 3Upitaye pa ndima wako, ni pa walongo wako, na uhichaye ku ndima uwu yanikulase. 4Bahalapala kupita pa ndima wa waKasdi, akatamasiki pa Haran: nu Mulungu akamhamisi yombe kukulakula, panyuma pa kufwa kwa dadi mundu, kuyingila pa ndima uwu, mwenga mtamasika mumu hino: 5na akampili lepa lipwela mumu, haka kyakuwikila kigulu: ni akalagini nuyombe kumpela ndima uwu kutama wake, nu mbeyu yake panyuma pake, nuyombe ayii akona nukuya nu mwana. 6Leka Mulungu akalongili wilawila, kukita mbeyu yake yayitame yakwihadisa pandu pa ndima wa kigeni, na yawawakite wawanda, yawawakitile fiwifu miaka mia ncheche. 7Nu mhuku uwu yawawatamile wawanda yaniupawule nenga, akajowiti Mulungu: ni panyuma pa ifi yawapite, ni yawanitumakile pandu apa. 8Ni akampili kilago kya kusilimuka: na wilawila Ibrahim akamhogwili Isaak, ni akansilimwili ligono lya mhano na kadatu; nu Isaak Yakobo, nu Yakobo wakadadi wakulungu kumi ni wawili. 9Na awa wakadadi wakaweni wifu, wakamhemili Yosefu pa Egupto: nu Mulungu akayili pamonga nuyombe, 10na akamfuwili pa mahumbuso gake goha, na akampili neema nu luhala pa miho ga Farao mutwa wa Egupto; na akambikiti kapitao pa Egupto ni nyumba yake ya mfilimila. 11Leka ulali ukachiti pa ndima woha wa Egupto ni Kanaan, ni mahumbuso makulungu: na wakadadi witu wakakolili lepa kyakulya. 12Koma Yakobo pakayufwini kukita iyile trigo mu Egupto, akatumiti wakadadi witu pakutumbula. 13Na pakawili Yosefu akamanyiki kwa walongo mundu; nu nsafi wa Yosefu ukamanyiki kwa Farao. 14Leka Yosefu akatumiti na akankemili kwake dadi mundu Yakobo, na walongo mundu woha, wene wumi sabwino na tano. 15Leka Yakobo akaselili ku Egupto; na akafwili mwene, na wakadadi witu; 16na wakabiti nawo ku Sukem, na wakawikiki pa linyinja lila Ibrahim akahemili kwa uhemesi wa ndalama kwa wana wa Hamor pa Sukem. 17Leka pakuwandamila lukumbi lwa kilago, ulu Mulungu akayitakisi kwa Ibrahim, nsafi ukakuliti ni kuyoloka pa Egupto, 18mpaka akayimiti mutwa yungi pa Egupto, uyu akammanyi lepa Yosefu. 19Yuyu akachenjisi luhala nu nsafi witu, ni akawakitili fiwifu wakadadi witu, kukita wakeke wawe watagike kunja wasilama lepa. 20Pa lukumbi ulu Musa akahogoliki, nuyombe wakuniamba muni; uyu akaleliki miesi yidatu mu nyumba ya dadi mundu: 21leka patagiki kunja, mwana ndala wa Farao akantondwili yombe, na akandeliti kutama mwana mundu mwene. 22Nu Musa akawuliki pa luhala lwoha lwa wa Egupto; leka akayii mwene mbafu pa malowe na pa mahengo gake. 23Leka baha akayili papipi wa miaka arobaini, yayingili pa mwoyo wake kulolalela walongo mundu wana wa Israel. 24Na pakaweni yumonga wa wombe nukukitika malinga, anjimalili, na andipalili pa uyu wakuhumbusika, ankomiti mEgupto yula: 25leka akaholiti kukita walongo mundu yawawalalile kukita Mulungu akawapili uyokosi pa kiwoko kyake; leka wakawalalili lepa. 26Na lukela lwake akawawonakili awa pakupindikana, kulonda kuwatetesa pa kindamba, kujowa, Wagosi, muyii wa lukolo; mukitilana kiki kiwifu? 27Koma uyu wakunkitila mwenesi kiwifu ankangiti yombe, kujowa, Nani akakuwikiti nkulungu na wakupawula pa tenga? 28Ati ulonda kunikoma nenga, umu wankomili mEgupto yula golo? 29Leka Musa akakimbili pa lilowe ili, na akatemi wakwihadisa pandu pa ndima wa Midian, apa akahogwili wana wawili. 30Na pala yikamaliti miaka makumi ncheche, malaika akambonakili pa lipululu pa kidunda Sinai, pa lilambi lya mwoto pa litutu. 31Leka Musa pakaweni, akaganaganiti pa iki: leka pakuwandamila kukilola, lilowe lya Bambo likayufwaniki, 32Nenga Mulungu wa wakadadiyu, Mulungu wa Ibrahim, nu wa Isaak, nu wa Yakobo. Leka Musa akadigidi, na akayogwipi kukilola. 33Leka Bambo akanjowili, Wopola sapato sya pa njayo syako: pakuya pandu pauyimiti apa payili pawalafu. 34Pakulola niloliti mahumbuso ga nsafi wangu pa Egupto, ni niyufwini kuwuwula kwawe, ni niselili kufuwula awa: na hino uyichaye, yanikutume ku Egupto. 35Uyu Musa, uyu wakankaniti, kujowa, Nani akakuwikiti nkulungu nu wakupawula? yuyu Mulungu antumiti aye nkulungu nu wakukombola kwa kiwoko kya malaika uyu akambonakili pa litutu. 36Mundu uyu akachiti nawo kunja, pakakiti finyantiti ni fiwalalilo pa Egupto, na pa Nyanja ngele, ni pa lipululu miaka makumi ncheche. 37Yuyu ayii Musa uyu akawajowili wana wa Israel, Wakulweta Bambo Mulungu yanjimuse kwinu pa walongo winu ngati nenga. 38Yuyu uyu ayii pa kanisa pa lipululu pamonga na malaika uyu akajowiti nuyombe pa kidunda Sinai, ni pamonga na wakadadi witu: uyu akayupiti malowe ga kulama kutipela tenga: 39uyu wakadadi witu nukulonda kutama wakunjufwanila lepa, leka wakankangili kutali, na wakilawukili Egupto pa mioyo yawe, 40kujowa kwa Harun, Utikitile wakamulungu awa yawatilongolele tenga: pakuya Musa uyu, uyu akapititi nu tenga pa ndima wa Egupto, timanya lepa kikangwilile yombe. 41Ni wakakiti nginda ya ng’ombe magono gagalagala, na wakitolelaga kifwilifwili kila nyambiko, na wakasangalwiki pa mahengo ga mawoko gawe. 42Leka Mulungu akang’anamwiki, na akawafumbwili watumakile libanja lya kunani; umu yilembekili pa kitabu kya wakulweta,
Ati mukanitolili nyambiko sya kudumula ni syakunyanya
Miaka makumi ncheche pa lipululu, Wenga nyumba ya Israel?
43Ni mukatutuwisi lisakasa lya Molek,
Ni ndondo ya mulungu Refan,
Fiwalalilo ifi mukafikiti kufigwilakimbo:
Ni yaniwahamise mwenga lisi lila pa Babel.
44Hema ya ulungamakiso wakayili nayo wakadadi witu pa lipululu, umu uyu akalongili nu Musa akataukili, kukita ayikite kwa ndingo wa kiwalalilo akakiweni. 45Iyi wakadadi witu, pakuyupana wakayingili nayo pamonga nu Yoshua, apa wakayingili mihuku lipwela, uyu Mulungu akankangiti pa miho pa wakadadi witu, mpaka magono ga Daudi; 46uyu akakolili neema kwa Mulungu, ni akaluwiti apakolele pakutamila kwa Mulungu wa Yakobo. 47Leka Solomon akanjengili nyumba. 48Koma Uyu wa Panani pene nukuhwela lepa pa nyumba syakukitika ni mawoko; umu ajowela wakulweta,
49Kunani ni kitihu kyangu,
Nu ndima pakuwikila pa magulu gangu:
Nyumba kiki yamunijengele? ajowa Bambo:
Pangi pandu paliku pakupumulila nenga?
50Si kiwoko kyangu kikakiti ifi fyoha?
51Mwenga wakunonopa pa singo, ni wangali kusilimuka pa mwoyo ni pa makutu, magono goha mumpindika Roho Mbalafu: umu wakadadi winu, mumu mwenga kawili. 52Yulii wa wakulweta wakadadi winu nukunkimbisa lepa? ni wakawakomiti wala wakalasiti palongolo kuyicha kwake Uyu Wakugoloka; uyu mwenga muyii hino wakumfumbula ni wakunkoma; 53mwenga mukayupiti torah umu wataukili malaika, ni kuyigoha lepa.
54Leka pakuyufwana ifi, wakahomiki mu mwoyo, na wakang’wenyiti mino panani pake. 55Nayombe, wakumema nu Roho Mbalafu, akwinulili kunani, na aweni kukwisika kwake Mulungu, nu Yesu ayimiti kiwoko kya ndilo kya Mulungu, 56na akajowiti, Lola, nilolakesa kunani kudinduliki, ni Mwana wa adam ayimiti pa kiwoko kya ndilo kya Mulungu. 57Leka wakakwesiti ni lilowe likulungu, ni wakidinditi makutu, na wandundumili yombe nu mwoyo umonga; 58na wakantagiti kunja ku likaya, wantumalili maganga: na walungamakiso wakawikiti mingila yawe pa magulu ga mpalo wakukemaleka Saul. 59Na wakandekalili maganga Stefano, kunkemalela Bambo ni kujowa, Bambo Yesu, yupa roho wangu. 60Leka pakafugimi, akakwesiti ni lilowe likulungu, Bambo, usiwagohela sambi iyi. Ni pala akajowiti naha, akagoniti mu lugono.
നിലവിൽ തിരഞ്ഞെടുത്തിരിക്കുന്നു:
Makitiko Ga Maapostolo 7: MGS1937
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
First published by the British and Foreign Bible Society in 1937.
