Makitiko Ga Maapostolo 28
28
1Na patikayokwiki, bahalapala tikamanyiti kukita kilumba kikemeleka Melita. 2Na wakumamatila watikitili mwoyo unofu wangakuwoneka lepa poha: pakuya wakakositi mwoto, ni wakatiyupiti tenga tawoha ndawa ya fula yakutonya bahalapala, na ndawa ya kusisima. 3Leka Paolo pakawungiki litengu lya mbau, ni kuwika pa mwoto, limoma likapititi pa kupyupa, ni likankamwili pa kiwoko. 4Leka apa wakumamatila wakaweni kilugu kikapagikiki pa kiwoko kyake, wakajowini, Mundu uyu chakaka ayii wakukoma wandu, uyu Malinga nukunjitakila kukita alame, haka amaliti kuyokoka pa nyanja. 5Mumu yombe akakung’windi kilugu pa mwoto, nakulola lepa kindu kiwifu. 6Nawombe wayili mu kulindalila kukita yafimbe, pangi yaagwe pasi wakufwa kikenyemukile: leka pawakalindalili nyamhope, ni wakaweni lepa kandu kyakuganaganisa pa yombe, wang’anamwiki na wakajowiti kukita ayii mulungu.
7Leka pa milima yakusyungutila pandu bahalapala, ukayili ngunda wa wakutumbula wa kilumba, lihina lyake Publio; uyu akatiyupiti, akatikemalisi nnofu pa magono gadatu. 8Leka ikayili kukita dadi wa Publio akayili mu kugona wakukamulika ni kupyupa mumbili ni kuhulula mwasi: nu Paolo akayingili kwake, akasaliti, akambikiti mawoko, na akandamisi. 9Leka apa iki kikakitiki, wangi kawili wakulegaleka pa kilumba wakachiti, ni kulamasika: 10awa kawili wakatiginiki ni maginiko ga mahele; na patikakulwili, wakapakiti findu fyakutisowa.
11Leka panyuma pa miesi yidatu tikakulwili pa liboti lya Aleksandria, lila likatemi pa kilumba lukumbi lwa kusisima, ni kiwalalilo kyake wa Mapasa. 12Ni tikachiti pa Surakusa, tikahweliti bahalapala magono gadatu. 13Kuwuka bahalapala tikasyungutili ni kupakolela pa Regio: leka panyuma pa ligono limonga apa nkachi ukapepiti, ligono lya kawili tikafiki pa Puteoli: 14apa tikakolili walongo, na tikapembesiwi kuhwela kwawe magono saba: na wiwi tikachiti mpaka ku Roma. 15Ni kukulakula, walongo pawakayufwini ndumi situ, wakachiti kutikingamila mpaka Appii‐Foro, ni Tres‐Taberne: wala Paolo pakawaweni, akansengwisi Mulungu, ni akapatiti mwoyo.
16Leka apa tikayingili pa Roma, Paolo akayitikaliki kuhwela pakape pamonga ni msikari wa kundindalila.
17Leka yikayili kukita panyuma pa magono gadatu akakemili wala wayili wakutumbula wa waYehudi: leka apa wakakokaniki, akawajowili, Walongo, nenga haka nikakiti lepa kandu kyakupindika nsafi, pangi mikuwu ya wakadadi witu, nikapelekiwi wa minyololo kipitile pa Yerusalem kiyingalile pa mawoko ga waRoma: 18awa nawombe, apa wakanikotisi, wakalonditi kuniwopola, pakuya pakayili lepe nyimu ya kufwa pa nenga. 19Leka apa waYehudi wakapindiki, nikakikisiwi kunkemela Kaisar; nukuya ngati wakutama ni kandu kakulungamakila mhuku wangu. 20Mumu kwa ndawa iyi nikapembisi niwawone mwenga ni kulongela namwi: pakuya ndawa ya kihuwalilo kya Israel nikungiki ni unyololo uu. 21Nawombe wakanjowili, Tenga nukuyupa mabarua ga wenga kuhumila pa Yudaya, haka mundu wakufika kuni wa walongo akatitolili lepa malowe, akajowiti lepa kandu kawifu ka wenga. 22Leka tilonda kuyufwana kwako fila uhola: pakuya pa mhalo wa kapatuliko aka, gamanyika kwitu kukita payi poha gapindikiwa.
23Leka apa wakawikili ngani nuyombe ligono lya kuyicha, wakachiti kwake wingi ku nyumba yake yakwihadisa; kwa awa akakokosili, kulasa ulungamakiso wa utwa wa Mulungu, kwakopa panani pa Yesu kuhumila pa torah ya Musa ni wakulweta, kitumbulile lukelakela mpaka kimihi. 24Na wangi wakakeliti aga gakajowiki, na wangi nukukela lepa. 25Leka pakutama nukuyitikisana lepa na wayawe, wakapeliwi mwanja, apa Paolo akalongili lilowe limonga kukita, Roho Mbalafu akalongili wicho pa Isaya wakulweta na wakadadi winu, kujowa,
26Ubitaye kwa nsafi uwu, ni ukitaye,
Pakuyufwana yamuyufwane, nukuwalalila lepa pachokope;
Ni pakulola yamulole, nukuwona lepa na pachokope:
27Pakuya unonono mwoyo wa nsafi uwu,
Ni makutu gawe wayufwana mwakutopalela,
Ni miho gawe wadinda;
Wasilola kwali ni miho,
Wasiyufwana na makutu,
Wasiwalalila nu mwoyo,
Ni kung’anamuka kawili,
Ni yaniwalamise.
28Mumu kumanyike kwinu, kukita kwa Mihuku uyokosi uwu wa Mulungu utumiki: awa kawili yawayufwane. 29Ni pala akajowiti malowe aga, waYehudi wakawukiti, kupindikana kwingi yungi nu njini.
30Leka akatemi miaka yiwili ya mfilimila pa nyumba yake ya malipo, 31ni akayupiti woha wakuyingila kwake, kuwandisa utwa wa Mulungu, ni kuyigalisa fila fya Bambo Yesu Kristo, mwa kusindimala, pangali wakunsiwilakisa.
നിലവിൽ തിരഞ്ഞെടുത്തിരിക്കുന്നു:
Makitiko Ga Maapostolo 28: MGS1937
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
First published by the British and Foreign Bible Society in 1937.
