Makitiko Ga Maapostolo 20
20
1Leka panyuma pa kukotosa njwawila, Paolo pakawakemili wanafunsi ni kuwakila, akawalagili ni akapititi mwanja mpaka ku Makedonia. 2Leka pakalutiti pa mipaka yiyi, ni kuwakila na malowe mingi, akayingili pa Greece. 3Na apa akatemi miesi yidatu kukulakula, ni apa luhala lukapangiki na waYehudi kunjananga, apa akatumbwili kugenda mwanja na matanga ku Suria, akawikiti mu mwoyo wake kukilawukila pagati pa Makedonia. 4Ni Sopater wa Beroya, mwana wa Purro, akagenditi pamonga nuyombe mpaka Asia; ni wa Thessalonika, Aristarko nu Sekundo; na Gaio wa Derbe, nu Timoteo; na wa Asia, Tukiko na Trofimo. 5Leka wala wakagenditi mulongolo, ni wakatilindalili pa Troa. 6Leka tikabiti ni matanga mwanja kuwuka pa Filipi, panyuma pa magono ga mikate yangali kimela, na tikawachilili pa Troa galutiti magono mhano; bahalapala tikatemi magono saba.
7Leka pa ligono lya kutumbula lya juma, apa tikakokini kumetula nkate, Paolo akalongili nawo, kulonda kuwuka lukela lwake; na akakiti mingi malowe gake mpaka kilo pagati. 8Leka sikayili nyali syangakepa pa kindemula kya panani, baho tikayili kukokana pamonga. 9Leka mpalo lihina lyake Utuko, pakutama pasi pa dirisha, wakutopeleka nu lugono lukulungu; na apa Paolo akalongili kwingi, wakutopeleka chakaka nu lugono akagwili pasi kuhuma pa walo wa kawili wapanani, na akatuwuliki amaliti kufwa. 10Leka Paolo pakaselili akagwili pa yombe, na pakankumbatili akajowiti, Msiywawa; pakuya wumi wake uyii mugati mwake. 11Leka apa akakweliti ni kumetula nkate ni kulosa, na apa akasyowalili nawo fingi, mpaka kutema kiwumbu, wiwi akapititi. 12Leka wachiti nako mpalo mumi, na wakanyamasiki kukulungu.
13Leka tenga, kugenda mulongolo kuyingila pa liboti, tikakulwili mwanja ku Assos, kulonda kukulakula kumpakila Paolo: ndawa wiwi atawiki, kulonda mwene kugenda pa ndima. 14Leka baha na baha akatikolili pakuyingila pa Assos, tikampakili, ni tikachiti mpaka pa Mitulene. 15Na kuwuka baho na matanga, lukela lwake tikapaweni pa kipula ni Kios; leka ligono lingi tikakwesiti pa Samos; na lukela lwake tikachiti mpaka pa Mileto. 16Pakuya Paolo akalonditi kulutalila pa Efeso na matanga, nausi asitama lukumbi pa Asia; pakuya akayili kuyumbatika, wona yikahotoliki kwa yombe, ligono lya Pentekote kutama pa Yerusalem.
17Leka apa akapeliki kuhumila Mileto ku Efeso, akayikemalili kwake wakulungu wa kanisa. 18Leka baha na baha wakanchilili yombe, akawajowili,
Mwenga muwalalila, kitumbulile ligono lya kutumbula nikachiti pa Asia, umu nikayili pamonga na mwenga lukumbi lwoha, 19kuntumakila Bambo nu kwiselesa kwoha na masoli na mageso aga gakanigwili pa sila waYehudi wakanipangili: 20umu nakagwalili lepa kukotoka kuwakokosela mwenga kiyi kyoha kyakuwanogela, ni kuwayigalisa pa chengo, na panyumba ni nyumba, 21kuwakitila ulungamakiso waYehudi na waGriki kawili, wapele kwa Mulungu, ni wakele pa Bambo witu Yesu Kristo. 22Na hino lola, nigenda mwanja ku Yerusalem, wakukungika pa roho, nukumanya fila yafinikolele pa likaya lililalila: 23lema kukita Roho Mbalafu pa likaya ni likaya alekela ulungamakiso kukita fyakukungila na mahumbuso ganihwelalela. 24Koma nenga nakuwalanga wumi wangu kukita ni kindu, kutama wa uhemesi kwangu, nausi nimalakise ndila yangu, ni kutumakila kula nayupiti kuhuma pa Bambo Yesu, kulekela ulungamakiso wa evangel ya neema ya Mulungu. 25Na hino, lola, nimanya kukita yamwone kawili lepa kyene kyangu, mwenga mwawoha nikalutiti kwinu kuwandisa utwa. 26Ndawa ya iki nilasa ulungamakiso kwinu ligono lya lilino, kukita niyii wakuguyulika pa kyasi kya wandu woha. 27Pakuya nagwaliti lepa kukotoka kuwakokosela malango goha ga Mulungu. 28Muyilolalele wicho mwawene, ni lipuga lyoha lya mambelele, pa lila Roho Mbalafu akawawikiti mwenga maaskofu, kudima kanisa lya Mulungu, lila akayipatili nu mwasi wake mwene. 29Nenga nimanya kukita yayingile kwinu, panyuma pa kuwuka kwangu, filugu fyakuhumbusa, nukulekelela kapuga; 30na wa mwenga mwawene yawayime wagosi wakulongela mibidu‐mibidu, kupatusa wanafunsi kuwakisa wombe wene. 31Ndawa iyi mtamaye miho, kukumbukila kukita kwa miaka yidatu musi ni kilo nakotwiki lepa ni masoli kuwakila ayi yoha. 32Na hino niwawika mwenga kwa Mulungu, ni kwa lilowe lya neema yake, lila lihotola kuwajengela, ni kuwapela lipwela pa awa woha wakuguyulika. 33Ndalama, pangi zahabu, pangi mwingila wa mundu ayi yoha naganiti lepa. 34Mwenga mwawene mumanya kukita mawoko aga gakatumakili pa aga gakanisowiti nenga, na wala wakuya pamonga na nenga. 35Pa fyoha nikawalasiti ndingo, kukita pakuhenga lihengo wila kulinganile kuwatangatila wakulegaleka, ni kukumbukila malowe aga ga Bambo Yesu, mula akajowiti mwene, Kiyii kya kihomo kupeleka kulutila kuyupa.
36Na apa akajowiti aga, akakwinyiti mafugamilo, akasaliti pamonga na awa woha. 37Leka woha wakaliliti masoli makulungu, na wagwili pa singo ya Paolo ni wakanjofyiti pa ndomo, 38kulilalila kulutila pa lilowe lila akajowiti, kukita nakulolalela lepa kawili kyene kyake. Leka wakampelekisi mwanja wake mpaka pa liboti.
നിലവിൽ തിരഞ്ഞെടുത്തിരിക്കുന്നു:
Makitiko Ga Maapostolo 20: MGS1937
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
First published by the British and Foreign Bible Society in 1937.
