Makitiko Ga Maapostolo 18
18
1Na panyumna pa ifi pakawukiti pa Atene akayingili pa Korinto. 2Na akankolili nunuyu mYehudi lihina lyake Akula, mPonto pa nsafi, kuhumila Italia hino apa, na mhano mundu Priskilla, ndawa Klaudio akawataukili waYehudi woha wawuke pa Roma: 3na akawachilili awa; leka pakuya na ufundi wuwu ngati awa, akahweliti kwawe, ni wakahengiti lihengo; pakuya wakayili wakutota hema pa ufundi wawe. 4Leka akakotini pa sunagoge sabato iyi yoha, na akawakongiti waYehudi na waGriki kawili.
5Ni baha na baha Sila nu Timoteo wakaselili kuhumila Makedonia, Paolo akakikisiki ni lilowe kuwalekela wa Yehudi ulungamakiso kukita Yesu ayii Kristo. 6Leka apa wakapindiki ni kujowa blasfemia, pakakung’windi nguo yake akawajowili, Mwasi winu pa mitu yinu; nenga niyii wakuguyulika: kitumbulile hino yanibite kwa wa Mihuku. 7Ni akapititi kuku, ni akayingili pa nyumba ya mundu lihina lyake Tito Yusto, wakungwilakimbo Mulungu, nyumba yake yikayii nu mpaka pamonga nu sunagoge. 8Leka Krispo, nkulungu wa sunagoge, akankeliti Bambo ni nyumba yake ya mfilimila; ni wa mahele wa waKorintho pawakayufwini wakakeliti, ni wakabatasiki. 9Leka Bambo akanjowili Paolo kilo pa mangumbisi, Ukotoke kuyogopa, koma ulongelaye, usitama kinunu: 10pakukita nenga niyii pamonga nu wenga, na pawaka mundu yakuwikile mawoko kukukitila fiwifu: pakuya nsafi ukulungu niyii nawo pa likaya ili. 11Ni akatemi baho mwaka ni miesi sita, kuyigalisa lilowe lya Mulungu pagati pawe.
12Leka pala Gallio akayili nduna wa Akaya, waYehudi wakanjimili Paolo nu mwoyo umonga kumpindika, ni wakantoliti yombe pa kitihu kya kupawula, 13kujowa kukita Mundu uyu akonga wandu kungwilakimbo Mulungu kwihokela torah. 14Koma apa Paolo akalonditi kudindula pa ndomo pake, Gallio akawajowili waYehudi, Wona kitama kindu kyangali malinga pangi kyakudyelalela kuwifu mwenga waYehudi, kwa ndingo wa luhala nganiyisingi nu mwenga: 15leka wona gatama makoto ga malowe ni mahina ni mimbi siyii kwinu, mulolaye mwawene; nenga nukulonda lepa kuya wakupawula wa findu ifi. 16Ni akawakimbisi kuhuma pa kitihu kya kupawula. 17Leka woha wakankamwili Sostenes, nkulungu wa sunagoge, ni wakantowiti palongolo pa kitihu kya kupawula. Nukuya lepa kandu kwa Gallio kayi koha ka findu ifi.
18Leka Paolo, pakatemi kawili magono mingi akayufwangini ni walongo, ni akalutiti ni matanga mwanja ku Suria, ni pamonga nuyombe Priskilla ni Akula; apa akamogiti mutu wake pa Kenkrea: pakuya akilapili. 19Ni wakafiki pa Efeso, ni akawalekiti bahalapala: koma mwene akayingili pa sunagoge, ni akakotini ni waYehudi. 20Leka apa wakankotiti ahwele baha lukumbi lwakulutila, akayitakili lepa; 21koma pakalagili ni kujowa, Yaniwakilawukile kawili Mulungu wona alonditi, akakulwili kuleka Epheso. 22Ni pakaselili pa Kaisariya akakweliti ni akawalamwisi kanisa, ni akaselili ku Antiokia. 23Ni pakatemi baho lukumbi lungi lungi akapitili, ni akagenditi poha pa ndima wa Galatia ni Frugia, kukangamasa wanafunsi woha.
24Leka nunuyu mYehudi lihina lyake Apollos mu Aleksandria pa nsafi, ngosi wa luhala, akafiki pa Epheso; nuyombe akayili wa makakala pa malembo. 25Mundu uyu ayili wakuwulika pa ndila ya Bambo; ni pakuya nkiki pa roho, akalongili ni kuyigalisa mwakukisila findu fya Yesu, kuwalalila ubatiso wa Yohana wakape: 26ni akatumbwili kusindimala kujowa mu sunagoge. Leka Akula nu Priskilla, pawakanjufwini, wakantoliti kwawe, ni wakankokosili mwakukisila kulutila nyahope ndila ya Mulungu. 27Leka apa akalonditi kugendela mpaka pa Akaya, walongo wakankangamisi, ni wakawalembili wanafunsi nausi wanjupile: nuyombe pakachiti akawatangatili nyahope awa wakakeliti mwa neema: 28pakuya akawapindiki nyahope waYehudi pa chengo, kulasa kwa malembo kukita Yesu ayii Kristo.
നിലവിൽ തിരഞ്ഞെടുത്തിരിക്കുന്നു:
Makitiko Ga Maapostolo 18: MGS1937
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
First published by the British and Foreign Bible Society in 1937.
