Misāwā 16
16
Timoté ɛ́ ɛ́ kɛ̄ lyúkɛl Pɔ́l ɓá nɛ Sílas
1Pɔ́l ɛ ɓúkā tɔ́ ɓɛ̌ khandǎ Ɗɛ́ɛɓ, phúla ték ɛ́, ɓɛ̌ Lístɛlɛ. Pyaāŋ ɛ́, í i ɓɛ nɛ nɔ̄l mbúkɛl mí Yésus ɗín lɛ̄ nāá, Timotê. Naāŋg ā ɓɛ Yúɗɛn, mbúkɛl mí Yésus, sāŋg wɛ̄ nyɛ ā ɓɛ Gɛlɛ̂k. 2Óɓúkɛl ō Lístɛlɛ nɛ Ikonyɔ́m ɓā ɓɛ tí ɓū syókɛ̌l Timoté tí tyaa isīsɛ̄ɛ̄ ɓyɛ̄. 3Pɔ́l ɛ ɓúzī nwɔ̌ŋ cyūklā nāá, á á tɔ́ nɛ nɛ̄. Ɛ nyēē nwɔŋ ɛ́, ɛ kɛ́ sá ɛ́ zaŋgo tí ɛkámb Óyúɗɛn ɓā cicyuk tí pák ɓwaās ték ɓâk. Nɛ dɔ nāá, ɓot ɓyɛ̂ɛs ɓā ɓɛ tí gú nāá, sāŋg mí Timoté ā ɓɛ Yúɗɛn. 4Phúla ték ɛ́, ɓá a ɓɔɔ Timoté ɓɛ̄ ɓúzī nyɛ̌l kɛnd. Tí ikhanda ɓyɛ̂ɛs ɓā thithaŋ ték ɓík ɛ́, Pɔ́l nɛ Sílas ɓɛ̄ ɓú didoŋga óɓúkɛl micyūklā mī mílwōmtwōm nɛ otōmbá ō gós-óɓúkɛl ɗí ɓɛ̌ Yotósalɛm ɓák ɓā nwɔŋ mík, nɛ ɛlilɛ́ɛ́ ɓɛ́ nāá, ɓɛ ɗúɛl micyūklā mītêk. 5Igós ī ɓót ō mí Yésus ɓyā ɓɛ nje ték ɛ́thīn tí ɛɓūklā. Í ɗyaāŋ ɓā titɔ́ nɛ ɛɓǔ ɗakɛ mɛ́lú mɛ ɗí ê.
Zɛɛ̄mb ɛ́ ɛ́ kɛnd Pɔ́l ɓɛ̌ Maseɗwân
6Pɔ́l ɓá nɛ Sílas ɓā ɓɛ tí ɛkam ɛ́tɔ́ ɓɛ pák ɓwǎs Azí, tí ɛkɛ̄ lɛ́ɛ́ ɓót ɛkɛ́l ɛ̄ mí Zɛɛ̄mb. Sá gwát, Áchāāchǎnj Sisímb ɛ ɓúzī kambɛl ɓɛ̂. Ɓɛ̄ ɓúkā ceé ɓɛ pák ɓwǎs Fiigí nɛ Galasî. 7Ɓɛ̄ ɓúzī tɔ̂, ɓɛ̄ kɛ́ kǔm ndumɛ nɛ pák ɓwǎs Misî. Ɓā sisâŋ nāá, ɓá á tɔ́ ɓɛ pák ɓwǎs Ɓitinî. Sá gwát ɛ́, Sisímb mí Yésus ɛ ɓúzī ɓākā kambɛl ɓɛ̄. 8Ɓɛ̄ ɓú da thǎŋ Misí thaŋ ê, ɓɛ̄ tɔ̄ ɓɛ̌ Toâs. 9Tí pum nák ɛ́, Pɔ́l ɛ ɓúzī ɓɛɛ nɔ̄l mót Maseɗwán tí líma nyɛ ta ɓɛ tí dɔ̂. Mot ték ā ɓɛ títɛɛ̄l tí ɛpipyap ɛ́ mɛɓɔ̂, nyɛ nāá: «Mí í dakla nɛ nɔ, thǎ ɓɛ̌ Maseɗwán u zí kɛm ɓés!» 10Phúla Pɔ́l ā ɓɛ ɛ́ ɛ́ ɓɛɛ sá ték ɗyaāŋ ékɛ́, zī ɓú dā kpās ɛ́sáŋ thɔ́k ɛtɔ́ ɓɛ̌ Maseɗwán. Nɛ dɔ nāá, zā ɓɛ zí í ɓɛɛ nāá, Zɛɛ̄mb ɛ́ kpɛl nāá, zī kɛ́ ɛtyáá tūnd Tyâa Pɔ́ tí ɛsú ɛ̄ ɓót ō pyaāŋ.
Líɗia ɛ́ ɛ́ ɓûkla Ɗá ɓɛ̌ khandǎ Fílíp
11Í ɗyaāŋ ték zā kalɔɔ kukɛ ɓɛ̌ Toás zī sɔ̂ɔ, zī kúm ɓɛ̌ pāk Samotás ê, zī dā náǎŋ. Tí mɛlyám ɛ́, zī khɛ̂ɛ, zī kɛ́ kǔm ɓɛ̌ khandǎ Neapolî. 12Zī ɓúkā tyáá náǎŋ ɛ́, zī kɛ́ kǔm ɓɛ̌ Fílíp, khanda ɗí ánénén tí pák ɓwǎs Maseɗwán də̄ə̄ nɛ ilomɛ́ ê. Zí i sâ thūnd mɛ́lú náǎŋ. 13Tí mwēs saɓá, zī ɓúzī gbɔ́m twóó khanda, zī tɔ̄ ɓɛ̌ mwɔ̄ŋ yīl ɗyūū. Zā ɓɛ tí ɛsîmsa nāá, zá á ɓyelǎ pyaāt Óyúɗɛn sā míndakla ê. Kɛ kum pyaāŋ nák ɛ́, zí ɓyelǎ thūnd ɓúá ɓɛ́ ɛ́ gwêsla. Zī ɓúzī ɗi sī zī lüii nɛ nɔ̄ɔ̄. 14Tí ndɔŋ ɓúá ōték ɛ́, ŋgwát ɗín lɛ̄ lā ɓɛ̄ Líɗia. Ā ɓyɛ̂l ɓɛ̌ khandǎ Tyatíi, ɛ ɓīɓɔ̄msā íɗim i míló mī míkānd mī átwaatwâmb. Ā ɓɛ thɔ́k tí ɛɗúɛl Zɛ́mb. Ɛ ɓú gigwókɛl sá zā ɓɛ tí ɛlɛ́ɛ́ ê. Ɗá ɛ ɓúzī ɗii lyém wɛ̄ tí tɛ̄lā ɗí nɛ nāá, ɛ gû gwók sá Pɔ́l ā ɓɛ tí ɛlilɛ́ɛ́ ê. 15Ɛ ɓúzī ɗuaa ɓá nɛ ɓot ō njāā wɛ̄ wɛ̂ɛsa. Phúla ték ɛ́, ɛ ɓúzī ɓándɛl ɓés, nyɛ nāá: «Í ɓɛ̄ nāá, ɓí í kū ɓɛɛ nāá, mí í ɓûkla Ɗá Yésus nâk, thāākâ ɓī ɓá zī ɗǐ ɓɛ̌ njāā wâm.» Ɛ ɓúzī sá syēn, zī ɓándā kam.
Ɓɛ́ ɛ́ gbá Pɔ́l ɓá nɛ Sílas tí mbok ɓɛ̌ khandǎ Fílíp
16Tí wūl mwēs zā ɓɛ tí ɛtɔ́ ɓɛ̌ pyaāt míndakla ékɛ́, yīl phala múmá í ɓúzī zye tí ɛzī ɓoma nɛ nēs. Mumá ték ā ɓɛ nɛ sisímb nɔŋol. Tí nɔŋol wɛ̄ ték ɛ́, omása ɓɛ̄ ɓɛ̄ ɓīɓyé thūnd mɔnī. 17Ɛ ɓúzī nyɛl ɛɗú ɓés zá a ɓɔ̂ɔ Pɔ́l nɛ ɛlilɛ́ɛ́ khúl nāá: «Ɓot ɓák ɓɛ́ osɛ́l ō mí Zɛɛ̄mb ɗí kwóó íjwóó ɔ̂. Ɓɛ́ lyākɛ̄l ɓén náǎŋ zyē. Í zye ték ɓí wā ɓyelǎ cyuk ê.» 18Ɛ ɓú sisá sá ték mɛ́lú myɛ̂ɛs. Tí wūl mwēs e, ī ɓúzī kpay Pɔ́l tí lyêm. Ɛ ɓúzī lyuŋg, ɛ khākɔ̄ɔ̄ nɛ sisímb nɔŋol énɛ́ɛ̌ŋ nāá: «Mí lɛ́ɛ́ ɔ́ tí ɗín ɛ̄ mí Yésus Kilís nāá, gbɔ̄m tí nôl mumá ɔ̂!» Títɛɛ̄l ŋgwát, sisímb ték ī dá gbɔ́mgbɔ̄m ê. 19Ɗɛ ómása ō phala múmá énɛ́ɛ̌ŋ ɓā ɓɛɛ nāá, zyě mɔnī nyɔ̄ɔ̄ nyī mú petā ékɛ́, ɓɛ̄ ɓúzī mɛ́t Pɔ́l ɓá nɛ Sílas ɓɛ̄ ɗúl ɓɛ̂, ɓɛ̄ tɔ̄ nɛ nɔ̄ɔ̄ ɓɛ phānj mitɔɔ̄p sɔ̂kphɔ̌mb miŋgɔ́mina. 20Ɓɛ̄ ɓúkɛ̄ put ɓɛ́ ɓɛ ɓót ō phǎnj mitɔɔ̄p Ílomɛ́, ɓɔ̂ɔ nāá: «Ɓot ɓák ɓɛ́ Oyúɗɛn, ɓɛ tí ɛté ɛ́tuūk twóó khanda káyīnā. 21Ɓɛ tí ɛlyákɛl ɓót wūl kǒ-kɛnd süîs, ɓyela nāá, lɔ́a káyīnā yā ā kpɛ́l ɗyáŋ. Nyɔ̂ɔ ní ka Ilomɛ̂, ná a ɓɛ̄ nɛ khul ɛkamká wūnɛ́ɛ̌ŋ mbǐ kǒ-kɛnd, gú thɔ́k ɛkɛ tí kǒ-kɛnd têk.»
22Mɛthum mɛ ɓót mā ɓɛ tín mák, mɛ̄ ɓúzī gwók ɛ́ɓūk nɛ Pɔ́l ɓá nɛ Sílas. Ɓot o phǎnj mitɔɔ̄p ílomɛ́ ɓɛ̄ ɓúzī jüe ɓót khul nāá, ɓɛ̄ nâŋ ɓɛ mikānd, ɓɛ̄ ɓī ɓɛ́ nɛ izɛmbɛ. 23Phúla ɓā ɓɛ ɓɛ́ ɛ́ síl ɛ́ɓí ɓɛ́ ékɛ́, ɓɛ̄ ɓúzī nwap ɓɛ́ tí mimbok. Ɓɛ̄ jüē mbákɛl mimbok thɛ́l nāá, ɛ gû nón ɓɛ́ ɛ́nwɔŋnwɔŋ. 24Ɗakɛ mbákɛl mimbok ā gwôk ɛɓēndē ɛ̄ ték ékɛ́, ɛ ɓúzī kɛ̄ pet ɓɛ́ ɓɛ thɔ̂ɔ mɛsīl mɛ̄ njāā mbok, ɛ gbā ɓɛ́ mɛkoō tí pwok. 25Ɓɛ pák kúkǔ pum ɛ́, Pɔ́l ɓá nɛ Sílas ɓā ɓɛ̄ tí mindakla, nɛ ɛliluŋgɛl Zɛ́mb nɛ mɛjêmb, mīl mímbok mī gīgwôk. 26Ta ɓwɛɛ nâk ɛ́, iɓwaās ɓī ɓúzī thɛnja ɛ́ɓyóóɓyóó tí tɛ̄lā ɗí nɛ nāá, ipetok ī njāā mbok ɓī thɛ́nja, mɛgbɛs myɛ̂ɛsa mɛ̄ ɗíi, idɔpɔ ɓā gwôl mimbok nɛ ɓyɛ́ ɓík ɛ́, ɓī tíi. 27Mbakɛl mimbok ɛ ɓúzī lók tí dɔ̂. Ɛ́ dā ɓɛɛ mɛ́gbɛ̄s mɛ̄ njāā mbok mɛ̄ mú mimbɛs. Ɛ dá sîmsa nāá, mimbok myɛ̂ɛs mí í myak. Ɛ ɓúzī té paasɔŋ wɛ̄ tí pɔɔ̄p tí nāá, á á dó nôl. 28Sá gwát ɗɛ Pɔ́l ā ɓɛɛ ɗyaāŋ ékɛ́, ɛ ɓúzī lüii nɛ khul nyɛ̂ɛs, nyɛ nāá: «Wa a dó nôl, ɓěs ɓyɛ̂ɛs zí yes.» 29Mot ónɔ́ɔ̌ŋ ɛ ɓúzī lɛ́ɛ́ nāá, ɓɛ zyē ɛ nɛ ndol. Ɛ ɓúzī nwɔ̌ŋ ndol ték ɛ́ kpās ɛ́tɔ́ ɓɛ thɔ́ɔ́ ā pet ɓɛ ê, nól ɛ́zɔmzɔm tí ɓā, ɛ kɛ́ ɗuma Pɔ́l ɓá nɛ Sílas tí mɛkoō. 30Phúla ték ɛ́, ɛ ɓúzī gbɛ́s ɓɛ̂, nyɛ thɔ́ jí nɛ nɔ̄ɔ̄ nāá: «Otōmbá ɓâk, mi nɛ khul ɛ́sá nā tí nāá, má á cyuk?» 31Ɓɛ̄ ɓúzī ɓɛ́s ɛ́ nāá: «Ɓûkla Ɗá Yésus, Zɛɛ̄mb á á sá nāá, ɓyá nɛ ɓot ō njāā wɔ́ ɓyá á ɓyě cyuk.» 32Pɔ́l ɓá nɛ Sílas ɓɛ̄ ɓúzī nyɛl ɛ́lɛ́ɛ́ ɛ́ ɛkɛ́l ɛ̄ mí Ɗá ti nɛ ɓot ō njāā wɛ̄ ɓyɛ̂ɛs. 33Tí pum ŋgwát nɛ ŋgwát ték ɛ́, mbakɛl mimbok ónɔ́ɔ̌ŋ ɛ kɛ́ süesɛl Pɔ́l ɓá nɛ Sílas mɛpyōŋ mɔ̄ɔ̄. Phúla ték ɛ́, Pɔ́l nɛ Sílas ɓɛ̄ ɓúzī ɗuu ɛ́ nɛ ɓot ō njāā wɛ̄ tí pum ŋgwát nɛ ŋgwát têk. 34Ɛ ɓúzī nwɔŋ Pɔ́l ɓá nɛ Sílas ɛ tɔ̄ nɛ nɔ̄ɔ̄ ɓɛ̌ njāā wɛ̄, ɛ jüē ɓɛ́ iɗôo. Ɓá nɛ njāā ɓót wɛ̄ ɓɛ̄ ɓúzī myaŋlǎ tɔɔ̄p nāá, ɓɛ́ ɛ́ ɓûkla Zɛ́mb.
35Ɗakɛ mɛ́lyám mā lyâmla ékɛ́, ɓot o phānj mitɔɔ̄p ílomɛ́, ɓɛ̄ ɓúzī kɛnd isóda nāá, ɓɛ kɛ́ ɛlɛ́ɛ́ mbákɛl mimbok nāá, ɛ ɓyêt ɓɛ. 36Mbakɛl mimbok ɛ ɓúkɛ̄ lɛ́ɛ́ Pɔ́l nāá: «Ɓot o phānj mitɔɔ̄p ílomɛ́ lɛ̄ɛ̄ nāá, mi ɓyɛ̂t ɓēn. Gbɔ̄mkâ, ɓī tɔ̄ tí ɛpyaala.» 37Sá gwát, Pɔ́l nɛ isóda ɓyā zye nɛ twōm ték ɓák nāá: «Zí gbās nā? Ɓɛ́ ɛ sá nāá, ɓɛ̄ ɓî ɓés sɔ̂kphɔ̌mb mot nyɛ̂ɛs, ta dɔ́s ɓés, ɓyela nāá, zí Ilomɛ̂. Phúla ték ɛ́, ɓɛ̄ nwáp ɓés tí mbok. Ɓɛ́ kam ɛ́ kā ɓyét ɓés ɛ́chāak sɔɔ̄? Yá ǎ ɓánda, ɓɔ̂ɔ ɓot oték ɓɛ̄ zí i gbɛ́s ɓés.» 38Isóda ɓyā zye nɛ twōm ɓík ɛ́, ɓī ɓúzī ɓúla nɛ lɔ́ŋ ték ɛ́, ɓɛ̄ kɛ́ lɛ́ɛ́ ɓót ō phǎnj mitɔɔ̄p ílomɛ̂. Ɗakɛ ɓā gwôk nāá, Pɔ́l ɓá nɛ Sílas ɓɛ́ Ilomɛ́ ékɛ́, ī ɓúzī sá ɓɛ́ ɓwɔ̄ŋ. 39Ɓɛ̄ ɓúzī tɔ́ ɓɛ yɔ̄ɔ̄ tí ɛkɛ̄ pyap ɓɛ́ mɛɓɔ̂. Phúla ték ɛ́, ɓɛ̄ ɓyēt ɓɛ̄. Ɓɛ̄ dáklā nɛ nɔ̄ɔ̄ nāá, ɓɛ̄ gbɔ̂m tí khanda. 40Ɗɛ Pɔ́l ɓá nɛ Sílas ɓā gbɔ̂m mbok ékɛ́, ɓɛ ɓúzī tɔ́ ɓɛ ɗá mí Líɗia, pyaāt óɓúkɛl ɓyɛ̂ɛs ɓā ɓɛ ê. Ɓɛ̄ jüē ɓɛ́ mɛlyōō tí ɛlelɛl ɓɛ́ tí ɛkɛ́l ɛ̄ mí Zɛɛ̄mb, phúla ték ɛ́, ɓɛ̄ kpâŋ.
നിലവിൽ തിരഞ്ഞെടുത്തിരിക്കുന്നു:
Misāwā 16: MPU
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2023, CABTAL amp © 2023, COCELMPU
