Ɨfaʼ 24
24
Bɨ Ghɨ Ɨsáʼ a nye Baolo a Ɨshi Gobɨna Fɛligɨsɨ ə
1Njwi tsi tə̧̂ tsanə, Ntumshe wu Ngwi mbe Anania a ghɛn a Seseria bo bɨ bɨkum bə tse nkwiʼtɨ a ngaŋ ɨ sáʼ mɨsáʼ wu tse wa ɨkum ɨyi bénɨ́ Tɛtulusɨ ə. Bo yén tɛ́m a ɨshi Gobɨna Fɛligɨsɨ ngɨ ɨsáʼ a nye Baolo ghe. 2Bɨ tíʼ ntɔ́ŋ a Baolo a kon ngyen, Tɛtulusɨ a tiʼ mbiʼnɨ nkaŋə ayi ɨ nanə ghe:
“Tsazɨ! Adzaŋ za o sáʼnə́ awɨgɨ nɨ zóŋ a ghɨ bɨgɨ tsi nɨ mbɔnɨ a nye abaŋ zə sa ghe. A nkwiʼtə, bɨ ghɨə bɨkwebtɨ bə ghaʼnɨ bə shiʼnɨ taŋ á alaʼ azɨgɨnə tsi ɨ shiʼnɨ ə. 3Bɨgɨ kwárə́ ɨnu tsiŋ ɨtsum ɨdiʼ ɨtsum nkfu tsum ə. Bɨgɨ ghǎ a mɨya a mbó gho tsɛʼ a nkə. 4Ka ma ndǒ aghə a ntsəŋ nkfu ɨzo ghe, lá ma bǔʼ mbó a mbó gho ngə́ o tsi nɨ ntəm ngɨ ɨbɔŋ, njwiʼtɨ tsɛʼ a nye məkum a nkfu anu za bɨgɨ mɨ sóŋə́. 5Bɨgɨ zɛ́n ngə́ ŋwɔn wen a nɨ ŋwɔn ngǎ ngɨ́ʼ mbe mbɔgɨ ndá; a bvugɨ ndum a tɨtərɨ bə Yuda adiʼ atsum za bo tsinɨ ɨwu a mu mbyi nkɨ mbe tamandzɔŋ mandzɔŋ bə Nazarin ə. 6A kɨ chi nkɨ ndɔbtɨ ɨ shwiʼ Ndáŋwi zɨ Ngwi, bɨgɨ ko ayi ɛ. 7#24:7 Ɨŋwaʼnɨ tsɨ lvuŋ tsɨ mɔʼɔ tsa bɨ tsánɨ́ mbyi ŋwaʼnɨ kwiʼtɨ mɨnkaŋ 6b-8a ngə́: f Bɨgɨ bé sáʼ ayi ɨ zɔŋ a nyɔngɔŋ ɨwɨgɨ ə, fv 7 f lá Laisiasɨ, tantso, a yén ɨ shwuʼ ayi a mu mbó bɨgɨ nɨ adaʼ ə. fv 8f Laisiasɨ a tíʼ ngá ntɨgə ngə́ á ɨbɛn ba bɨ kaŋnə ayi yen nkaŋ ayi a ɨshi gho ghe. 8Be o bitɨ ɨbítɨ a mbó ŋwɔn wen muŋ, tsɛʼ gho mboŋ o mɨ zuʼ ɨnu tsa bɨgɨ kaŋnə ayi mbɨ́ʼ a tsɛrə wə ntsu ə.” 9Bə Yuda ba zɔ́ŋ nkɨ nkaŋ ayi, ɨ soŋ ngə́ ɨnu tsiŋ ɨtsum bé nkənu ə.
Nɨgham nɨ Baolo nɨ Ntsuʼ Atú azhi a Ɨshi Fɛligɨsɨ ə
10Gobɨna a tíʼ nkatɨ a Baolo ngə́ á ghamə. Baolo a tíʼ sóŋ ngə́,
“Ma zhi ngə́ o benə tabyɛn a mbó alaʼ zɛnə atú ɨlom a ɨnɔ ɨnɔ, ma lan, ma dorɨtɨ a ngam nɨgham nɨ ntsuʼ atú azan a ɨshi gho ghe. 11O chi tsɔʼ aku tsɛʼ gho mboŋ ɨ zhi ngə́ ka a tsanə ayi njwi nɨghúm ntsɔb bá mbáʼ ma kɨ ghɛnɨ a Yerosalɛm a ngúʼsɨ́ Ŋwi ə. 12Bə Yuda kɨ se kwatɨ aghan á ma nkwə́nkə́ bɨgɨ ŋwɔn tse a mu Ndáŋwi zɨ Ngwi, kə nkɨ ndzɛn á ma shwúʼtə́ ɨbɛn, a mu ndáŋwi bə Yuda kə adiʼ zə tsɛrə a mu ntáʼmbagə wu wi məwa. 13Bo chi keʼ kɨ ndiʼ a mbó gho asaŋəsaŋ anu za bo kaŋnə aghan ɨwu lá. 14Ma mɨ bem a zen a mbó gho ngə́: Ma ghúʼsə́ a Ŋwi wu bɨta ɨbɨgɨ bə kɔ́ʼɔ́nguʼ ndzɔ̌ŋ Ndómnji wa bo soŋnɨ ngə́ a nɨ wu ɨchwenu lá. Lá ma kɨ nɨŋ ntəm ɨghan a nye ɨnu ɨtsum tsa bɨ ŋwaʼnɨnɨ a mu Nyɔngɔŋ Mǒse abɔʼnɨ tsa bɨ ŋwaʼnɨnɨ a mu ɨŋwaʼnɨ ntóm Ŋwi ə. 15Ma tsi nɨ ndəŋndəŋ ntsiŋə nɨ ntəm tsum a nye Ŋwi za bo məbenə tsinɨ nɨ zɛrə ngə́ ɨbɛn bɨtsum, bə shiʼnɨ abɔʼnɨ bə tɨbɔŋ ghɨ zhwémnɨ́ a mbó nɨvwo ə. 16Ma lan, ma lə̌tú azan ngə́ ntəm ɨghə lán a ɨshi Ŋwi nkwiʼtɨ a ŋwɔn mɨsɔŋ a ntsu ə.
17Mbáʼ ma fúnɨ́ a Yerosalɛm ntsi abyɛn atú ɨlom tsɨ ghaʼnɨ, ma bə́ ngɛn ɨwu a ngá nkáb a mbó ɨbɛn ɨban, ɨ kɨ gha mɨtsuʼnɨ mɨ atú ə. 18Ma kɨ tsi lá ɨwu bo zɛn aghan a Ndáŋwi zɨ Ngwi mbáʼ ma mɛ́tɨ́nɨ́ a sugɨ me ɨ fɛm a mu mbɔm ə. Ka ɨnɔ ɨbɛn kɨ tsi awa bɨgɨ bo, ndum tse keʼ kɨ mbe. 19Lá bə Yuda bə tse ba bɨ lónɨ́ a mbuʼ Esha tsí ɨwu ə; a be be anu a nkaŋ me muŋ, a nɨ bo məben ba bɨ tsinɨ nɨ ngyiŋə a ɨshi gho ɨ kaŋ aghə. 20Kə ben ba bɨ tsinɨ ɨghan lá á bo soŋ ɨsáʼ wa ma vwónɨ́ mbáʼ ma tɛ́mnɨ́ a ɨshi Ngaŋ Sáʼ Abyɛn — 21ka a tsa ayi a táʼ anu wa ma sóŋnɨ́ mbáʼ ma tɛ́mnɨ́ a ɨshi bo ngə́: ‹Nɨ sáʼə aghan ɨ sɨŋə lá mbɨ́ʼ ngə́ ma nɨŋ ntəm ɨghan ɨwu ngə́ bɨkfú ghɨ zhwémnɨ́ a mbó nɨvwo ə.› ”
22Ma lan, Fɛligɨsɨ wa a zhínɨ́ anu mbɨ́ʼ Ndómnji wa ɨ shiʼnɨ, a tíʼ nden abyɛn ə. Wɛrə a sóŋ a mbó bo ngə́, “Tantso Laisiasɨ a ghɨ ngyén muŋ ma mɨ tɛgɨnɨ ɨsáʼ ɨgho.” 23A sóŋ a mbó gwe wa a kɨ́nə́ ntsiŋə a Baolo lá ngə́ á wiʼtɨ ndɛn ayi ɨ shiʼnɨ, lá nga abárɨ́ wəmbo á chi núm ghantɨ, ɨ kɨ nyɛʼtɨ á bɨson ɨbyi ngyíŋə́ nɨ ɨdzúm tsa a lɔnə ghe.
Baolo a Ɨshi Fɛligɨsɨ bo Durusila ghe
24Njwi tsɨ tse tsanə, Fɛligɨsɨ bo ngwe ɨyi Durusila mangye bə Yuda bɨ yiŋə. Wɛrə a tɔ́ŋ a Baolo njwiʼtɨ anu za a kɨ́nə́ sóŋə́ mbɨ́ʼ abeməntəm azhi a nye Kristo Yeso ghe. 25Lá mbáʼ Baolo a tíʼnə́ ngěn nɨ mbyi a mɨ ɨnu mbɨ́ʼ ɨbɔŋ abɔʼnɨ nchwatɨ ɨnye, abɔʼnɨ Njwi Nɨsáʼ za ɨ ghɨnɨ yen lá, Fɛligɨsɨ a bɔ́gɨ́ ntiʼ soŋ ngə́, “O chi tiʼ ghɛn agho tɨtsɔŋnɨ ə. Ma mɨ bə tɔŋ agho mbáʼ ma tsinɨ nɨ abárɨ́ ə.” 26Wɛrə a ghɨ́ nkə́ ntsíŋə́ nɨ ntəm ɨyi ɨtsum ngə́ Baolo a mɨ gha a mɨ nkáb tse a mbó zɨə; nə nɨ yentəzɔʼ wa wɛrə a ghɨ́nɨ́ ntíʼə ntɔ́ŋə́ a Baolo nɨ nkfu nɨ nkfu bo zɨ ghamnɨnə lá.
27Ɨlom tsi bá ghɨnə ntsá, bɨ tsɔʼ a Bɔshɔsɨ Fɛsɨto ngə́ á lɔgɨ adiʼ a Fɛligɨsɨ a nye gobɨna ghe. Fɛligɨsɨ a kə́ ndǒ nkwarɨ ɨkum wu shiʼnɨ a mbó bə Yuda ntiʼ nyɛʼtɨ a Baolo atsáŋ ə.
നിലവിൽ തിരഞ്ഞെടുത്തിരിക്കുന്നു:
Ɨfaʼ 24: MNT
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2023, CABTAL
