Ɨfaʼ 20
20
Baolo a Ghɛn a Masedonia bo Akaiya ghe
1Ndum za ghɨnə nkyɛ́ntɨ́, Baolo a tɔŋ ɨbɛn ba bɨ nɨ́ŋnɨ́ mɨntəm ɨma a nye Kristo táʼ adiʼ, ngwɔŋtɨ awa nɨ mɨgham, ntiʼ nga fɨlye ɨfa ghe. Wɛrə a tíʼ ndo ngɛn a Masedonia ghe. 2Wɛrə a tsá a mu mbuʼ tsa nkə́ ngwɔ́ŋtɨ́ ɨbɛn ɨ shiʼnɨ ɨ shiʼnɨ ə. Wɛrə a tíʼ ngyen fu Akaiya, 3adiʼ wa wɛrə a tsínɨ́ ɨwu atú bɨsaŋ bi bɨtárə́ ghe. Wɛrə a kə́ nkyáŋtɨ́ ɨnye ɨzhi a ngén a Sirɨya mbáʼ wɛrə a tíʼnɨ́ nji ngə́ bə Yuda kə́ nkórə́ a mɨnaŋ mbɨ́ʼ ayi ɛ; ma lan, wɛrə a tíʼ ntsɔ́ʼ a mu ntəm zɨ ɨ bə bən nɨ ndóm Masedonia ghe. 4Wɛrə a ghɛ́n bo Sobeta wa a lónɨ́ a Bəria mbe mɔn Bairusɨ wu mbáŋnɨ́; nkwiʼtɨ Aristakusɨ bo Sekundusɨ ba bɨ lónɨ́ a Tesalonaika; abɔʼnɨ Gayosɨ wa a lónɨ́ a Dərɨbe; nɨ Taichikusɨ bo Trɔfimɔsɨ ba bɨ lónɨ́ a mbuʼ Esha; nkɨ ndzɔŋ nkwiʼtɨ a Timotyo ghe. 5Bo fóm ntsa mbyi ngɛ́n njwíʼtɨ́ awɨgɨ a Truasɨ ə. 6Nɨdorɨ nɨ Abán tɨ Mbɛgə ghɨnə ntsá, bɨgɨ lo a Filibi ngyiŋ nɨyen a mu nkyi ɛ. Njwi tsi tə̧̂ tsanə, bɨgɨ yen nkwati awa a Truasɨ, adiʼ wa bɨgɨ bo tsínɨ́ ɨwu atú njwi tsi samba ghe.
Baolo a Ghantɨ a Truasɨ a nye Ntsɨrɨndzum Nkfu ə
7A nye ntsambyi njwi a mu ngabɨ, bɨgɨ ghótɨ́ a ndzɨ́ ntárɨ́ ə. Baolo a ghám tsɛʼ ghamnɨ a mbó ɨbɛn nkɔʼ nkuʼ a ntɨŋ ɨtfúʼ, mbáʼ wɛrə a tsínɨ́ nɨ ɨ nyɛʼtɨ bo mbáʼ njwi lanə lá. 8Mɨnkaʼ mə ghaʼnɨ kə́ mbaŋə a mu kwasɨ ndá wa a tsínɨ́ atɨ́, wa bɨgɨ ghótɨ́nɨ́ wə mu a mu kɔ́ʼtɨ́ wa lá. 9Mɔn mbáŋnɨ́ wu tse wa ɨkum ɨyi bénɨ́ Yutikɔsɨ a shíʼtɨ́ ntsí a nye abuʼ a ɨfɛ́gɨ́ ə. Adzaŋ za Baolo a kɨ́nə́ ngamə ngěn nɨ mbyi tsɛʼ ghɛnɨ lá, Yutikɔsɨ a bíʼnɨ́ ntsɨ́ŋə́ ndyě, ndyé ndyé ndɨŋnɨ ɨ kɔʼ kuʼ a nye ɨfɨʼ za wɛrə a tsɔ́ʼnɨ́nɨ́ ngvó ndo a nye mɨkyebɨnɨ mɨ ndá ma mi mɨntárə́ ɨ shiʼ fu a tɨshe. Bɨ tɨnə tɨ yen byɛn ayi le a kfonə ghe. 10Lá Baolo a shíʼ ngɛn nkfuʼnɨ wu atú, nchwa ayi, ɨ soŋ ngə́, “A nɨ keʼ bɔgə, awa a bvurɨnɨ ntsi atú ntɨŋə!” 11Baolo a bə́ nkɔ́ʼ ngɛ́n a mu kɔ́ʼtɨ́ wa mbɛʼnɨ abán nkfúrə́. Wɛrə a tíʼə ntǎŋ ngam bo bɨ ɨbɛn ba bɨ nɨ́ŋnɨ́ mɨntəm ɨma a nye Kristo a nye abaŋ zə sa ɨ kɔʼ kuʼ nkfu za nɨnyom a sáʼnɨ́, ntiʼ nyɛʼtɨ awa ghe. 12Bo tíʼ ndɔgɨ a mɔn mbáŋnɨ́ wa atú ntən nkwɛn nɨ zɨ, məzen a be alɛtɨ a ntəm zə wi a mbó bo ghe.
Baolo a lo a Truasɨ Ngɛn a Milɛtusɨ ə
13Bɨgɨ tsá mbyi ngɛn a mu abáŋ a nkyi za, ntiʼ ngyiŋ nɨyen a mu nkyi ngɛ́n Asɔsɨ adiʼ wa bɨgɨ tsínɨ́ nɨ ndɔgɨ Baolo á wɛrə a kon a mu abáŋ a nkyi za. Wɛrə a sóŋ a mbó bɨgɨ ngə́ á bɨgɨ ghɨ ma lan, mbɨ́ʼ ngə́ wɛrə a yíŋ nɨyen be a tɨshe ngɛn ɨwu ə. 14Mbáʼ wɛrə a kwátɨ́nɨ́ awɨgɨ Asɔsɨ lá, wɛrə a kɔ́ʼ nkón a mu abáŋ a nkyi za bɨgɨ bo ghɛn a Mitailin ə. 15Bɨgɨ ló ɨwu ngyiŋ nɨyen a mu nkyi ngyen fu a ndaŋ ndzɨŋə Kayosɨ njwi zɨ mɔʼɔ ghe. Njwi zɨ mɔʼɔ bənə ndán, bɨgɨ tsi a Samosɨ, zɨ mɔʼɔ bənə tɨ lǎn, bɨgɨ kuʼ a Milɛtusɨ ə. 16Baolo a tsɔ́ʼ a mu ntəm zɨ a ngyiŋ nɨyen a mu nkyi, ɨ tosɨ tsa a Ɛfɛso tsɛʼ tosɨnɨ taŋ ɨ keʼ nkfu tse tsəŋ a mu mbuʼ Esha ghe. Wɛrə a kə́ nkɨənə ɨ ghɛn fu a Yerosalɛm a nkfu Bɛntɛkɔsɨ, mbáʼ be a chi fu adzaŋ məwa.
Nɨgham nɨ Ngǎ Fɨlye nɨ Baolo a mbó Ɨtú Ndáŋwi a Ɛfɛso ghe
17Mbáʼ Baolo a tsínɨ́ a Milɛtusɨ lá, wɛrə a tságɨ́ nkən a Ɛfɛso, ntɔŋ ɨtú ndáŋwi ngə́ á tsɨ yen mbom ayi ɛ. 18Bo ghɨnə ngyén, wɛrə a soŋ a mbó bo ngə́, “Nɨ zhi adzaŋ za ntsi mbyi ɨzan ɨ bénɨ́ a nye nkfu tsum za ma tsínɨ́ bɨgɨnə, nchwuʼnɨ a nye ntsambyi njwi za ma yénɨ́ nkón a mbuʼ Esha ghe. 19Ma kə́ faʼə ɨfaʼ ɨghan tso ngaŋ afaʼ Maʼmbyí, ɨ shíʼtə́ nɨ ɨnye ɨzan a ɨshe abɔʼnɨ nkyi a ɨmɨgɨ a nkfu za ɨdiʼ tə́nɨ́ a ɨnye me mbɨ́ʼ a mɨnaŋ wa bə Yuda bə tse kɨ́nə́ nkórə́ ghe. 20Nɨ zhi ngə́ ma sá lwɛʼ anu zə tse za a bénɨ́ kwátɨ́ awən a nkfu za ma kɨ́nə́ sóŋə́ anu a Ŋwi nkə́ ndíʼə asaŋəsaŋ abɔʼnɨ njwuʼ ɨtsən lá. 21A mbó bə Yuda abɔʼnɨ ba a se bə Yuda be, bo bɨtsum ma kwántɨ́ awa be tɨ́sə́n ngə́ á bo bəŋ mɨntəm ɨma a nye mɨbvu ɨma ntsi a bagɨ Ŋwi nkɨ nɨŋ mɨntəm ɨma a nye Maʼmbyí Yeso ɨwɨgɨnə ghe. 22Tɨtsɔŋnɨ, a ndzúʼnɨ́ Azhwi zə Fɛmnɨ, ma ghěn a Yerosalɛm, nkaʼ zhi a za a mɨ bom aghan ɨwu ə. 23Ma zhi tsɛʼ ngə́ a mu ntáʼmbagə wu wi ɨtsum, Azhwi zə Fɛmnɨ a kwantɨnə aghan ngə́ atsáŋ abɔʼnɨ ngɨ́ʼ zhwíʼtə́ aghan ɨwu ə. 24Lá, a mbó me, ma lɔgɨ ntsi mbyi ɨzan a nye azúm adaŋədaŋə; ma lǒ tsɛʼ ɨ mɛtɨ za ma funɨ abyɛn a faʼə ɨ kɨ mɛtɨ afaʼ za Maʼmbyí Yeso a ghánɨ́ a mbó me a faʼə ghe. Afaʼ məzen a tsi lá a sóŋ ntəm mbɨ́ʼ Nkən wu Shiʼnɨ mbɨ́ʼ abɔŋəntəm a Ŋwi ə.
25Ma numnə nkarɨ a tɨtərɨ bən, ɨ sóŋə́ anu a Nɨfɔ nɨ Ŋwi ə. Tɨtsɔŋnɨ ma zhi ngə́ ŋwɔn nɨ bən wu tse a láʼ keʼ aghan bə nkwiʼ ndze. 26Ma lan, ma soŋ ntəm ɨghan tɨ mɨghan ɨtfúʼ mbyi sɨŋə ngə́: be ŋwɔn nɨ bən wu tse a byé muŋ ka ma wɛm aghan anu ɨwu ə. 27Mbɨ́ʼ ngə́ ka ma chwa aghan anu zə tse a ndzum a nkfu za ma chwítɨ́nə́ a mbó bən, ɨnu ɨtsum tsa Ŋwi a kyáŋtɨ́nɨ́ mbɨ́ʼ awɨŋ ə. 28Ma lan, á nɨ lə atú nɨ ɨtumbəm ɨtsən nkɨ ndə atú a nye ɨbɛn ba bɨ nɨŋnɨ mɨntəm ɨma a nye Kristo ba Azhwi zə Fɛmnɨ a ghanɨ ngə́ á nɨ ndə̌tú nɨ bɛrə lá. A nɨ be bɨntsiŋ mɨnyam a nye ndáŋwi za a nɨ zɨ Ŋwi, za wɛrə a ghɨ́nɨ́ a nye ɨzhi ntsa a ndzum alɛm a Mɔn ɨyi lá. 29Ma zhi ngə́ a nkfu za ma mɨ nyɛʼtɨ awən lá, ɨbɛn mɨ kon a tɨtərɨ bən tso bəngwabaʼ bə mɨtsɛ́gɨ́ ɨ keʼ nyɛʼtɨ ɨbɛn ba bɨ nɨŋnɨ mɨntəm ɨma a nye Kristo tɨ satɨ awa ghe. 30Nkfu ghɨ yen za ɨbɛn ghɨ fú a tɨtərɨ ngǒtə ɨzən ɨ chwe ɨnu a ndarɨsɨ ɨbɛn ba bɨ nɨŋnɨ mɨntəm ɨma a nye Kristo á bɨ zɔŋ awa ghe. 31A nɨ lə ɨtú ɨtsən nkə́ ngwáʼtə́ ngə́ nɨ nkyi a ɨmɨgɨ, ma kə́ ndiʼə a ŋwɔn tsum a tɨtərɨ bən ɨ mɔ́ʼɔ́ mɔ́ʼɔ́ atú ɨlom tsi tárə́ nɨ ɨtfúʼ nɨ njwi ɛ.
32Tɨtsɔŋnɨ ma nɨŋ awən a mu mbó Ŋwi, nkə́ sóŋə́ a mbó bən ngə́ á nɨ waʼtɨ nkən mbɨ́ʼ abɔŋəntəm a Ŋwi za bɨgɨnə tsinɨ wə shwúrɨ́, nkən wa ɨ chinɨ ghɨ á nɨ kwi ɨ kɨ gha awən nɨ ɨfɔgə wa Ŋwi a tsinɨ nɨ wɛrə a mbó ɨbɛn ɨbyi bɨtsum lá. 33Ma sa tɛgɨ ntəm ɨghan a nye tsə́ŋtsə́ŋ ŋwɔn tse kə a nye ŋwaʼŋwaʼ ɨyi kə atsɛʼ azhi ɛ. 34Bɨŋ mboŋ nɨ zhi ngə́ nɨ mbó ɨman mɛnə, ma ghɨ́ azúm atsum za ngaŋ aku ɨtsan nɨ me kɨ́nə́ ndǒ ghe. 35Ma diʼnə a mbó bən a nye mɨndóm mɨtsum ngə́ a faʼə nɨ ntəm ɨtsum a nye ndóm wen, bɨgɨnə tsi nɨ ɨ zagɨ kwatɨ a ba bɨ ghɔnə, ɨ kə́ waʼtɨnə mɨgham ma Maʼmbyí Yeso zɨmboŋ a sóŋnɨ́ ngə́, ‹Ɨfɔgə wu wi tsi ɨwu a ngá ntsa a nkwárə́ ghe.› ”
36Baolo a ghɨnə mɛ́tɨ́, nkwem mɨkwiʼtɨ ɨmyi bo bo a tɨshe ntsaʼtɨ a Ŋwi ə. 37Bo bɨtsum kə́ mbúgə́ adzaŋ za bo kɨ́nə́ njíʼtə́ ayi a nɨgo ɨbo nkə́ nchwɨ́gə́ ayi ntiʼ nkɨ nga fɨlye ɨfi ɛ. 38Bo dzə́ŋnɨ́ be tɨ́sə́n mbɨ́ʼ ngə́ wɛrə a kwɛ́nə soŋ ngə́ bo láʼ keʼ ayi bə nkwiʼ ndze. Ma lan, bo zɔ́ŋ ayi ngɛn nkuʼ a nye abáŋ a nkyi za.
നിലവിൽ തിരഞ്ഞെടുത്തിരിക്കുന്നു:
Ɨfaʼ 20: MNT
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2023, CABTAL
