इफिसी 4
4
मसीह देह मेहे एकता
1याआ कोअता आय जो प्रभु मेहे बन्दी होय तुमाहा विनंती कोओहो का ज्याहा हादीई लाआ से तुमु हादाडये गोले होय तियाआ हाजी चाल साला, 2म्हणजे पुरो नम्रतेने अने सौम्यतेणे, अने धीर तोईत प्रेमोवाही एक दिहराआ सहन कोईलो; 3अने शांती बंधनाणे आत्माआ एकता मिकिलो यत्न कोईलो. 4एकुच डील होय, अने एकुच आत्माआ; एहलो तुमामे जे हादाडल्यो गोये ओते एकुच आशा होय. 5एकुच प्रभू होय, एकुच विश्वास, एकुच बाप्तिस्मे, 6अने आखाआ एकुच देव अने बाह्हू होय जो आखाजपो अने आखा मेहे अने आखाम होय.
आत्मिक वरदान
7पोन आमामेरोत प्रत्येकाहा ख्रिस्ताआ दानोओ परिणाम नुसार कृपा जोड़ी होय. 8याकोअता तो कोतले उसे सोढयू अने बंदिना बांधित लेत गोल्यो, अने माहुहुं दान आप्लु. 9(तियाआ सोडलोओ, अने की जोड्यो फक्त का तो धरती निसे जागामे उतरीलो बी ओतु. 10अने जे उतरीत्ले गोये ओतो तोज होय जो पुरो जुगोम सोडवीत बी गोल्यो का थोडो किबी पुरोओत कोयु). 11तोओ थुडाहा जनाला प्रेषित नेमित, अने थुडाहा सुवार्ता होमलिलो नेमित, अने थुडाहा रखवाला अने उपदेशक नेमित आप्लु, 12ज्याही पवित्र मांहे पूर्णता उवनारा जायलो अने सेवेए काम कोयु जालो अने ख्रिस्ताआ डील उन्नति जोडे, 13जावु जाका आमू आखाहा आखे विश्वास अने परमेश्वरोओ पोऱ्यापो ओलखेए एक न उवनारा जानारू, अने एक सिद्ध मांहु न बोणीत जालो अने पूर्णता जोडयो उवे. 14म्हणजे आमू या आगाडी पोऱ्ये नाय रोही जे माहांआ ठोग विद्या अने चतुराईनी, भ्रातिई मार्गा युक्तीवाही अने उपदेशरुपी हर एक वाराआ आल्तलो अने इही तीही फिरीविलो जाहो. 15पोन प्रेमा माय खोरोवाही सालीलावेले आखे गोठीमेहे तियाआ माय जो बारी होय, म्हणजे ख्रिस्तामेहे वोदतो जालो, 16ज्याही पुरो डील, हर एक सांध्याच्या योगे एकठे होतगोयो अने एकठे गडकर, तिया-तिया प्रभावाआ अनुसार जो हर एक अंगआ वारुहू हारकीज काम कोइलाआ व्दारे तियाआमे आपाआ माह कोतली का तो प्रेमोमेहे उविला कोअता उन्नति कोईत ओते.
नवलो मांहो
17याकोअता आय ओ कोत्लू अने प्रभूमे आग्रह कोअत्लू का जेहलो अन्यजाति मांहे आपाआ मोनोमेहे भ्रष्टतेत सालत्ले तुमु ओमोरोत फासी एहलो नाहा चालीलो. 18काहाके तियाआ बुद्धी आंदाराम उवनारा गोयी होय, अने तिया मोनो अज्ञाच्या कारनो कोईत ते देवाच्या जीवनामे रोत अलग कोयु होय, 19अने ते ठावकू उवनारा लबाडीमेह लागित गोये होय का आखे प्रकारोओ वाईट काम लालुस सी कोअया कोए. 20पोन तुमु ख्रिस्तआ एहली शिक्षाम नाहा जोड़ी. 21पोन तुमु खोरोज तीयाआज होमलित अने, जेहलो येशुमेहे खोरो होय, तीयाम हिकाडये बी गोये 22का तुमु फासाडी चाल नोरो जूनो जुनो मांहाहा तो कपटाओ वासनावाही युक्त ओमेत तिया नाश उवनारा जात होय, उतरित टाका 23अने आपाआ मोनोमेहे आत्मिक स्वभावोमे नवो बोनावोओ जालो, 24अने नवो मांहाहा पेईत लेवा जो देवाआ धार्मिकता अने पवित्रता यांनी युक्त रोहू.
आत्माहा शोकित मा कोअहा
25कोईत ठग सोडीत एकमेंकारी खोरो गोगे, खोटो गोगोहो कायना, काहाके आपु एकादिहरा अवयव होय. 26खोत ते को, पोन पाप नाहा कोहू; दिह मावळे तोपोरोत तुमाआ खोत न रोअलो, 27अने न शैतानोहो जागू आपा. 28चोरी कोअनारू ईजि चोरी नाय कोईओलो, पोन हाजो काम कोईलावाही आपाआ आथोसी परिश्रम कोईलो याकोअता का ज्याआपो आय तियाहा आपलो तियाआ जागे किबी रोहू. 29कोडली वाईट गोठी तुमाआ सोबिमरोत नाहा निगोये, पण गरजो अनुसार तोज निहीकोयी काजे प्रगती याकोअता उत्तम होय, म्हणजे तियाआ होम्लिनारा पोओ कृपा होय. 30देवाआ पवित्र आत्माहा खिन्न नाहा कोहू, ज्याही तुमापो छुटकारा दिहे पर्यंत मुद्रित ओवयू होय. 31तीन आखेज प्रकारे कटूत्व, अने खोतलाघी अने राग अने कलकलाट, अने निंदा, आखे दृष्टपणा सुद्धा तुमाआ सेटे कोयु जाल. 32एक दिहरापो उपकार अने कीव कोअत्लू व्हा, अने जेहलो देवूही ख्रिस्तामध्ये तुमाआ अपराध क्षमा कोल्यु, तेहलूज तुमु पोन एक दिहराआ अपराध क्षमा को.
നിലവിൽ തിരഞ്ഞെടുത്തിരിക്കുന്നു:
इफिसी 4: NOINT
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Noiri (नोयरी) Bible by The Love Fellowship is licensed under Creative Commons Attribution-ShareAlike 4.0 License.