Zaŋ 20
20
Ɛvit toto
1Kɛɛŋ tɔ ghooghom mɛlem mɛ dwoo yenga, Maali moma dɛl Makdala eezɛtɔ́ pɛ ɛvit. Nyɛ kabee ɛ́, ɛvit moo mbek, boo ɛkok ɛ́ nadi ediyalaa ɛvit nɛ yɛ ɔ, moo biŋela é ngwoob ɛvit. 2Nyɛ eezɛsum kaab, tɔ́, kɛboma nɛ Simɔŋ Pyɛɛd nɛ dhiiti djekel ɛ Yezu nadi ekwyɛl ɛbuɛpe ɔ. Tin, nyɛ eezɛlɛɛ bɛ náá: «Bɛ eedis muu ɛ Ghɛŋ tɔ ɛvit ɛ lɛ. Bis ààgu pɛ kyee bɛ kɛnɛɛg nyɛ ɛ.»
3Tin, Pyɛɛd bɛ nɛ dhiiti djekel eezɛnɔɔ mɛnyel tɔ́ pɛ ɛvit ɛ tak. 4Bɔɔ djas bɛbá eezɛsum kaab. Dáa bɛ nadi ekaab ɛ, dhiiti djekel yenɔk naadhaa Pyɛɛd nɛ kaab, nyɛ eezɛkum pɛ ɛvit ɛsok. 5Tin, nyɛ eezɛmalal gwyák tɔ ɛvit, nyɛ kabee ɛ́ bɔɔ epes ekaad ee bɛ nadipal Yezu nyel nɛ yɛ ɛ, nɛɛga si. Nyɛ kadi ɛ́, ààni tɔ́ ɛvit. 6Simɔŋ Pyɛɛd mot nadi edu nyɛ pɛ bhis ɔ eebaazɛkum yɛ. Wɔ gwaa, nyɛ zɛni tɔ ɛvit, nyɛ kabee ɛ́ bɔɔ epes e kaad bɛ nadipal nyɛ nyel nɛ yɛ ɛ, nɛɛga si. 7Dɔɔ nɛ bhɛɛ bɛ nabutal lo ɛ Yezu nɛ yɛ ɛ. Bhɛɛ tak nabɛ ɛ́ ààdi é di wat nɛ bɔɔ epes e kaad bɛ nadjɛl nyɛ nyel nɛ yɛ ɛ. Bhɛɛ nadi ɛ́, pila é dhiiti di. 8Tin, djekel naleekum ɛsok ɔ, zokazɛni tɔ ɛvit. Dáa nyɛ nabee deenek ɛ́, nyɛ eezɛdum koŋ nɛ Yezu. 9Tin, kɛkum ɛwala ɛlenek, bɛdjekel ɛ tak nabɛ ɛ́, bɛ dinaa ààmɛt ɛsuk ɛ Ekwyala yii Zɛɛb di eke náá, Yezu nawaadi ɛ́ gom tɔ ɛsyee ɛ. 10Bhii tak, bɛdjekel binɔk bɛbá eezɛsik, tɔ́ pɛ ndjaŋ'ɔɔ.
Yezu eezɛlyaal Maali moma Makdala nyel
11Maali nadi ɛ́ tetel pɛ kel é ngwoob ɛvit, nyɛy edje. Dáa nyɛ nadi edje ɛ, wɔ gwaa nyɛ malal, gwyák tɔ ɛvit. 12Nyɛ kabee ɛ́, efofop ebá nɛ ekaad e na puu é mɛnyel, bɔɔ mendiindil é di bɛ nanɛɛg muu ɛ Yezu ɔ. Ngɔt pɛ kyee bɛ nanɛɛg lo ɛ Yezu ɛ, nwyak ngɔt pɛ kyee mɛko. 13É di'enek, efofop eezɛdji nyɛ náá: «Wɔ dje yé?» Nyɛ eezɛbɔɔza nɛ nɔɔ náá: «Bɛ eedis Ghɛŋ'am, mɛ ààgu pɛ bɛ kɛnɛɛg nyɛ ɛ.»
14Dáa nyɛ nalii deenek ɛ́, nyɛ eezɛliig mis, nyɛ eebee Yezu tinaak tetel. Tin, Maali nabɛ ɛ́ ààgu náá, ye nabɛ ɛ́ Yezu. 15Wɔ gwaa, Yezu zɛdji náá: «Wɛn moma, wɔ dje yé? Wɔ saa zɛ?» Nyɛ nagu ɛ́ náá, ye nabɛ ɛ́ mot-mɛsa mɛ bok. Yɛ ɛ́ étɛp tak ɛ nyɛ nabɔɔza nɛ nɛ náá: «Ghɛŋ, yɛ bɛ náá, wɔy ɛ dis nyɛ ɔɔ, lɛɛa mɛ pɛ wɔ kɛnɛɛg nyɛ ɛ, mɛ neetɔ́, kɛnɔɔ nyɛ.» 16Tin, Yezu eezɛke nɛ nɛ: «Maali!» Nyɛ eezɛliigel, gwyák pɛ Yezu nadi ɛ́. Bhii tak, nyɛ eezɛlii nɛ nɛ tɔ lii eBhele náá: «Labhuni!» Ye kwyɛl ɛlɛɛ ɛ́: «Lyoel». 17Yezu eezɛke nɛ nɛ náá: «Nàmɛt mɛ etɛɛ náá, mɛ dinaa ààpabyet pɛ daa Saagam. Deenek, tɔ́a, kɛlɛɛ nɛ bɔn-nyɛɛg bam náá, mɛ ɛpebyet pɛ daa Saagam, mot baadi pe Sɛɛg'en ɔ, pɛ daa Zɛɛb'am, mot baadi pe Zɛɛb'en ɔ.»
18É di'enek, Maali moma dɛl Makdala eezɛsik, tɔ́ pɛ bɛdjekel nadi ɛ, nyɛ eekɛlɛɛ bɛ náá: «Mɛ eebee Ghɛŋ!» Bhii tak, nyɛ moo elɛɛ bɛ etɛp ee nyɛ nalɛɛ nyɛ ɛ.
Yezu eezɛtel bɛdjekel bɛ nyel
19Ye nazobɛ ɛ́ dwoo yenga tak wat bikoko, bɛdjekel nadi ɛ́ bɔɔ djas é di wat tɔ dhiiti ndjaa. Ye nabɛ ɛ́, bɛ eekɔɔl ɛbɛ ɛ ndjaa ghiŋ, etɛɛ náá, bɛ nadi ekaab ekukuma eYuda. Yezu eezɛzyɛ, nyɛ eezɛtyaa tetel kuku ɛbwak ɛ lɔɔ. Nyɛy nɛ nɔɔ náá: «Egwyem di nɛ nen!»
20Tin, dáa nyɛ nasilal ɛke nɛ nɔɔ deenek ɛ́, nyɛ moo tin elyaal bɛ ebham mɛpyoŋ mɛmbɔ mɛ, nɛ yii ebhaaz bɛ. É di'enek, elyem e bɛdjekel nadi ɛ́ tɔɔɔ nɛ mɛmyaala dáa bɛ nabee Ghɛŋ ɛ. 21Yezu eebaazɛke nɛ nɔɔ náá: «Egwyem di nɛ nen! Dáa Saagam nalwom mɛ ɛ, mam pe mɛ eelwom bin.»
22Bhii mɛkpa menek, Yezu eezɛwuubal kɔ lɔɔ, nyɛy nɛ nɔɔ náá: «Nɔɔka Sisim na Dɛɛ! 23Bot ɛ bi aapel mesyem mɔɔ ɔ, mesyem mɔɔ waapelel. Bot ɛ bi aapɛɛ ɛpel ɛ mesyem mɔɔ ɔ, mesyem mɔɔ aanàkwaapelel.»
Yezu eezɛtel Toma nyel
24Ghuna ngɔt tɔ bɛdjekel kam nɛ bɛbá, Toma mot nagetaa din ɛ Ɛwas ɔ, nabɛ ààdi tak é ghɛŋ Yezu natel bɛ nyel ɛ. 25Tin, bɛdhiiti bɛdjekel zokazɛlɛɛ nyɛ náá: «Bis eebee Ghɛŋ!» Wɔ gwaa, Toma zɛbɔɔza nɛ nɔɔ náá: «Mɛ di ààbee ebam e mɛpyoŋ mɛ epɔndi tɔ mɛmbɔ mɛ ɔɔ, mɛ di ààwa djin tɔ ebam e mɛpyoŋ mɛ tak ɔɔ, mɛ di ààwa mbɔ tɔ bam bɛ nalum nyɛ ɛkɔɔ é ebhaaz ɔɔ, yɛ di ààbɛ deenek ɔɔ, mɛ tok nɛ ghwyil ɛmyaal.»
26Yenga wat bhii tak, bɛdjekel nabaadi ɛ́ zɛɛga é di wat tɔ ndjaa. Toma nadi ɛ́ tin, bɛ nɛ bɛnɔɔ. Mɛbɛ mɛ ndjaa nadi ɛ́ ekɔɔla ghiŋ. Tin, Yezu eezɛtuula, nyɛ eezɛtyaa tetel kuku ɛbwak ɛ lɔɔ. Nyɛy nɛ nɔɔ náá: «Egwyem di nɛ nen!» 27Bhii tak, nyɛ eezɛke nɛ Toma náá: «Wa djin'ɔ wak, da wɔ ɛ́ bee mɛmbɔ mam. Sɛɛba mbɔ'ɔ, da wɔ ɛ́ zɛwa tɔ ebhaaz bam. Kata ɛswonal, da wɔ ɛ́ dum koŋ nɛ Zɛɛb!» 28Tin, Toma eezɛbɔɔza náá: «Ghɛŋ'am, Zɛɛb'am!» 29É di'enek, Yezu eezɛke nɛ nɛ náá: «Wɔ dum koŋ'ɔ nɛ nam ɛ, etɛɛ náá, wɔ eebee mɛ? Ɛnyɔ nɛ bot ɛ di edum koŋ nɛ nam, bɔɔ ààbee mɛ ɔ!»
Mɛsɔ mɛ mɛkana mak nakwyalaa ɛ
30Yezu naasa dhiiti bɛtɛ nɛ endem e mɛbwala é mis mɛ bɛdjekel bɛ, ee di ààdi kwyala tɔ mɛkana mak ɛ. 31Yak tak nakwyalaa ɛ́, étɛp bi neemyaal náá, Yezu ɛ́ Mɛsia Mɔn ɛ Zɛɛb. Tin, bi ɛ dum koŋ nɛ nɛ deenek ɔɔ, bi ɛ́ waabela tsik na kɔm-kɔm nɛ din ɛ lɛ.
നിലവിൽ തിരഞ്ഞെടുത്തിരിക്കുന്നു:
Zaŋ 20: bkwNT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© (Active), Wycliffe Bible Translators, Inc. All rights reserved.
