Mareke 14
14
Amfumu ba akura ncuumu ma Jezu
(Lekese se Matye 26.1-5; Luke 22.1-2; Jan 11.45-53)
1Ecugu jwele kiigi ba abaana kiza le Pake bila lempeembe eli anganga kali. Ampi ambwoŋi bila ayizigi angiri ba asaga osumbu ma kakwara Jezu ma kaswogo bila ma kabuma nde. 2Okorogo, bo aki duga ndi: «Lebiza nde kakwara ma cugu le kiza. Asoke, baari ba asa ngimiŋa.»
Okaazi alege ananasi kayila ocu o Jezu
(Lekese se Matye 26.6-13; Jan 12.1-8)
3Jezu kiigi ka Betani, kanca njo Simo nga ebila. Ma ntini ye kiigi nde yila mbisa, okaazi omo nyunuŋi bila kave ka mbaza ka kamaalula ma ananase antali, ye amaasa ma maari maave. Nde buli mbaza ŋa yiri mo kayila ocu o Jezu. 4Ake ba akiigi kaŋa amoni otuma obi ŋa bo adugi kampanaŋa ndi: «Meema ba abiiza ananase ma? 5Kiigi lebuna katege ananase ma ntali ekuumu esyami, ŋa lempi ampara ma ŋa afuga!» Ŋa bo atigi maabi ma okaazi wua. 6Ŋaa Jezu dugi bo ndi: «Lenyina nde pii. Meema be lempa nde mberi? Ma nde ma kasi mi kasima keeve. 7Kabila be ŋa afuga bila be, ŋa be lebuna sa bo leve antini aso ma jii be. Ŋaa mi, be le kaaje kaka bila mi antini aso ŋi. 8Okaazi wua osi ma nde ma kabuni. Nde baani legi ananase yila njuru a mi, mabuni akozo yo ma muuma. 9Mi eduga be, jaajaa: mpini biri eli baaje kampa Ncya Yeemve kanca okiri oso, ba asamaŋa ma si okaazi wua, ŋa baaje kabaraga nde.»
Juda jii katege Jezu ŋa amfumu ba ampi ambwoŋi
(Lekese se Matye 26.14-16; Luke 22.3-6)
10Ŋaa Juda Izekariyote, omo kanca alwoni akuumu ŋa bwele, yeni moni amfumu ba ampi ambwoŋi. Nde jii ma katege bo Jezu. 11Bo amoni kase ma kayuga nde ŋa ampi nde ndagi ma kampa nde ampara. Ŋa Juda sagi oyeri ba katege Jezu.
Jezu ayaga biila ba Pake bila alwoni a nde
(Lekese se Matye 26.17-25; Luke 22.7-14,21-23; Jan 13.21-30)
12Cugu lencomi ye kiza leba aja mpeembe ye kaami anganga yia, cugu le baasa ambwoŋi ba anyama ma Pake, alwoni a Jezu apizi nde ndi: «Kakunu we jii ni bizi le laama biila e Pake?» 13Ŋaa Jezu tumi alwoni a nde bwele ma kaduga ndi: «Leje kanca kangundu, ŋa be levunuŋa bila balaga lemo ye abira mpya ye anja le lwono nde, 14ŋa kaŋa eli nde anyunuŋa, leduga ŋa nga njo ni: “Oyizigi apiza: biri eli mi aja biila ba Pake bila alwoni a mi kunu?” 15Ŋa nde aje kamvyere be katini ka njo keenini ka yulu eli ko ŋa biibi eso ama mana suuza. Yia biri yeeje kalaama be biila e bizi a be.» 16Alwoni ayeni kangundu, bo abarigi eso mva e Jezu ba ka kiigi duga bo, ŋa bo alaami biila ba Pake.
17Ekolo eto, Jezu yi bila alwoni kuumu ŋa bwele. 18Ntini ye kiigi bo ka mbisa ŋa bo kiigi baaja, Jezu dugi ndi: «Mi eduga be, jaajaa, omo kanca be wo aja bila mi, aje katege mi.» 19Alwoni etuma eseligi bii ŋa yiga omo ŋa omo apiza nde ndi: «Mfumu, mi?» 20Jezu kaali ndi: «Omo kanca be, ba kuumu ŋa bwele, mbuuru wo alege kwogo ka nde bila ka mi kanca eja. 21Mwana Mbuuru akpa mva lemigi lekani Ampiri, ŋaa ndogo ma mbuuru wo atege nde wua. Kiigi tata nke akikula mbuuru wua ŋi.»
Biila e Mfumu
(Lekese se Matye 26.26-30; Luke 22.14-20; 1 Kore 11.23-25)
22Ntini ye kiigi ja bo, Jezu yagi lempeembe, mpi Njyami leve, nde cagi lo ma etini, ŋa mpi alwoni a nde, ŋa nde dugi bo ndi: «Leyaga be leja, yo ŋa kamaka njuru a mi.» 23Amana nde yagi mbaza mali, nde mpi Njyami leve, nde mpi bo mbaza ŋa bo aso anywi. 24Jezu dugi bo ndi: «Lya kamaka togi le mi, togi le Obuga o Njyami. Lo leyirigi ma bege le baari. 25Mi eduga be, sisyele, mi ekama nywa mali ma mburu ye vinye ŋi, tii cugu eli mi eje kavura nywa ma anyarigi bila be, kanca omfumu o Njyami.» 26Bo ayumi aluumu ma kiza ma kampa Njyami leve, amana bo ayeni yila kakuru ka Olivye.
Jezu awobo ma etuni e Pyere
(Lekese se Matye 26.31-35; Luke 22.31-34; Jan 13.36-38)
27Jezu dugi ŋa alwoni a nde ndi: «Be aso lenyina mi, kabila ba atanga kanca Abuku a Cece mini: “Mi eje kabuma okyele endombo ŋa oju wo endombo beeje kacamaŋa.”» 28Jezu alusa ndi: «Ŋaa ntini yeeje kayuga mi ma leku, mi eje kanjila be ka Ngalile.» 29Pyere ŋa nde ndi: «Se abuga aso anyini we, mi eje kanyina we ŋi.» 30Ŋaa Jezu kaali nde ndi: «Mi eduga we, jaajaa: lubu, lempiibi lomankulu li kabaana kwogo cuzu nja ywele, we aje katuna mi nja tari.» 31Ŋaa Pyere seligi kaali bila mpari ndi: «Se mi ekpa bila we, mi eka tuna we ŋi.» Ŋa alwoni aso adugi jaa lomankulu lya.
Jezu abwono ka Ngetezemane
(Lekese se Matye 26.36-46; Luke 22.39-46)
32Bo ayi ka biri ye ba acwolo Ngetezemane, ŋa Jezu dugi ŋa alwoni a nde ndi: «Leka manci kakuni, ma ntini ye je mi ma kabwono.» 33Nde biri bila nde Pyere, Jake ŋa Jan. Nde yiga baani ma kamono obi ŋa oselegi bagi obwogo, 34ŋa nde dugi bo ndi: «Omwo o mi omi mono obi tii leku. Leka kakuni, leka mwo.» 35Nde tiini laa nceti, nde beri kalya ma ncye ŋa bwoni mabuni aka kiigi ba abuna, nde ki yira ma tari lempasi lya ŋi. 36Nde kiigi duga ndi: «Aba, Taara, ma we, eso we abuna, cyeze mi mbaza ye mpasi yi. Ŋaa kali, ka ma jii mi ŋi, ŋaa ma jii we.» 37Nde yi vuruga mpila alwoni atari ŋa barigi bo ba apwo tolo. Nde dugi ŋa Pyere ndi: «Simon we li tolo? We ki buna kaka mwoyi se tari lemo ŋi? 38Leka mwoyi ŋa lebwono, mabuni abira be kamiga. Oduduma mbuuru ŋa jala kasa leve, ŋaa akabi anjuru mpari kali.»
39Nde vuri yeni lala ŋa bwoni ma kaduga ambari momankulu ma. 40Amana nde yi vuruga mpila alwoni atari ŋa barigi bo ma tolo, bo kiigi ba kabuna kakyele miizi bolo ŋi. Ŋa bo aki ya kalogo ka kaduga nde ŋi. 41Ntini ye yi nde ma nja ye otari, nde dugi bo ndi: «Be levuri mpwoyi tolo, ŋa be le wuuma? Bwa emito! Tari lemiya. Yiga, Mwana Mbuuru amitege ma njyala ba anga maami maabi. 42Be letemeŋe, ŋa leje, kabila mbuuru wo atege mi li kaŋa.»
Ekwari e Jezu
(Lekese se Matye 26.47-56; Luke 22.47-53; Jan 18.3-12)
43Jezu kiigi kini awobo ntini ye yi Juda, omo kanca alwoni ba kuumu ŋa bwele. Bila nde kiigi ŋa kuna le baari bila anguma ba angulu bwele ŋa ankomoŋo. Ba atiini bo kiigi ampi ambwoŋi ba anini, ŋa ayizigi angiri bila akuuru. 44Juda, kiigi mbuuru wo atege bo Jezu, kiigi ma amana kasamaŋa lembuuru kaliimi eli nde asa: «Mbuuru eli mi eporo, kamaka nde, lekwara nde, leya bila nde ŋa lekyele nde yemiŋi.» 45Kancinci, Juda yi ciina mpaana Jezu ŋa nde dugi nde ndi: «Oyizigi» ŋa pori nde. 46Ŋaa bo alegi kwogo yila Jezu ŋa akwari nde. 47Omo kanca ba kiigi bila Jezu jiimi nguma, beri oyiga wo ompi ambwoŋi woonini ŋa cagi nde cu. 48Jezu dugi ŋa bo ndi: «Be leyi yaga mi bila anguma ŋa ankomoŋo, mva ni mi opira? 49Ecugu eso mi kiigi bila be ŋa mi kiigi yiziga kanca lebugu le Njo Njyami yeenini. Ŋaa be leki kwara mi ŋi. Ŋaa bwa eyi mabuni Ampiri ayi.» 50Ŋaa alwoni aso anyini nde ŋa adumi. 51Onkere balaga lwoni nde, ma laaza kalembe. Akwari nde, 52ŋaa nde nyini kalembe ŋa dumi ojuumu.
Jezu ka ovuzu ba oju wo amfumu ba aJife
(Lekese se Matye 26.57-68; Luke 22.54-55,63-71; Jan 18.13-14,19-24)
53Bo ayi bila Jezu mpila ompi ambwoŋi. Kaŋa, ampi ambwoŋi aso, akuuru bila ayizigi angiri akugi. 54Pyere lwoni Jezu kalala ŋa nde nyunuŋi kanca lebugu le njo ompi ambwoŋi. Kaŋa, nde vi mancina bila ajanji ŋa nde kiigi yolo tuga mbaa.
55Ampi ambwoŋi bila oju wo amfumu ba aJife aso asagi otemi ma Jezu ma kasa nde kabuma, ŋaa bo aki baraga ŋi. 56Okorogo bege le baari ba ampa otemi ba oca ma nde, ŋaa bo ojugu ki omo ŋi. 57Ake atemiŋi ŋa bo akati Jezu ma kaduga alaa ndi: 58«Bizi le yugi kaduga nde mini: “Mi kiigi eje kacala Njo Njyami yia ye ncwi baari, ŋa ma ecugi etari mi eje kancwi yo ma ecugu etari, eli ki janja le baari amwo ŋi.”» 59Ŋaa se yila jaa lya otemi o bo aki baga ojugu omo ŋi. 60Ŋaa ompi ambwoŋi temiŋi ka ovuzu o baari ŋa pizi Jezu ndi: «We aka kaala ŋi? Baari ba buni ba aduga ma we?» 61Ŋaa Jezu ki pi, nde ki kaala ŋi. Ompi ambwoŋi vuri pizi nde ndi: «We Masiya, Mwana Njyami wo abwono bizi?» 62Jezu kaali nde ndi: «Ee, mi nde! Ŋa be aso leje kamono Mwana Mbuuru mancina ma kwogo ka kalumu ka Njyami wo mpari, be leje kamono nde se aya kanca kaduba ka yulu.» 63Ŋaa ompi ambwoŋi woonini pazi amfa a nde ŋa dugi ndi: «Bizi yiga kaama ma atemi kali. 64Be lemiyuga katugi ka nde ka kaasi ma Njyami. Be buni lebaraga?» Bo aso apami nde ŋa bo adugi ndi ave nde kakpa. 65Ake kanca bo acuti nde atayi, ŋa bo afugi nde kalya, aberi nde enkono ŋa bo adugi ndi: «Yiba mbuuru wo beri we!» Ajanji ayagi Jezu ŋa aberi nde ampali.
Pyere atuna Jezu
(Lekese se Matye 26.69-75; Luke 22.56-62; Jan 18.15-18,25-27)
66Pyere kiigi kabere kanca lebugu, ntini ye yi ojanji wo okaazi omo wo ompi ambwoŋi. 67Okaazi omoni Pyere ayoro mbaa, nde kesi nde ŋa dugi nde ndi: «We se, we kiigi kaŋa bila Jezu wo Nazarete.» 68Ŋaa Pyere kaali ndi: «Kali! Mi e kayuga ma duga we ma ŋi!» Amana, nde yeni onywa lebugu. [Ŋaa ncuzu kwogi#14.68 Ampiri ake akala maami ma kali. Ŋaa ncuzu kwogi.] 69Ojanji wo okaazi moni Pyere ŋa nde baani kaduga ŋa baari ba kiigi kaŋa ndi: «Balaga li lemo kanca bo!» 70Ŋa Pyere vuri tuni nde. Ebiga nceti, ba akiigi kaŋa akiigi vura duga ŋa Pyere ndi: «Jaajaa, we omo kanca bo, kabila we se, osi Ngalile.» 71Ŋaa Pyere ti osarigi: «Ndi Njyami kasisa mi aka mi eduga alaa! Mi elaba, mi ki ya balaga li ŋi.» 72Ma ntini yomankulu yia, ncuzu kwogi puu le oywele, ŋa Pyere barigi ma kiigi duga Jezu nde ndi: «Kabaana ncuzu ka kwogo pu le oywele, we atuna mi apu atari ni we ki ya mi ŋi.» Ŋaa nde yiga alila.
നിലവിൽ തിരഞ്ഞെടുത്തിരിക്കുന്നു:
Mareke 14: teg
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
