Luke 9
9
Jezu atuma alwoni a nde
1Jezu kuzigi alwoni a nde ba kuumu ŋa bwele, ŋaa nde mpi bo mpari bila onkani ma kacura epundu beebi eso, ŋa ma kasalaga anga angayi. 2Ŋaa nde tumi bo ma kalyele ncya ye omfumu o Njyami, bila kasalaga abieri. 3Nde ŋa bo ndi: «Kaaje be, be lebizi kalogo kayaga: Se pangi, se mpye, se biila ba kaja, se ampara, nca be mbuuru ki bira amfa mwele ŋi. 4Mpini njo ye ba ayamba be, be leki kaŋaa tii kaya vuraga be. 5Ŋaa mpini biri ye ba bira be kayamba, be lecyegi kaŋaa, ŋaa be le kubugi nceri yeeli ma miili e be, ma kalyele ndi ami yieze bo.»
6Jezu kamana kalyele, alwoni a nde ayeni nca ampugu ŋa ampugu, ma kampa mbari a Njyami, ŋaa bo ba kasalaga anga angayi.
Erode asaga mono Jezu
7Ŋaa onkunji wo acwoli ma Erode wo kiigi ma mbara ka Ngalile kayuga maami aso ma ayiri maa. Nde sagi oyeri ba kasa, nde kwoni, kabila baari baamo ba kalyele ndi: «Nde ni Za Batise nyuzuga kanca baari ba ama akpaa.» 8Ma baamo ndi: «Nde ni Eli ya vuruga.» Abuga akima ndi: «Omo nca antuma-Njyami akala mi ya vuruga.» 9Ŋaa Erode ndi: «Nde wua se na okima? Mi ma atuma aworo a mi, ma kacaga Jan ocu. Wo ba alyele amaami maanini ma nde wu, wunu?» Kayila ŋaa Erode asaga kamono Jezu.
Jezu abunuŋa ekwumu ba ankama abaari kuumu (5.000)
10Antuma a Jezu awa onjia, bo anaani nde maami masi bo aso. Nde yeni bila bo ma katege, ma kacu ka kangundu ka Betezayida. 11Ŋaa lembuuru le ma ya biri le yeni Jezu, lo le lwoni nde. Jezu yambi bo, ŋaa nde wobi bo ma omfumu o Njyami, ŋaa nde saligi baakiigi ŋa kaama ndi asalaga bo. 12Cugu yiga le ekolo, ŋaa antuma a nde ba kuumu ŋa bwele ayi mpaana nde, ŋa bo ŋa nde ndi: «Vuta baari aje nca ampugu bila nca empumpugu, beeli mpaana ŋa, eli bo abaga ebiri ba atolo bila elogo ba aja bo. Kabila bizi a be leli nca biri eli elogo kali.» 13Ŋaa Jezu ŋa bo ndi: «Bemankulu le mpa bo biila ba kaja.» Ŋaa bo baakaala ndi: «Kayila bizi ŋa ampeembe taani bila ancu bwele. We asaga ni bizi leje suuma biila e baari aso?» 14Ŋaa kanca ŋa kiigi ankama ma abalaga kuumu (5.000). Jezu ŋa antuma a nde ndi: «Lelyele bo aka manci ma anjiimi ma ekuumu e baari etaani.» 15Bo anyiimi, bo asuuzi baari aso manci. 16Ŋaa Jezu yagi mpeembe ye taani bila ancu a bwele, sati miizi ka yulu, mpi Njyami leve ma biila bya, ŋaa nde cebi amana nde mpi antuma a nde ma kakaba baari. 17Mbuuru ŋa mbuuru ji, yurigi. Ŋaa bo atolo etini ba ancu bila ampeembe ba esiili, bo alusi angulu kuumu ŋa mwele.
Pyere alyele ndi Jezu ovuzigi wo Njyami
18Cugu lemo Jezu kiigi maaje bwono Njyami kanca biri le nde otu. Ŋaa alwoni a nde ayi baraga nde, ŋaa nde apiza bo ndi: «Baari ba alyele ndi mi na?» 19Alwoni a nde ayaligi ndi: «Ake ndi we Za Batise, ma baamo ndi we Eli ntuma Njyami, akima ndi we ntuma Njyami wo kala wo ma ya vuruga yila ncye.» 20Jezu vuri pizi bo ndi: «Ŋaa ma be, be bunu le elyele?» Pyere kaali ndi: «We Masiya ntuma Njyami wo kaswolo.»
21Ŋaa Jezu ligi bo ndi: «Be le bizi mbuuru kalyele.» 22Nde lusi ndi: «Ave mi wo Mwana Mbuuru moni mpasi yeenini. Ŋa ankani ba kasi, ŋa ankuuru bila ampi ambwoŋi baanini bila ayizigi angiri baabele nde, bo baabuma nde, ŋaa cugu le otari nde anyuziga.» 23Jezu ŋa bo aso ndi: «Mbuuru ka jia ndi nde alwono mi, nde nyini osumbu wo baasa nde, nde biri lemaanji le ndemankulu, ŋaa nde nami mi antini aso.» 24Ma bwa mbuuru wo akaana ma kakyele osumbu wo baasa nde, akpa. Ŋaa we abaga leku ma nkuumu a mi, nde abaga omuon. 25Yo ŋaa aka mbuuru ŋa kabaga kayila ncye eso, ŋaa nde ka kama omuon, kaabaga nde kama? 26Ŋaa mpini mbuuru wo amono okuru ma mi, ŋaa ma mbari a mi, mi se wo Mwana Mbuuru emono okuru ma nde, ntini ye ya mi nca lekuma le mi, ŋa le Taara Njyami bila antuma a nde acece. 27Ee! Mi elyele be jaajaa, ake nca be, ba aka sa akpa eli bo akini mono omfumu o Njyami ŋi.
Jezu amvyere lekuma le nde
28Jezu kamana lyele bwa ecugu mpwomo eyiri. Nde yagi Pyere, Jan, Jake bo ayeni yila kakuru ma kabwono. 29Ntini ye kiigi bwono Jezu, lemigi le kalii ka nde le kaali, ŋaa mfa nde eseligi fuumi. 30Parabu, abalaga bwele acuugi, ŋaa bo yiga ba alyele bila nde, kiigi Moyize bila Eli. 31Ŋaa lekuma le Njyami kiigi lema ajeneŋe bo. Bo ba kalyele bila Jezu ma leku le nde la le eya ka Jeruzaleme. 32Ŋaa Pyere bila abuga a nde, kiigi ama yiriga tolo leenini. Bo anyuzuga, bo amoni lekuma le Njyami lema ajeneŋe Jezu bila abalaga bwele. 33Ntini eli baari baa kiigi yiga baaje, Pyere ŋaa nde ndi: «Mfumu, aka bwa bizi leka kaŋaa, le ncwa elebe etari, omo wo we, omo wo Moyize ŋa omo wo Eli.» Ŋaa nde kiigi ki ya jaa yeekiigi lyele nde ŋi. 34Ŋaa ntini ye kiigi lyele nde bwa, kayiini ka kacuyi kayi wuga bo. Ŋaa Pyere bila abuga a nde abagi kamaaŋi. 35Ŋaa Njyami wobi kanca kacuyi kya ndi: «Wu Mwana mi wo swolo, leyuga nde.» 36Njyami kamana lyele, Jezu kiigi nde otu. Alwoni a nde kiigi pi, ŋaa bo aki lyele se mbuuru omo otu ŋi.
Jezu cuti kapundu keebi
37Vuzu oca, bo awa yila kakuru, lembuuru leenini leyi ka levuzu le Jezu. 38Ŋaa mono, kanca kari a lembuuru lya, balaga lemo le ti osarigi ndi: «Mfumu, kolokolo we, ma kese mwana mi, ŋa mi mwana nde-ankulu wua. 39Kapundu kiigi kali kanca nde. Ŋaa kapundu kya ka ruma nde ti osarigi, ŋaa nde terigi tegetege, ŋaa awuru acuugi nde ma onyua. Kapundu kya keempa nde mpasi, ŋaa ko njala kacuuga ŋa asisari kali. 40Mi mpi alwoni a we akolokolo ma kacura kapundu ki, ŋaa bo akibuna ŋi.» 41Jezu dugi ŋaa alwoni a nde ndi: «Tii ntini maa ye ka mi bila be? Be baari ba leca li, be tari kali, be ŋa perepere. Jezu ŋa taara mwana ndi, ya bila mwana we kunu.» 42Ŋa e nciini e mwana mpaana Jezu, kapundu keebi kajizigi mwana bila mpari. Ŋaa Jezu cuti kapundu keebi, nde saligi mwana wua, ŋaa nde vuti nde ŋa taara. 43Ekoli bo aso, ŋaa baari aso amoni onini o Njyami.
Jezu alyele ma leku le nde
Baari aso kiigi akini baakese ampiri ma kiigi sa Jezu, ŋaa nde dugi ŋa alwoni a nde ndi: 44«Lekyele jaa le elyele mi be li tata. Baari yiga tuga ma katege mi wo Mwana Mbuuru nca jyala e baari.» 45Ŋaa alwoni akiyuga mbari yia ŋi. Ma bo mbari yia kiigi ŋa mpasi ma kayuga, yia biri ye bizi yuga bo yo. Ŋaa bo amoni bwogo, bo akuni ma kapiza Jezu yo.
Wo vuli abuga na?
46Alwoni a Jezu atogi kampaniŋi a bo ma kayaa wo vuli abuga. 47Nde kamono ecimiŋi ba etuma bo, yagi mwana wo kiege, legi nde mpaana nde. 48Ŋaa nde ndi: «Mpini mbuuru wo ayamba mwana wu ma nkuumu a mi, nde mankulu ka yambi. Ŋaa mpini mbuuru wo ayamba mi, nde ayamba mbuuru we otumi mi se. Okorogo mbuuru wo avuruga mbiza kanca be, mbuuru wo vuli abuga.»
Mbuuru wo okaami mbele be, li bila be
(Lekese se Mareke 9.38-40)
49Ŋaa Jan yagi mbari ŋa Jezu ndi: «Mfumu, bizi lemoi mbuuru wo acura epundu beebi ma nkuumu a we, ŋaa bizi le sagi liga nde, kabila nde kiigi ka olwoni we ŋi.» 50Jezu kaali ŋa Jan ndi: «Lebiza nde ka liga, kabila mbuuru eli kini be mbele ŋi oli bila be.»
Baari a Samari acuti Jezu
51Ntini ye cyege Jezu yila ncye ma kaje yulu eciina. Ŋaa nde kuri ojugu ma kaje Jeruzaleme. 52Nde tumi antuma acuami levuzu le nde. Ŋaa bo anyuniŋi nca mpugu mon e Samari, ma kaje selege eyi e Jezu. 53Ŋaa baari a mpugu yia aki yamba nde ŋi, ma bo ba akiigi je Jeruzaleme#9.53 Ma baari a Samari kiigi obuoni o nca Jeruzaleme kiigi ove kali, ma bo obuoni woove ma kaje buono Njyami kayila kakuru ka Samari.. 54Alwoni a nde abwele, Jake bila Jan amono bwa, bo ŋa nde ndi: «Mfumu we njala ni bizi lelaa mbaa ewa yulu esuruga ŋaa yo ebuzuga bo?» 55Jezu fali bila bo. 56Bo aso ayeni nca mpugu nkima.
Lemigi le baalwono Jezu
57Ntini ye kiigi bo ma njila, mbuuru omo ŋaa Jezu ndi: «Mi elwono we ma ebiri njwori beeje we.» 58Ŋaa Jezu kaali ŋa nde ndi: «Ebagi ŋa eyuu, ŋaa anyoŋi a yulu ŋa anjo. Ŋaa Mwana Mbuuru biri le kaca tolo kali.» 59Ŋaa Jezu dugi ma mbuuru okima ndi: «Lwono mi!» Ŋaa mbuuru wua okaali ndi: «Mfumu, baana nyina mi eje jiiga taara a mi.» 60Ŋaa Jezu ŋa nde ndi: «Nyina ebiima ejiiga ebiima e bo! Ŋaa we, je mpa ncia ye omfumu o Njyami.» 61Okima ndi: «Mfumu, mi elwono we, ŋaa baana nyina mi eje yieze baari a njo mi.» 62Jezu akaala ŋa nde ndi: «Mbuuru wo alege kwogo kayila temi, ŋaa nde kavura kese mbiza, nde kibuna kanyunuŋa nca omfumu o Njyami ŋi.»
നിലവിൽ തിരഞ്ഞെടുത്തിരിക്കുന്നു:
Luke 9: teg
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
