Luke 8
8
Jaa le akaazi ba alwoni Jezu
1Amana, Jezu kaje engundu ŋa engundu bila nca ampugu ŋa ampugu, ma kampa bila kalyele Ncya Yeemve ye omfumu o Njyami. Alwoni a kuumu ŋa bwele akiigi bila nde. 2Ŋaa akaazi ake ba Jezu ba kacyezi epundu beebi bila ba asaligi ma angayi ba se alwoni nde. Ankuumu a bo, Mariya wo osi kangundu ka Mangedala, eli Jezu ocyezi epundu beebi ncaami nca nde. 3Ŋaa Zaane okari a Cuza, onkiele okuru o mfumu wo acwoli ma Erode, ŋa Sizane bila bege le abuga akima. Akaazi baa aso ba kayaga kabaga ka bo, ma kayamaŋa Jezu bila alwoni a nde.
Ngana ye okuni
4Baari ba awi ma engundu ŋa ampugu a kugi, lembuuru le si leenini ka mpaana Jezu. Ŋaa nde wobi ma ngana yi: 5«Onkuna elogo ocuugi ma kaje kuna mburu a nde. Ŋaa nde acala, bugu lemo le mburu levi kayila njila, ajarigi yo ma miili ŋa anyoyi a yulu aji yo 6Bugu lekima levi yila ncye ye akele, yo ebaana kasaraga, yo ekayi, kabila yo kiigi borigi onyaŋa 7Bugu lekima levi kanca ancyene, ancyene ma yele, yo se ye yele amana ancyene ayiniŋi yo. 8Ŋaa bugu lekima levi kanca ncye yeemve, ntini ye yeli yo, yo empi mburu kuna kuna. Ŋaa ncwo mon empi mburu ekuumu kuumu.» Ŋaa Jezu vuri dugi ndi: «Mbuuru wooli ŋa acu ma kayuga, nde yugi!»
Jezu asamaŋa alwoni a nde ngana
9Ŋaa alwoni a Jezu apizi nde ndi: «Ngana yia ma kalyele ndi ema?» 10Nde kaali bo ndi: Njyami kiigi ma mpa be ma kaya maami a nde ma oswogo ma o Mfumu o Njyami. Ŋaa ma baari akima, ye ka ma ngana, mabuni
Se bo ba kese bo kimono ŋi,
Ŋaa aka se bo ba ayuzuga, bo baaka yuga ŋi.
Jezu asamaŋa ngana
11«Ŋaa lemoo mi esamaŋa be ngana yia. Mburu kamaka mbari a Njyami. 12Baari baamo mva mburu yeevi kayila njila. Ba baayuga mbari a Njyami, ŋaa Sata yi ciezi mbari yia ma etuma ebo. Mabu ndi ncanke bo ayaligi, ŋaa bo avwugi. 13Ŋaa baari baamo mva mburu yeevi kayila ncye ye akele. Eli ntini ye eyuga bo mbari a Njyami, bo ayaligi ŋa kase. Ŋaa bo ekaŋa kali, kayalaga ka bo keeka biga ŋi. Ŋaa ntini yeemono bo ampasi, bo avi. 14Mburu ya yeeva kanca a ncyene, mva baari ba baayuga mbari a Njyami, ŋa ampasi, ŋa kabaga bila kase kayila ncye, eso eyiniŋi bo. Ŋaa bo abagi mburu yeemve. 15Mburu ya yeeva kanca ncye yeemve, mva baari ba baayuga mbari a Njyami bila eyaligi e jaa jaa. Bo akieli yo, ŋaa bo abagi mburu yeemve.»
Jezu ndi leyuzuga mbari mi
16Jezu vuri dugi bo ndi: «Mbuuru kibuna kalasa munda nde legi yo ncina ngungulu, sikali ncina ntari ŋi. Ŋaa nde kalege munda kayila okami a njo, mabuni baari ba baanyunuŋa amoni kawaa. 17Okorogo kalogo ka ba alonoŋo baari baamoo. Kabaasa ma ayizigi vuzu oca amoni ko. 18Lesa oyeri ma lemigi leeyuzuga be mi. Okorogo Njyami ampa ŋa mbuuru wo ayuzuga bila kayuga mbari a nde. Ŋaa Njyami apiina ŋa mbuuru eli nde kalogo kali, se nceti e nde ye kabagi acyezi.»
Ngwugu bila barigi a Jezu
19Nguugu bila barigi a Jezu ayi baraga nde, ŋaa bo aki baga ncwo ye kalyele bila nde ŋi, kabila lembuuru kiigi le ma avula kuna. 20Adugi ŋa nde ndi: «Nguugu a we bila barigi a we ali kajii, ŋaa bo baasaga mono we.» 21Ŋaa nde kaali ndi: «Nguugu a mi bila andumu a mi, ba baayuga bila ba baasa maami ma alyele mbari a Njyami.»
Pyebi bila anja anyimi Jezu
22Cugu lemo, Jezu kumi nca vaari bila alwoni a nde, nde ŋa bo ndi: «Lecue lengulu lemo le oduba li ku,» ŋaa bo ayeni. 23Ntini yeekiigi buula bo, Jezu ci tolo. Parabu, pyebi leenini leyi nca oduba, vaari yiga aluula anja, bo amoni bwogo ba leku. 24Alwoni a Jezu aciini mpaana nde, ŋaa bo anyusi nde, bo ndi: «Mfumu, mfumu, bizi a be lekwi!» Jezu kayuga, nde wobi bila nkeri ŋa piebi bila epugu ba anja beenini. Ŋaa pyebi bila epugu ba anja yiga asugi. 25Ŋaa nde ŋa alwoni a nde ndi: «Tari le be alo?» Kamaaŋi kasi bo, ŋa ekoli bo, bo yiga ba lyele nca mpanaŋa bo ndi: «Nde wu na, we a lyele bila pyebi ŋa anja, ŋa jo enyimi nde?»
Jezu saligi ngaa ependu beebi
26Jezu bila alwoni a nde atoyi nca kasi ka baari a Ngerazeniye, kaga ma kasuniŋa kasi ka Ngalile. 27Ntini ye surigi Jezu nca vaari, ŋa elegi nde miili ma ncye, balaga lemo le kangundu kia yiga le eya mpila Jezu. Ŋaa balaga lia kiigi ŋa bege le epundu beebi kanca nde. Nde kiigi kayira otaba, ŋaa nde kiigi yiga a kaka nca njo ŋi, nde kiigi yiga kaka nca amuuma. 28Nde kamono Jezu nde ti nya, ovi kacina miili e nde, ŋaa nde wobi nkeri nkeri ndi: «Jo ema eli ka mpanaŋi a bizi a we, Jezu, Mwana Njyami onkara yulu? Kolo kolo we, ndaga mi kasisa.» 29Nde dugi bwa, ma Jezu wo owobi ma nkeri ŋa kapundu keebi ndi: «Cwuga nca balaga li!» Ma antini ake, kapundu keebi kia ka kpara nde, ŋaa akuri nde endi ba ankozo ma jiala bila miili ma ka kwozo nde. Ŋaa nde amono acaga ankozo ma akiigi kura nde maa, ŋaa kapundu kia ka kabira nde nca ancuo. 30Jezu pizi nde ndi: «We nkuumu na?» Ŋaa ko ndi: «Nkwumu a bizi abege.» Ko kadugi bwa kabila bege le epundu kiigi le ma anyunuŋa nca nde. 31Ŋaa epundu yiga be pele Jezu ŋa asisari, mabuni nde kabiza bo katuma nca biri ye baasisa baari.
32Ŋaa kiigi kaŋaa ŋa njiimi le enguu kayila kakuru le leekiigi ja, ŋa epundu ba kampa Jezu akolokolo ma kasa bo kanyunuŋa nca engwu bia. Ŋaa nde se yaligi. 33Ŋaa epundu ecwugi nca balaga lia, enyuniŋi nca engwu, ŋaa njiimi le surigi ma nciini levi nca oduba. Ŋaa lenyui anja lekpi. 34Baari ba kiigi bunuŋa jo, amamono bwa, adumi, ŋaa ayi ma kanaana ncia nca kangundu bila nca ampugu ma akiege aso. 35Baari ayi mono jaa ye emaaya. Bo ayi nciina mpaana Jezu, ŋa bo a moni balaga le ecuuga epundu kanca nde, manci ka miili e Jezu, ma alaaza amfa, ŋaa yiga nca eki beeve. Ŋaa baayi mono, abagi kamaŋi. 36Ba amoni kayiri maami maa, anaani mva kajanjigi Jezu balaga le kiigi epundu beebi ema nyunuŋa nca nde. 37Ŋaa baari aso ba kasi ka Ngerazeniye ampi Jezu akolokolo ma kaciege nca bo, ma bo baali kiigi yiga ŋa kamaŋi keenini. Jezu kumi nca vaari, ŋaa nde kasa ni kaje, 38balaga eli epundu ecwugi nca nde, o pizi nde njila ndi aka nde abuna ka bira nde. Ŋaa Jezu ŋa nde ndi: 39«Vuruga njo we! Ŋaa naana aso ma Njyami ma kasi we.» Nde yeni, ŋaa nde naani ma ebiri eso ba kangundu, maami ma Jezu ma kasi nde aso.
Enyuzigi ba mwana wo okaazi o Zayiruse, ŋa okaazi wo obyele yiga esibi nkuumu ŋa jyele.
40Jezu bila alwoni a nde, avura bwula oduba. Lembuuru leenini leekiigi jila nde, ŋaa bo ayambi nde. 41Ŋaa mono, kaya balaga lemo, nkuumu Jayiruse, kiigi okunji wo njo ye ba bwono Njyami. Nde vi kacina miili e Jezu, ŋaa nde mpi nde kolokolo ma kaje njo nde. 42Nde kiigi ŋa mwana wo okaazi omo. Ŋaa nde mwana nde-ankulu wua, kiigi yiga nkali esibi kuumu ŋa jyele, kiigi yiga akpaa.
Ntini ye kiigi je Jezu kwa, lembuuru leenini kiigi le ma ajya nde. 43Ŋi kiigi ŋa okaazi omo wo kiigi ŋa ovugu, kiigi yiga esibi kuumu ŋa jyele. Nde kiigi mi mana kabaga ka nde ma kawura adukuteni, ŋaa se omo ki buna kasalaga nde ŋi. 44Nde yi ceze mbiza, ŋa ciili okabi a mfa Jezu. Parabu ŋa ovugu wi. 45Ŋaa Jezu ndi: «Wo ciili mi na?» Ŋaa baari baa aso ba kaja akaniŋi. Ŋaa Pyere ŋa nde ndi: «Mfumu, lembuuru le lejya we li, le epiza we ni wo ciili mi na?» 46Ŋaa Jezu kaali ndi: «Mbuuru ma aciila mi kabila mpari mon ema cuuga kanca njuru a mi.» 47Okaazi wua kamono ndi amibanaŋa nde, nde yiga aya ma katerege ŋaa nde vi ka ncina miili e Jezu, ŋa nde cwugi ka miizi a baari ma kalyele kabila ka aciili nde Jezu, ŋa lemigi le wuumi nde, kancinci ŋa. 48Jezu ŋa nde ndi: «Kaazi, tari le we le mi vuzuga we, je bila kadusu.»
49Ŋaa Jezu kiigi kini alyele, mono mbuuru omo ka kawa mpila okunji wo njo ye baabwono Njyami, nde alyele ndi: «Mwana we wo okaazi mi kpa, ndaga kama weele mfumu ma kavura je njo we.» 50Ŋaa Jezu kayuga bwa, ŋa okunji wo njo ye baabwono Njyami ndi: «Ndaga bwogo kamono, yalaga, ŋaa nde avuuga.» 51Jezu ka to njo okunji, nde kijia ndi mbuuru se omo otu anyunuŋa bila nde ŋi, ka ngula Pyere, ŋa Jan, Jake, ŋa taara bila nguugu a mwana. 52Baari aso ba baaka nca njo ba kalila, ŋaa bo ba kalege ambila ma nya mwana. Ŋaa Jezu ndi: «Lebiza kalila, nde kini kpaa ŋi, ŋa nde aca tolo.» 53Ŋaa baari asebi Jezu, kabila ma bo kiigi mwana ma mana kpaa. 54Ŋaa nde kwari mwana ma kwogo, ŋaa nde wobi ma jui leenini ndi: «Mwana, temeŋe!» 55Ŋaa oduduma nde yi vuruga nca njuru a nde, ŋaa parabu ŋaa nde sarigi, ŋaa Jezu ŋa bo ndi: «Lempa nde biila.» 56Ekoli taara bila ngwugu a mwana. Ŋaa Jezu ŋa bo ndi: «Be lebizi kalyele se mbuuru omo maami ma yiri ma!»
നിലവിൽ തിരഞ്ഞെടുത്തിരിക്കുന്നു:
Luke 8: teg
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
