Luke 4
4
Jabiri amiga Jezu
1Ŋaa Jezu kamana yaga ateemi, nde kiigi wa okeri wo Jurden, mpari ye Oduduma Cece eseligi evuli nca nde. Ŋaa Oduduma Cece biri nde kanca biri eli baari kali. 2Kaŋaa, jabiri baani nde kamiga tii ekuumu ba ecugu ena. Bege le ecugu bia nde kilege se kalogo ma onyua ŋi. Ŋaa jo ewa njala esi nde. 3Ŋaa jabiri ŋa nde ndi: «Aka we Mwana Njyami, lyele kele li lekiriga lempembe.» 4Ŋaa Jezu akaala ŋa nde ndi: «Ampiri ma buku le Njyami ma lyele ndi: Omwon o mbuuru ka kaja katu ŋi.»
5Jabiri selegi yeni bila Jezu yila ngaala, kancinci ŋaa nde mvyeri Jezu emfumu eyila ncye eso. 6Nde ŋa nde ndi: «Mi empa we onkani oso bila lekuma le emfumu eso e ncye, kabila jo kiigi ama ampa mi, ŋaa mi ebuna mpa mbuuru wo jii mi.» 7Ŋaa we aka ma abwu kavuzu o mi, biibi bi eso yiga eka e we. 8Ŋaa Jezu akaala ŋa nde ndi: «Amaateende nca buku le Njyami ndi, bwono Mfumu, wo Njyami a we, kayila nde we kibuna bwono Njyami okima ŋi.»
9Jabiri biri nde Jerizaleme, osuuzi nde yila Njo Njyami, ŋa nde ndi: «Aka we Mwana balaga o Njyami, ciga kambere kunu. 10Kabila Mpiri ye lyele ndi: “Njyami aje katuma antuma-yulu a nde ma kakyele we. 11Ŋa bo baaje kabira we yila jyala e bo, ma kaduma ni ncanke le taami le we le kumuŋi ma kele.”» 12Ŋaa Jezu akaala ŋa nde ndi: «Mpiri ye lyele se ndi: “We bizi kamiga Mfumu, o Njyami a we.”» 13Jabiri kamana yelege Jezu ma amigi aso, nde si je ntini mon, ma kasa jila ntini nkima.
Jezu aya vuruga Ngalile
14Keeyi vuruga e Jezu Ngalile, mpari ye Oduduma Cece kiigi ema selege vula nca nde. Ncia nde eyeni ma tiniŋa le bungu leso. 15Nde kayiziga nca njo ye ba bwono Njyami ŋaa baari ba kampa Njyami leve.
Mbari ye mpi nde ka Nazarete.
16Jezu yeni Nazarete ka biri ye yeli nde. Ŋaa ma cugu le ba awuuma, nde nyuniŋi nca njo ye ba bwono Njyami, mva lemigi laa baana sa nde. Nde temiŋi ma katanga nca buku le Njyami, 17Ŋaa ampi nde buku le ntuma Njyami wo acwoli ma Ezayi. Jezu naani buku ŋa nde moni biri eli amaateende ndi:
18«Oduduma Mfumu li yila mi, kabila nde ma swolo mi, ma kampa afuga ncia yeemve.
Nde ma atuma mi ma kalyele ŋa baari baali ma ongeneŋe, be lebuna kaje bila baali miizi kali, ndi bo baaje kamono tata, nde ma atuma mi ma kavuzuga anga onkari.
19Ma kalyele ndi ntini e mito eli Mfumu amvyere be ove o nde.»
20Amana, nde vuni buku, nde vuti ŋa ojanji wo okuga wua, ŋaa nde ki manci. Ŋaa aso ba akiigi nca njo ye ba bwono Njyami miizi yila Jezu. 21Ŋaa nde yiga abaana kalyele ŋa bo ndi: «Lubu mbari ye yugi be ye amaateende yia yiga jaajaa.» 22Ŋaa baari aso baga lyele maami maave ma Jezu, ŋaa ekoli bo ma andaga maave ma kiigi cuzuga Jezu ma onyua nde. Bo ndi: «Nde ka mwana Jozefe ŋi?» 23Ŋaa Jezu ŋa bo ndi: «Ŋaa be le buuna kata mi ncincami ye ba lyele ndi, ombuga abyeri, ŋa salaga njuru weankulu. Aso ma ayiri ka kapenawume bila ma yugi bizi, ŋaa ma sa mon kanca kangundu ka weankulu.» 24Nde avura lyele ndi: «Sisiele, mi elyele be mi ni ba kayalaga maami a ntuma Njyami nca mpugu a nde-ankulu ŋi. 25Mi ŋaa jaajaa elyele be, ŋa ma ntini ye kiigi Eli ntuma Njyami, Njyami obiindi yulu esi esibi etari ŋa angondo asiami, ŋaa njala yeenini eyi kanca kasi kaso. Ŋaa kiigi ŋa bege le akaazi ba akuulu kanca kasi koankulu ka Ezerayele kya. 26Ŋaa Njyami kituma Eli se mpila okaazi wo okuulu okima nca bo ŋi, ŋaa Njyami tumi nde mpila okaazi wo okuulu wo mpugu ye Sarepete wo kasi ka Sidon. 27Ma ntini ye kiigi ntuma Njyami wo acwoli ma Elize, kiigi se ŋa bege le anga ebila ka Ezerayele. Ŋaa Njyami kisalaga se ngaa ebila se omo kanca bo ŋi, kayila Naamane otu wo osi Siri.» 28Ŋaa bo aso baakiigi nca njo ye ba bwono Njyami abiri nkeri, ntini ye yugi bo maami maa. 29Bo atemiŋi, bo ajuti nde, bo abiri nde tii yila kakuru ka cui bo kangundu, ma kaciniŋa nde kambere. 30Ŋaa Jezu yiri kanca bo, ŋa nde yeni.
Onkani o mbari Jezu
31Jezu oyeni kapenawume, nca kangundu ka Ngalile, ma cugu le ba awuuma, ŋaa nde yizigi baari. 32Ŋaa ekoli bo ma lemigi leekiigi yiziga nde. Ŋaa Jezu kalyele bila onkani ba Njyami ba kampa nde. 33Nca njo ye ba abwono Njyami balaga lemon kiigi ŋa kapundu keebi kanca nde, kati nya bila jui leenini. 34«Ndaga mpaana bizi kanciina, Jezu wo Nazarete! We bizi ya ncazaga? Mi njayi we, ocece wo Njyami.» 35Jezu ŋa nde ma nkeri ndi: «Kapi, cuuga nca balaga li.» Ŋaa ko, kavuuzi nde nca mpanaŋa baari baa, ŋaa kapundu kia ka cuugi, ko ka kisa nde jaa leebi ŋi. 36Okuga wuozi moni bwogo, ŋaa bo awobi nca mpaniŋi a bo ndi: «Yia sila mbari ma! Nde kalyele kwa bila tari ŋa mpari yila epundu beebi, ŋaa jo ecuugi.» 37Ŋaa ancia a nde ayeni tii nca atiniŋa ma bungu leso.
Jezu asalaga abieri
38Jezu kaciege kanca njo ye baabwono Njyami, nde yeni njo Simon. Oko nde wo okaazi kiigi ŋa kabaa ka nkeri. Ŋaa bo adugi ŋa Jezu ma kabaga ancwo ma ngaa nde. 39Jezu ociini mpaana nde, nde bye ŋa kabaa, ŋaa ko kafi. Ŋaa wo baka bila kabaa, temiŋi kancinci ŋa yiga ajanja ma bo.
40Muyi kava baari aso baakiigi ŋa angayi, mbuuru ŋa mbuuru wooli bila e nde ngayi yi mpa mpila Jezu. Ŋaa nde saligi bo. 41Ŋaa epundu se be kiigi kanca bege le baari baa, ecuugi ma kawula anya: «We Mwana Njyami!» Ŋaa Jezu ligi bo ndi bo aka pi, kabila bo kiigi ayaa ndi nde Kirisite ntuma Njyami.
Jezu kanca ekuga e Njyami e Jude
42Cugu oca, nde cwugi, nde yeni nca biri eli baari kali. Bege le baari le kasaga nde. Ŋaa bo ayi tii mpila nde. Bo akali Jezu mabuni nde kaka bila bo. 43Ŋaa Jezu ŋa bo ndi: «Ave mi se yeni nca engundu beemon, ma kampa bo ncia yeemve ye eli Njyami yiga aya bila omfumu o nde, kia kabila ka Njyami katuma mi yila ncye.» 44Ŋaa Jezu kaje ma kampa mbari a Njyami kanca anjo ma baabwono ma tiniŋa le Jude.
നിലവിൽ തിരഞ്ഞെടുത്തിരിക്കുന്നു:
Luke 4: teg
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
