Zefanya 2
2
1Ṉigaṉi nkôndi, ko kèlagèlaṉ’irèm̃i yaṉi, iṉongo nyi re ntyoṉi fo, 2ivanga lendôgô ro ko ntyugu mèyoṉo pyagaṉa ga isaṉi, eguṉu evôlô zi Yeôva ṽyagaga ro gôre ṉwè, ntyugu y’eguṉu zi Yeôva ṽyagaga ro gôre ṉwè! 3Wutaṉi Yeôva, aṉwèdu, ikendekende yi ntyo, aṉwè yi dend’izômbyô yè! wutaṉ’ôgôre, wutaṉ’ôkendekende! vendetwa aṉwè be penjavenjô gô ntyugu y’eguṉu zi Yeôva.
4Konde Gaza yi be falô, Askalon yi be dwaṉizô ewôga, Asdod yi be tômbô ôm̃and’ômpôlô, Ekron yi be tôduṉô. 5Azile gôr’alwaṉi w’intungu si mbeṉe, gôr’iṉongo nya mongi Kerèt! Yeôva are kamba pa gô siro, awè Kanaan, ntye yi Filiste! mi be jilizo, awè ze tô dèng’aṉaga nyèṉè. 6Intungu si mbeṉe si be dwaṉa inyenô ny’inyam̃a, n’alwanô m’ivenjavenji y’adombè, n’ikômba gôr’ilemba y’inyam̃a. 7Intungu mèsoṉo si be dwaṉa gôre mbèy yi nagô yi Yuda; wi be nya vovo; wi be dèwe nkôlô gw’inagô s’Askalon; konde Yeôva, Anyambyè yaô, e ze deṽaṉe waô, arô fwiṉiz’ikôte yaô.
8My’are jogo p’iroṽô yi Môab n’iroṽô y’awaṉa w’Amon, gw’aroṽagi waô iṉongo nyam̃ avendiz’ikuṽi yaômè n’ôvagasu gw’ikawô yaô. 9Yeṉo, ga nt’are myè bo! bulye Yeôva y’imbèli, Anyambyè y’Israèl, Môab e be dwaṉa ga Sôdoma, n’awaṉa w’Amon ga Gômora, mbôra jônyô pa n’arèndè, n’iṽemba ny’ezanga, n’ewôga za pèkèpèkè; ni mbèy y’iṉongo nyam̃ yi be kwèra waô, ni mbèy y’iṉongo nyam̃ yi be niva waô. 10Isam̃u yiṉo yi be bya gôre waô g’ômwanja w’ekale zaô, konde nè wi re toṽa pa alwaṉa n’ôvagasu gôr’iṉongo nyi Yeôva y’imbèli. 11Yeôva e be dwaṉ’ererya gôre waô, konde e be jiliz’inyambyè sôdu si ntye; n’ôm’edu e be saviṉè g’ôzô wè gô ntye yè, gw’inenge sôdu s’aṉongo.
12Aṉwè kè, mongi Etyop, aṉwè be jôṉô ne ôkwari wam̃ w’iwora. 13E be nyonyuṉ’ôgo wè gô nkôṽa yi Nor, ayiliz’Asur, ko yè pange Ninive ewôga, ntye yi nkele ga itôve. 14Ilemba y’inyam̃a yi be dèwa gô garegare ya yô, ôṉongo wi nyam̃y’edu; iruṽaṉi n’ômbeṉa wègèlè wi be dwaṉa gw’ageṉô ampôlô ma yô; itôngi saô si be tôngô gw’asangala; ôyilisi wi be dwaṉa g’ômpômbala, konde liviṉi y’ôkum̃e yi be dulô. 15Sambô yiṉo ne nkala y’igeṽa, yi dwaṉa ni nkagandè, awulya g’ôrèm̃i wè inè: myè, e zel’ôm’ômwèṉè kaô myè! sambô, y’akalw’ewôga sè, y’atweṉ’elumba z’inyam̃a! waôdu wi be pyagaṉa pyèrè na yô wi be tông’isôsi awizawiz’ôgo.
നിലവിൽ തിരഞ്ഞെടുത്തിരിക്കുന്നു:
Zefanya 2: MYE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Published by the British and Foreign Bible Society in 1927.