Zakarya 2
2
1Arômbiṉi myè antyo avôna, na vôna, avegag’ôma kôta p’egèṉizô g’ôgo wè. 2N’awulyi myè inè: Ô kènda gwè? N’awiṉizi yè myè inè: Mi kènda gô kèṉize Yerusalèm, gô my’evendiṉi n’elaviṉi za yô. 3Na vôna, yenjèl y’agambagi na myè azusi pyèrè, n’aṽyeṉi yenjèl nyèṉè gô dataṉa na yè. 4N’awulinyè yè inè: Vale mangô, ko kamba gôr’ôma wiṉo, awulya inè: Yerusalèm yi be twa nkala yi r’ôgômba fo, konde yi re n’aṉag’awenge n’inyam̃a; 5mi be dwaṉa gô yô ga ôgômba w’ôgôṉi gô vingôvingô, na mi be dwaṉ’ivenda nya yô gô vingôvingô yô.
6Wangaṉi, wangaṉi avila gô ntye yi Nor! bulye Yeôva. Konde my’are pazanganya pa ṉwè gw’impung’inay y’ôrôṽa, bulye Yeôva. 7Rômb’ôkuṽa, Siyôn, awè yi dwaṉa n’ômwaṉ’ômwantô wi Babèl! 8Konde yeṉo kambe Yeôva y’imbèli inè: Isam̃u yiṉo vya, gambèṉè ivenda nyi be bya! arôm̃i myè gôr’aṉongo mi re kwèra pa ṉwè; konde ayè yi bwata ṉwè e bwat’ômwaṉa w’intyo nyèmè. 9Vôna, mi tômbiṉ’ôgo wam̃ gôre mô, na mi be dwaṉ’im̃aṉô gôr’inyôngô saô. N’aṉwè be mya inè, my’atôm̃ô ne Yeôva y’imbèli. 10Yemba, ko jeṉ’igeṽa, awè ômwaṉ’ômwantô wi Siyôn! konde vôna, mi bya, ko mi dwaṉa gô garegare yo, bulye Yeôva. 11Aṉongw’amenge mi be diṽa gôre Yeôva gô ntyugu mèyoṉo, ko mô tw’iṉongo nyam̃; mi be dwaṉa gô garegare yo, ko wè mya inè, my’atôm̃ô ne Yeôva y’imbèli gôre wè. 12Yeôva e be nive Yuda ga mbèy yè gô ntye y’ôrunda, ko yè tô pinje Yerusalèm. 13Ôzôny’edu wi ga lwaṉe do g’ôzô wi Yeôva! konde agum̃aṉi avila gw’ilwaṉô nyè ny’ôrunda.
നിലവിൽ തിരഞ്ഞെടുത്തിരിക്കുന്നു:
Zakarya 2: MYE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Published by the British and Foreign Bible Society in 1927.