Matay 12
12
1Gw’egômbe mèzoṉo Yesu avyagaṉi gw’intyaga g’ôwenja wi soṉo. N’ayogyô iṉèngi yè njaṉa, ko waô pakilya gô dul’iputu anya. 2Ndô gw’ayeṉ’ifarisi yeṉo, w’awulinyi yè inè: Vôna, iṉèngi yo yi dende ndaga yi re yi zele kwèkwè gô dendô gô ntyugu yi soṉo. 3Ndô Yesu awiṉizi waô inè: Aṉwè pa tanguṉa nt’alendi David, gw’ayogyô yè njaṉa ayè na waô w’avegagi na yè; 4nt’ayingiṉi yè gô nagô y’Anyambyè anye mpèmba yi dôṽyô g’ôzô wi Yeôva, yi re yi re pegege kwèkwè gôre yè gô nya, ge gôre waô w’avegagi na yè, ndô kaô gôr’imiṉisè dadyè? 5Ge aṉwè pa tanguṉa gw’ivanga inè, gw’intyugu si soṉo, imiṉisè gô nagô y’Anyambyè si bundakaṉe ntyugu yi soṉo, ko waô dwaṉe ntyèmbo fo? 6Ndô mi bulinya ṉwè inè, vèṉo ar’ôma re vyagaṉô ni nagô y’Anyambyè. 7Arwe nè aṉwè amyeṉi nt’ar’igamba nyiṉo inè: Mi tonde nkèngo, n’arang’intyagô, gavoṉo aṉwè re tô sèmba waô wi re ntyèmbo fo. 8Konde Ômwaṉa w’ôma ayè Ôvangiṉi wi ntyugu yi soṉo.
9Alubwi Yesu avila vovo, ayingiṉa gô nagô yaô yi soṉo. 10Na vôna, avegagi vovo ôṉôm̃e ôgo juwa pa. N’aṽambyi waô Yesu inè: Are mbya gô jinga gô ntyugu yi soṉo? mbutage ntiṉa yi sozizè. 11N’awiṉizi yè waô inè: Mande gôre ṉwè are j’adwaṉa n’idomb’im̃ori, ko nyô pôswa gw’iṽemba gô ntyugu yi soṉo agôte nyô arômba nyô? 12Njôni mpôlô nde yi r’ôma vyagaṉô n’idombè! Sambô are kwèkwè gô dende mbya gô ntyugu yi soṉo. 13Vovo awulinyi yè ôṉôm̃e mè inè: Nyonyuṉ’ôgo wo. N’anyonyuṉi yè wô, n’awiṉizô wô egolaṉi g’ôm̃ori.
14Ndô ifarisi s’agogwi awônde môndo g’ômwanji wè, nt’are waô ko jôṉè. 15Na gw’amyeṉi Yesu, alubwi avila vovo. N’azôngyô yè n’aṉag’awenge, n’ayingi yè waôdu w’avegagi n’inkaṉi. 16N’azômbyi yè waô inè, w’avangè myô, 17ko igamba ny’agambyô ne Yezaya, y’ôvogisi twa rèti inè: 18Vône nyôngô yam̃ yi re myè pinja pa, yi tondô myè, yi jeṉô myè mbya g’ôrèm̃i wam̃. Mi be fwel’iṉiṉi nyam̃ gôre yè, ko yè tum̃iny’ aṉongo ijèkèlya. 19E ze jôm̃aṉe ge tônga, ôma kè ayogw’ inyôy nyè gw’agala. 20Nkuṉe mogwa pa aṽangunye yô bangô, n’ôtutu w’ôjô aṉim̃e wô, kaô akèndy’ijèkèlya gw’ikeṽa. 21N’aṉongo kè mi be bekely’ini nyè.
22Egômbe mè aṽagyô gôre yè ôma avegagi n’ iṉiṉ’iṽe, ipoku n’im̃am̃u, n’ayingyè yè. N’arweṉi nè, ipoku n’im̃am̃u ny’agambi, ayeṉa. 23N’am̃ami aṉaga waôdu awulya inè: Wiṉo arang’ômwaṉa wi David? 24Ndô ifarisi gw’ayogyô waô yeṉo, w’awulyi nè: Ôma wiṉo e tômb’aṉiṉ’ambe kaô vo Beèlzebul, y’ôvangiṉi w’aṉiṉ’ambe. 25Ndô gw’amyeṉi Yesu ipikilyi saô, awulinyi waô inè: Iṉongw’edu nyi keraṉa nyômè nyi jila, ni nkaly’edu ge nagô yi keraṉa y’ayolye kum̃aṉe. 26Ja Satan atômbe Satan na yè, gambèṉè akeraṉi; sambô ipangiṉi sè sô ko kum̃aṉa sè? 27Na ja my’atômb’aṉiṉ’ambe vo Beèlzebul, gambèṉè awaṉi waṉi wi tômba mô vo mande? Yeṉo, waô wi be dwaṉ’iyèkèli yaṉi. 28Ndô ja my’atômb’aṉiṉ’ambe n’Iṉiṉa ny’Anyambyè, gambèṉè aṉwè abyeṉô ne iṉongo ny’Anyambyè. 29Ge ôma ko jingiṉa sè gô nagô y’ôma wi ngulu agwèr’igumbi nyè, j’alônge kôr’ôma mè wi ngulu? Gambèṉè vovo be kwèrè nagô yè. 30Ayè yi re e pa kaṉa myè e sira myè, n’ayè yi re e pa kenja na myè e pazangaṉa.
31Yeṉo mi bulinya ṉwè inè: Ibe sôdu, n’ipèdya sôdu si yom̃a y’ôrunda si be nyezô aṉaga, ndô ipèdya si pèdyô Iṉiṉ’Iṽya s’anyezô du. 32N’ôm’edu e be kamb’igamba nyi sir’Ômwaṉa w’ôma nyi be nyezô yè, ndô ôm’edu e be kamb’igamba nyi sir’Iṉiṉ’Iṽia ny’anyezô yè, no gô ntye yiṉo no gô ntye yi re gô bya. 33J’erere zi r’eṽya, gambèṉè ilônda ya zô kè yi r’imbya, ndô j’erere zi r’eṽe, gambèṉè ilônda ya zô kè yi r’imbe; konde erere zi myô n’ ilôndi yè. 34Awaṉa w’impeṉe, aṉw’aṽe, aṉwè ko jolye kamb’agamb’ambya sè? Konde avila gô mbuṉiṉi y’ôrèm̃a ôgwaṉa wi kamba. 35Ôm’ombya e koguny’isam̃u imbya avila gw’ibuṉa s’imbya si re na yè, n’ôm’ombe e koguny’isam̃u imbe avila gw’ibuṉa s’imbe si re na yè. 36Ndô mi bulinya ṉwè inè: Egambanyambyè edu zi be kambô n’aṉaga, wi be pe ntangô g’ômwanja wa zô gô ntyugu y’ijèkèlya. 37Konde ô be dwaṉizô ôgôre n’agambi mo, ô be dwaṉizô kè ôgara n’agambi mo.
38Vovo awiṉizi awèwo w’irèndisi n’ifarisi, awulya inè: Ôṉènji awzè bele jeṉ’elemba zi dendô wè. 39N’awiṉizi yè waô inè: Ivôm̃a ny’ibe na ny’ôṽelaṉô nyi but’elemba, ndô nyi ze pô elemb’ezèṉè, kaô elemba zi Yôna y’ôvogisi. 40Konde ga nt’avegagi Yôna gw’iwum̃u ny’evuga im̃and’irarô n’agwèra kè ararô, yeṉo Ômwaṉa w’ôma e be dwaṉ’ im̃and’irarô n’agwèra kè ararô g’ôrèm̃a wi ntye. 41Mongi Ninivi wi be kum̃aṉa gô ntyugu y’ijèkèlya n’ivôm̃a nyiṉo ava nyô ôgara, konde w’aṉigi nkôndi n’ikambiṉa si Yôna; ndô vôna, vèṉo ar’ôma re vyagaṉô ni Yôna. 42Ôg’ômwantô wi Seba e be kum̃aṉa gô ntyugu y’ijèkèlya n’ivôm̃a nyiṉo ava nyô ôgara, konde ayè aṽyeṉi avila gw’intyay si ntye gô jogw’imya si Salômôn; na vôna, vèṉo ar’ôma are vyagaṉô ni Salômôn.
43J’iṉiṉa ny’isèkè ny’adubwa avila gôr’ôma, nyi kènda gw’imbôra sa kaka, mbutag’ijowa, ko ny’ alènga. 44Vovo bulya nyô inè: Mi be fwinya gô nagô yam̃ y’avilyô myè; na gô bya nyô, nyi dènga yô ntevô, ni jombuṉô pa, ni keka pa. 45Vovo kènda nyô, awonga na nyômè aṉiṉ’am̃èṉè ambe ôrwagenô vyagaṉô na yèmè; mi jingiṉa, alwaṉa vovo, ni ndwaṉi num̃uṉa y’ôma mè yi dwaṉe mbe vyagaṉô ni nônga. Yeṉo dwaṉa kè gôr’ivôm̃’iṽe nyiṉo.
46Gw’agambagi Yesu n’aṉaga, vôna, ngi yè n’ awôngi yè w’agum̃aṉi gw’igala, mbutaga gô kamba na yè. 47N’awulinyô yè n’ôma inè: Vône ngi yo n’awôngi yo wi kum̃aṉa gw’igala, wi buta gô kamba na wè. 48Ndô Yesu awiṉizi ôma w’agambagi na yè inè: Ngi yam̃ mande, n’awôngi yam̃ mande? 49Avila vovo alaṽiṉi yè ôgo wè gôr’iṉèngi yè, awulya inè: Vône ngi yam̃ n’ awôngi yam̃. 50Konde ôm’edu e dende ntondiṉi ya Reri yam̃, yi re g’ôrôṽa, ayè mwô’ngi yam̃, n’ezombi zam̃, ni ngi yam̃.
നിലവിൽ തിരഞ്ഞെടുത്തിരിക്കുന്നു:
Matay 12: MYE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Published by the British and Foreign Bible Society in 1927.
