Matay 10
10
1Aweyi yè igôm̃i nyi rôm̃i ni rôm̃i ṽaṉi, ava waô ngulu gô tômb’aṉiṉa m’isèkè, na gô jinge nkany’edu ni ndèliny’edu.
2Na miṉo ne ana m’igôm̃i nyi rôm̃i ni rôm̃i ṽaṉi.
Ôlônga ne Simôn, aweyôgô inè Pyère, n’Andru, ya mwô’ngi yè; Yakobu, y’ômwaṉa wi Zebeday, ni Yôan, ya mwô’ngi yè; 3Filipi ni Bartelemi; Tôma ni Matay, yi publikan; Yakobu, y’ômwaṉa w’Alifas, ni Lebyus, y’aweyôgô kè inè, Tadyus; 4Simôn, ya mwô’Kanaan, ni Yudas Iskaryot, y’agondi Yesu.
5Mongi siṉo igôm̃i n’aṽaṉi w’arôm̃yô ne Yesu, ayè sômbya pa waô inè:
Agèndaṉi gôr’aṉongo, ge jingiṉa gw’inkala sa mongi Samarya; 6ndô gèndaṉi gôr’adombè mi re pera pa mi nagô y’Israèl. 7Na gô kènda ṉwè, gambiṉaṉi awulya inè: Iṉongo ny’ôrôṽa ny’atweṉi pyèrè. 8Rôlizaṉ’ibèli, rôngunyaṉi bende, yombunyaṉi mongi wi re n’inkaṉi sa gelô, rômbaṉ’aṉiṉ’ambe. Aṉwè avenyô mpagaga, vaṉi kè mpagaga. 9Awongaṉi sika ya teṉateṉa, ge ya pupu, ge nyènyè gw’itumbi yaṉi; 10ge ngoṽè g’ôgèndo, ge ngoy mbaṉi, ge intyôzô s’atanga, ge ntôngô; konde ôma wi janja are n’inyanga ny’inyi sè.
11Gô nkaly’edu mpôlô ge nyangô yi be jingiṉô ṉwè, ṽambyaṉi ôma re n’inyanga vovo, ko dwaṉaṉi vovo gôre yè kaô aṉw’ adubwa. 12Na gô jingiṉa ṉwè gô nagô, zanguṉaṉi yô; 13na ja nagô y’adwaṉa n’inyanga, am̃ènjè maṉi mi ga ṽye gô yô, ndô ja yi zele n’inyanga, am̃ènjè maṉi mi ga winye gôre ṉwè. 14Ndô jog’ôm’edu awonga ṉwè, ge jogw’agambi maṉi, gogwaṉi avila gô nagô mè, ntyo gô nkala mè, ko palaṉi ntyèngè avila gw’agôlô maṉi. 15Giligili mi bulinya ṉwè inè: Ntye yi Sôdoma na yi Gômora yi be dwaṉa n’azingô ma kwè gô ntyugu y’ijèkèlya vyagaṉô ni nkala mèyoṉo.
16Vônaṉi, mi tôm̃a ṉwè g’adombè gô garegare y’injègo. Sambô lwaṉaṉi ôkeli g’im̃amba, ni nkèngo g’abembe. 17Ndô ṽandam̃iṉaṉi gôr’aṉaga; konde wi be noza ṉwè gw’ivagô, aziṽa ṉwè gw’inagô saô si soṉo; 18aṉwè be bagô gôr’iguvèrnèr na gôr’aga, g’ômwanji wam̃, gô dwaṉ’ iyeṉi gôre waô na gôr’aṉongo. 19Ndô gô be noza waô ṉwè, alwaṉaṉi n’añandi nte be kamba ṉwè, ge ande zi be bulyô ṉwè; konde aṉwè be pô nte be kamba ṉwè gw’igwèra mè; 20konde arang’aṉwè be kamba, ndô Iṉiṉa nya Reri yaṉi nyô be kamba gô gare yaṉi.
21Mwô’ngwè e be piṉa mwô’ngi yè gô juwa, ni rerè kè ômwaṉa; n’awaṉa wi be kum̃aṉa azir’izombi yaô, ayôṉiza waô. 22Aṉwè be numbô n’aṉaga waôdu g’ômwanja w’ini nyam̃; ndô ayè yi be kongwa kwanga gô ntyay ayè be sungiṉô. 23Ndô gô be kombiza waô ṉwè gô nkala yiṉo, wangaṉi gô nkala mori. Giligili mi bulinya ṉwè inè, aṉwè am̃aze inkala s’Israèl, Ômwaṉa w’ôma ṽyagaga ro.
24Ôṉèngi azele vyagaṉô n’ôṉènji wè, ge nyôngô vyagaṉô na reri yè. 25Are kwèkwè gôr’ôṉèngi gô dendiṉô g’ôṉènji wè, ni nyôngô ga reri yè. Gambô rerè yi nagô aweyô ne waô inè, Beèlzebul, ko pôrô mongi wi nagô yè. 26Sambô aryaṉi waô; konde e zel’ezom̃a jumbuṉô pa zi re z’awôm̃unyô, ge ôsam̃u wi ntyorya wi re w’amyô. 27Ôsam̃u wi bulinya myè ṉwè gô mpiri, gambaṉi wô g’ôzange; n’ôsam̃u wi bulinya myè ṉwè g’ôrôy, gambiṉaṉi wô gw’imyanjamyanja y’inagô. 28Aryaṉi waô wi jôṉ’ ôkuṽa, ndô wi re jolye jôṉ’ iṉiṉa; ndô rô tyeṉi yè are ko jiliz’ iṉiṉa n’ ôkuṽa ta gw’elôngô z’ôgôṉi. 29Nkène mbaṉi si pa kôlô ni vintè? Ndô mori gô sô y’avôswe gô ntye kaô reri yaṉi ajivira. 30Vangaṉe itwe si wônjô yaṉi si re tangô pa. 31Sambô aryaṉi aṉw’are njôni vyagaṉô n’inkène sinyenge.
32Sambô ôm’edu e be mèma myè gw’azô m’aṉaga, ayè be mèmô myè kè g’ôzô wa Reri yam̃ yi re g’ôrôṽa; 33ndô ôm’edu e be danda myè gw’azô m’aṉaga, ayè be dandô myè kè g’ôzô wa Reri yam̃ yi re g’ôrôṽa.
34Avikilyaṉi nè, my’aṽyeṉi gô piṉ’am̃ènjè gô ntye; mi re bye gô piṉ’am̃ènjè, ndô ôkwara w’iwora. 35Konde my’aṽyeṉi gô pang’ôma ndôṽa na reri yè, n’ômwamwantô ni ngi yè, n’ômwantô ni ngwè y’ôṉôm̃u wè; 36n’ilôvalôvi y’ôma yi be dwaṉe mongi wi nagô yèmè. 37Ayè yi tonde rerè ge ngwè vyagaṉô na myè e ze n’inyanga gôre myè; n’ayè yi tonda mw’ôṉôm̃e ge mwa’mwantô vyagaṉô na myè e ze n’inyanga gôre myè; 38n’ôm’ edu are awonge krosi yè, azônga myè, e ze n’inyanga gôre myè. 39Ayè yi be penjavenj’em̃èṉo zè, e be periza zô; n’ayè yi be periz’em̃èṉo zè g’ômwanji wam̃, e be dènga zô.
40Ayè yi bonga ṉwè e bonga myè, n’ayè yi bonga myè e bong’ayè y’arôm̃i myè. 41Ayè yi bong’ôvogisi gw’ina ny’ôvogisi e be bong’ipa s’ôvogisi, n’ayè yi bong’ôma w’ôgôre gw’ina ny’ôma w’ôgôre, e be bong’ipa s’ôma w’ôgôre. 42N’ôm’ edu e be jonj’ôm̃ori gôr’ awangô wiṉo elasi z’aṉingô mi nkèy dadyè, konde ayè ôṉèngi wam̃, giligili mi bulinya ṉwè inè, averiṉô n’ipi sè.
നിലവിൽ തിരഞ്ഞെടുത്തിരിക്കുന്നു:
Matay 10: MYE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Published by the British and Foreign Bible Society in 1927.
