Yôèl 2
2
1Rôngaṉ’ôrombo gô Siyôn! ko bôgiṉaṉi mbôgiṉa gô nômbi yam̃ y’ôrunda! alwaṉi wi ntye waôdu wi ga ratam̃iṉe! konde ntyugu yi Yeôva yi bya, konde y’atweṉi pyèrè. 2Ntyugu yi mpiri n’iwômbe, ntyugu yi vindi na yi mpiri ya doṽadoṽa, yi bya ga ôṽanga wi tongwa gw’inômba. Nyiṉo n’iṉongw’ivôlô na nyi ngulu, mbela mè yi pa dwaṉa ni mori, yô kè y’arô dwaṉe nyèṉè vangaṉe gw’ampôm̃a mi bya. 3Ôgôṉi wi bam̃iṉa gô bôsô yaô, na gô nyum̃i yaô ôgôṉi wi dumbula; ntye y’avegagi gw’alônga ga ntyaga y’Edèn, n’avila vovo y’atweṉi ntye mbe: e zel’ezom̃a zi pera waô. 4Ibôm̃unyi saô si r’egolaṉi ga ibôm̃unya s’ikavala, wi pale mangô ga mongi wi re panda pa gw’ikavala. 5Wi dôgwa ni nyongolè gô sôsôlô y’inômba ga nyongolè y’intyôṉe, ga itôdwarôdwa s’ibam̃iṉa s’ôgôṉi, gô peza wô wulu. Ga mbèli yi ngulu yi kekiza gw’igoṽi. 6Gw’azô maô aṉongo mi tatam̃iṉa, azô môdu m’atweṉi zawa. 7Wi dôgwa ga ṽèmba y’igoṽi, wi panda gw’ikômba g’aṉaga w’igoṽi; ôm’edu e kènda gô mpoṉo yè, ko yè ayèrwa avila gô mpoṉo yè. 8Wi pa bangaty’ôm’edu, ôm’edu e bandam̃iṉe nkondo yè; wi pôswa gô lendiṉa, ko w’azimby’ôgèndo waô. 9Wi jiraṉa gô nkala, wi pale mangô gw’izira, wi panda gw’inagô, wi jingiṉa n’iwundè ga ôfwe. 10Ntye yi sugyazugya gw’azô maô, ôrôṽa wi tatam̃iṉa, nkômbe n’ôgwèli yi jilangaṉa, igègèṉi yi simby’ôzange wa yô. 11Yeôva e pang’inyôy nyè jogaṉô gô mbèli yè; konde ôlakô wè wi r’ômpôlômè, n’ôma wi pang’igambi nyè gô twa are ni ngulu; konde ntyugu yi Yeôva yi re mpôlô, yi r’ererya: mande re ko jolye simbya yô?
12Sambô vèṉo, bulye Yeôva, winyaṉi gôre myè n’irèm̃i yaṉi yôdu, ni peng’esônge, n’edingô n’amboga! 13Yaruṉaṉ’irèm̃i yaṉi, arang’ingoy saṉi, ko fwinyaṉi gôre Yeôva, Anyambyè yaṉi; konde are n’ipôgiṉa ni nkèngo, e pa sunge benda, are ni nkèngo mpôlô, e nige nkôndi avila gô mbe yi tôm̃ô yè. 14Mande re ko mya twa pa e ze fwinye ge nige nkôndi, ge twa pa e ze tig’ôzaviṉô gô nyum̃i yè, intyagô s’inya n’intyagô si jonga gôre Yeôva, Anyambyè yaṉi? 15Rôngaṉ’ôrombo gô Siyôn! myezaṉ’esônge n’ôlataṉô w’ôrunda! 16Latizaṉ’iṉongo, vangaṉ’ôlataṉô w’ôrunda! latizaṉ’aṉèro, latizaṉ’awaṉa, na waô kè wi jong’ambèṉè! ôṉôm̃e wi jômba e ga gogwe avila gw’ilwaṉô nyè, n’ômwantô wi jômbô avila gô nontye yè! 17Imiṉisè, inyôngô si Yeôva, si ga leṉe ntyo evungu ntyo mbôra yi jirô intyagô, ko sô bulya inè: Yeôva, ṽandam̃iṉ’iṉongo nyo! av’ijigi so gô ntyoṉi, gô sèlyô n’aṉongo! ntiṉa nde yi re waô ko bulya gôr’aṉongo inè: anyambyè yaô are na gwe?
18Yeôva ayeṉi ñandi g’ômwanja wi ntye yè, ko yè pôgiṉ’iṉongo nyè. 19Yeôva e jivira, awuliny’iṉongo nyè inè: vônaṉi mi be tôm̃’ibile gôre ṉwè, ivè n’agali, ko ṉwè jôra; na myè mi ze tô pange ṉwè nyèṉè ntyoṉi gôr’aṉongo. 20Mi be tômb’ôlôvalôvi wi Nor bô avila gôre ṉwè, mi be suga wô gô ntye yi re kela pa na y’ewôga, waô wi dônga, gô mbeṉe yi nkôṽa yi tongwa ni nkômbe, waô wi bya ni nyum̃a, gô mbeṉe yi nkôṽa yi kènda ni nkômbe; n’aṉangô mè ambe mi be jogaṉô, n’ômpuṉi wè wi be panda gw’igôṉô, konde are denda p’isam̃u impôlô.
21Ntye, arya, yeṉe mbya n’igeṽa, konde Yeôva are denda p’isam̃u impôlô! 22Inyam̃a s’iga, aryaṉi, konde idèdè y’itôve yi be tô punjiṉa, konde rere yi be jaṉ’ilônda ya yô, erere zi figi n’ôgoli wi be p’ambya ma yô. 23N’aṉwè, awaṉa wi Siyôn, yeṉaṉi mbya n’igeṽa gôre Yeôva, Anyambyè yaṉi, konde e be pa ṉwè ningô gw’egômbe za yô, e be nogiza ṉwè ningô nônga na yi num̃uṉa, ga gw’alônga. 24Areṽiṉô m’ilônda mi be jônya guguru n’ibile, n’intyèngè si be pôva n’ivè n’agali. 25Mi be tô fwiṉiza ṉwè impum̃a yi r’ôsakampazô nya pa, yelèk, asil, gazam, mbèli yam̃ mpôlô y’arôm̃yô myè gôre ṉwè. 26Aṉwè be nya ko ṉwè jôra, n’aṉwè be sum̃iny’ina nyi Yeôva, Anyambyè yaṉi, yi re denda p’isam̃u yi mamô gôre ṉwè; n’iṉongo nyam̃ nyi ze tô jeṉizô nyèṉè ntyoṉi. 27N’aṉwè be mya inè: my’are gô garegare y’Israèl, na inè: myè ne Yeôva Anyambyè yaṉi, na inè, e zele nyèṉè: n’iṉongo nyam̃ nyi ze tô jeṉizô nyèṉè ntyoṉi.
28Avila vovo, mi be jir’iṉiṉi nyam̃ gw’izôṉe yôdu; awaṉi waṉi aṉôm̃e n’awaṉi waṉi antô wi be poga, aṉèro saṉi si be jinô inyinô, n’awanjo maṉi mi be jeṉ’ijeṉa. 29Na gôr’inyôngô iṉôm̃e na gôr’inyôngô inyantô kè, gw’intyugu mèsoṉo mi be jir’iṉiṉi nyam̃. 30Mi be tum̃iny’isam̃u yi mamô g’ôrôṽa na gô ntye, ntyiṉa, ôgôṉi, n’am̃èngo m’ôtutu; 31nkômbe yi be kaluṉô mpiri, n’ôgwèli ntyiṉa, ntyugu yi Yeôva ṽyagaga ro, ntyugu mpôlô mèyoṉo n’ererya. 32Vovo, egômbe mèzoṉo, ôm’edu e be dagiṉ’ina nyi Yeôva e be sungiṉô, isungiṉa si be dwaṉa gô nômba yi Siyôn na gô Yerusalèm, ga nt’are Yeôva bulya pa, na gôre mbèy yi re tôlizô pa yi be fweyô ne Yeôva.
നിലവിൽ തിരഞ്ഞെടുത്തിരിക്കുന്നു:
Yôèl 2: MYE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Published by the British and Foreign Bible Society in 1927.