Danyèl 9
9
1G’ômpum̃’ôlônga wi Daryus, y’ômwaṉa w’Asuerus, avila gô mbuṽe yi Maday, arweṉi ôga gw’ipangiṉa sa mongi Kalde, 2g’ômpum̃’ôlônga w’ipangiṉi sè, myè Danyèl, my’ayeṉi gô yangô inè, e be pyagaṉ’agôm̃i m’impum̃’ôrwageṉô g’ômwanja w’ijiliza si Yerusalèm, ga nt’are ntangô y’impum̃a y’agambyô ne Yeôva ni Yeremya, y’ôvogisi. 3N’agegunyi myè ôzô wam̃ gôre Rerè Anyambyè, gô buta n’ikambiṉa na gô kwen’inkolo, gô peng’esônge na gô nwaṉe pinde n’ômbu. 4N’agambiṉi myè Yeôva, Anyambyè yam̃, am̃èm̃’imèma siṉo inè:
Rerè Anyambyè mpôlô n’ererya, awè yi penjavenje njeka na yi dende nkèngo gôre waô wi tondo na gôre waô wi penjavenj’isômbyi so! 5Azw’are fwem̃a pa, azw’are janja p’ibe, azw’are dwaṉa pa règo avava, azw’are kegwa pa avila gw’isômbyi so n’avila gw’intyale so. 6Azwè pa pôganyô inyôngô so, ivogisi, yi re kamba pa gw’ini nyo gôr’agi wazô, gôr’ivangiṉi yazô, gôr’ireri sazô na gôr’iṉongo nyôdu nyi ntye. 7Rera, ôgôre wi dwaṉa gôre wè, ndô gôre zwè ne ntyoṉi y’ôzô, gô ntyugu ya ṉèṉo wiṉo, gôr’aṉôm̃e wi Yuda, gôr’alwaṉi wi Yerusalèm, na gôr’Israèl yôdu, na gôre waô wi re pyèrè, na gôre waô wi re bô, gw’intye sôdu si re wè suga pa waô g’ômwanja w’ipava si re waô pava pa gôre wè. 8Rera, gôre zwè ne ntyoṉi y’ôzô, gôr’agi wazô, gôr’ivangiṉi yazô, na gôr’ireri sazô, konde azw’are fwem̃a pa gôre wè. 9Gôre Rerè, Anyambyè yazô, are nkèngo n’inyeza, konde azw’are pava pa gôre yè. 10Azwè pa jogiṉô inyôy nyi Yeôva, Anyambyè yazô, gô sông’ampangi mè mi re yè dôṽya pa gw’azô mazô vo inyôngô sè, ivogisi. 11Israèl yôdu yi re pava p’ivangi nyo, wi re kegwa pa ko w’avôganyô inyôy nyo. Yeṉo izavô yi re jirô pa gôre zwè, n’irangô yi re tèndô pa gw’ivanga nyi Môsès, yi nyôngô y’Anyambyè, konde azw’are fwem̃a pa gôr’Anyambyè. 12Are dwaṉiza p’agamba m’agambyô yè gôre zwè na gôr’ivangiṉi yazô y’avangiṉagi zwè, aṽagi njuke mpôlô gôre zwè, yi re yi pa bya ni mori g’ôdôlôngô w’ôrôṽa wôdu ga nt’are yô bya pa gô Yerusalèm. 13Ga nt’are tèndô pa gw’ivanga nyi Môsès, njuke yiṉo yôdu yi re bya pa gôre zwè; n’azwè pa kambiṉa gôre Yeôva, Anyambyè yazô, azwè pa kegwa avila gw’ibe sazô, ge zwè pôganyô ôrèti wo. 14Yeṉo Yeôva are bèmba pa g’ômwanja wi njuke yiṉo, aṽaga yô gôre zwè; konde Yeôva, Anyambyè yazô, ar’ôgôre gw’isam̃u yôdu yi re yè panga pa, ndô azwè pa pôganyô inyôy nyè. 15Na vèṉo, Rera, Anyambyè yazô, awè yi re kogunya p’iṉongo nyo avila gô ntye y’Egipt n’ôgo wo wi ngulu, avango elum̃i ga nt’are ṉèṉo wiṉo, azw’are fwem̃a pa, azw’are janja p’ibe. 16Rera, ga nt’are nkèngo yo mpôlô, eguṉu zo n’ibendi so si ga gegwe avila gô nkali yo Yerusalèm, n’avila gô nômbi yo y’ôrunda; konde g’ômwanja w’ibe sazô na g’ômwanja w’ifwem̃a s’ireri sazô, Yerusalèm n’iṉongo nyo wi re ni ntyoṉi gôre waôdu wi re zwè vingôvingô. 17Sambô vèṉo, Anyambyè yazô, vôganyô ikambiṉa n’inkolo si nyôngô yo, na g’ômwanja w’itonda sa Rerè, ṽambiz’ôzô wo gô nagô yo y’ôrunda yi re bundakaṉa pa. 18Anyambyè yam̃, yogo n’ôrôy wo ko pôganyô! Ṉunguṉ’antyo ko pône wôgi yazô, vône nkala yi fweyô ini nyo! Konde azwè pa bôm̃uny’inkolo sazô gôre wè g’ômwanja w’ôgôre wazô, ndô g’ômwanja w’ipôgiṉi so ipôlô. 19Rera, vôganyô! Rera, nyeza! Rera, yogo! lenda, alinga, v’itondi somè, Anyambyè yam̃! Konde ini nyo nyi dagiṉô gô nkali yo na gôr’iṉongo nyo.
20Agambagi myè, agambiṉagi myè, am̃èmagi myè ibe sam̃ n’ibe s’iṉongo nyam̃ Israèl, n’arum̃inyagi myè inkolo sam̃ gôre Yeôva, Anyambyè yam̃, g’ômwanja wi nômba y’ôrunda y’Anyambyè yam̃; 21arô kambagi myè gw’ikambiṉi sam̃, na vôna, ôma, Gabriyèl, y’ayenyô myè gw’alônga gw’ijeṉa, azusi pyèrè na myè ndôgwaga nèganèga, gw’egômbe zi jirô ntyagô yi nkôlô. 22N’aṉènji yè myè, agamba na myè. N’awulinyi yè myè inè: Danyèl, my’are bya pa vèṉo gô jenjiz’ikôtizi so. 23Gw’avakilyi wè gô kambiṉa, igamba ny’agogwi, na my’are bya pa gô myezo nyô; konde ô tondô pôlô. Vôganyô igamba, ko kôtiz’ijeṉa! 24Agôm̃i m’iwiki ôrwageṉô mi re tetô pa gôr’iṉongo nyo, na gô nkali yo y’ôrunda, gô maz’ipava na gô jiliz’ibe, gô taṽe mpungu y’ibe, na gô bag’ôgôre wa koṉako, gô dingilya ijeṉa n’ôvogisi, na gô sagy’Ôyombwi w’iyombwi. 25Sambô mya yô, ko kôtiza! Avila gw’egômbe z’amyezô igamba inè, Yerusalèm e be tô nôgô kwanga gôr’Ôzagyô, gôr’Ôgèndyisi, e be dwaṉe wiki ôrwageṉô; gw’agôm̃i m’iwiki ôrôṽa ni wiki mbaṉi, agala n’amemba mi be tô dwaṉizô, ndô gô gômbe yi njuke. 26Agôm̃i m’iwiki ôrôṽa ni wiki mbaṉi pyagaṉa pa, ôzagyô e be teṉô, ndô e ze dwaṉ’ôrugu. Iṉongo ny’ôvangiṉi wi be bya nyi be jilize nkala ni mbôra y’ôrunda, ni ntyay ya nyô yi be bya ga ijambunya s’aṉingô; akenjô nè, ijiliza si be dinga kwanga gô ntyay y’igoṽi. 27Ôvangiṉi mèwoṉo e be jeke njeka njoli n’awenge vo wiki mori, na gô garegare yi wiki e be pange ntyagô ni mpagaga gô maṉa; ôyilisi e be dend’isam̃u yi bikô vyagaṉô kwanga ijiliza n’ôsam̃u wi re kenjô pa w’abya gôr’ôyilisi.
നിലവിൽ തിരഞ്ഞെടുത്തിരിക്കുന്നു:
Danyèl 9: MYE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Published by the British and Foreign Bible Society in 1927.