Danyèl 6
6
1Daryus aṽeli gô dôṽya gw’iṉongo nkam̃a y’ivangiṉi n’agôm̃i m’ivangiṉi ambaṉi y’avegagi gô pangiṉ’iṉongo nyôdu. 2Na gw’ewônjô za mongi siṉo alôṽy’ivangiṉ’irarô, ni Danyèl avegagi gô ntangô ya mongi siṉo, ko ivangiṉi yiṉo pe ntangô yaô, ko ôga ayeṉe njuke. 3Danyèl avyagaṉi gogi n’ivangiṉi, konde avegagi n’iṉiṉ’iṽyamè; n’avikilyag’ôga gô dôṽyè gw’ipangiṉa sôdu.
4N’awuti gogi n’ivangiṉi ntiṉa yi sozize Danyèl g’ômwanja w’isam̃u y’iṉongo. Ndô wi re jolye gô dènge ndaga, ge ôsam̃u wi ntyèmbo, konde avegag’ôma w’ibekelyô, e pa dèngô gôre yè ifwem̃a ge mbe. 5N’awulyi mongi siṉo inè: Azwè re dènge ndaga gôre Danyèl yiṉo, kaô azw’adènga yô gôre yè gw’ivanga ny’Anyambyè yè. 6Gambèṉè gogi yiṉo n’ivangiṉi yiṉo w’agèndi gôr’ôga njirag’ôtogo, awulinyè inè: Ôga Daryus, lwaṉa gô koṉako! 7Ivangiṉi yôdu y’iṉongo, ivangiṉi yi nagô y’ôga, iyôfisyè, irevi, n’iguvèrnèr, waôdu w’alataṉi inè, ôga e ga lôṽy’ivanga, ko nyô dwaṉ’iyoli inè, ôm’edu, avila gw’agôm̃i m’intyugu ararô, e be kambiṉa gôr’anyamby’edu ge gôr’ôma, tômbare pa awè, ôga, e be pungô g’ômpulungu w’iliyoni. 8Ndô vèṉo, ôga, yoliz’ivanga, arènd’ivanga, ko nyô ny’agalwa, ga nt’ar’ivanga nyi Maday na nyi Paras, nyi re ny’agalwe du.
9Yeṉo alingily’ôga Daryus ivanga n’irèndo.
10Gw’amyeṉi Danyèl inè, ivanga ny’atèndyô, ayingiṉi yè gô nagô yè, iwundè si nontye s’avegagi zange gô nkôṽa yi Yerusalèm; alôṽi yè akotolo nyongo ntyarô g’ôwenja, agambiṉa; n’azum̃inyagi yè Anyambyè yè, ga nt’alendagi yè gw’alônga. 11Vovo ayingiṉi mongi siṉo njirag’ôtogo, n’aliṽinyi waô Danyèl nkambiṉaga ni nkwenag’inkolo gôr’Anyambyè yè. 12Avila vovo awôm̃unyi waô g’ôzô w’ôga, awulinyè g’ômwanja w’ivanga ny’ôga inè: Ô pa tènd’ivanga inè, ôm’edu avila gw’agôm̃i m’intyugu ararô e be kambiṉa gôr’anyamby’edu ge gôr’ôma, tômbare pa awè, ôga, e be pungô g’ômpulungu w’iliyoni? Awiṉizi ôga inè: Ôsam̃u wi re rèti, ga nt’ar’ivanga nyi Maday na nyi Paras, nyi re ny’agalwe. 13N’arô kambi waô awuliny’ôga inè: Danyèl, ôm̃ori avila gôr’ikôte yi Yuda, e pa pôganyô igambi nyo, ge ivanga nyi re wè tènda pa, ndô e kambiṉ’ikambiṉi sè nyongo ntyarô g’ôwenja.
14Gw’ayogyô ôga agamba miṉo, ayeṉi yè ekèṽ’evôlô; aṽeli yè gô sungiṉe Danyèl, agèṉiza gô danduṉè kwanga gw’avôswi nkômbe. 15Ndô aṉaga wiṉo w’arô kundi gôr’ôga agamba awulinyè inè: Ôga w’avôrô inè, ivanga nyi Maday na nyi Paras nyi re nè, ivanga nyôdu ge itènda sôdu si dwaṉizô ne ôga s’agalunyô. 16Vovo azômby’ôga inè, Danyèl e ga ṽagô, ko waô pungè g’ômpulungu w’iliyoni. N’agambi ôga awulinye Danyèl inè: Anyambyè yo yi janjiṉô wè pèkèpèkè, e ga zungiṉe wè! 17N’aṽagyô idô, alôṽyô g’ômpômbala w’ômpulungu; n’alingilyô nyô n’ôga n’ôm̃ôrô wè n’ôm̃ôrô w’ivangiṉi yè, ko ndaga y’agalwa g’ômwanja wi Danyèl.
18Yeṉo agènd’ôga gô nagô yè; n’alwaṉi yè ôgwèra mpengag’esônge; e pa jivira kè ironda gô bya gôre yè, ge jolya gô dèw’antyôviṉô. 19N’aṉongw’ôga ayenjiṉa, ntaṽanga, agènde ngwambè g’ômpulungu w’iliyoni. 20Na gw’azusi yè pyèrè n’ômpulungu, aweyi Danyèl n’inyôy ny’ekèṽa. N’agamb’ôga awulinye Danyèl inè: Danyèl, nyôngô y’Anyambyè ya bo, Anyambyè yo, yi janjiṉô wè pèkèpèkè, alwaṉi ni ngulu yi sungiṉo avila gôr’iliyoni? 21N’awulinyi Danyèl ôga inè: Ôga, lwaṉa gô koṉako! 22Anyambyè yam̃ are tôm̃a pe yenjèl yè, aṉunj’agwaṉa m’iliyoni, ko s’avanga myè njuke, konde mi zele dèngô pa ni ntyèmbo g’ôzô wè; na g’ôzô wo kè, ôga, mi zele denda pe ndaga mbe. 23Vovo ôga ayeṉi mbya mpôlô, n’azômbyi yè inè, Danyèl e ga gogunyô avila g’ômpulungu. Yeṉo arômbyô Danyèl avila g’ômpulungu, e pa dèngô nkazy’edu gôre yè, konde aṽekelyi Anyambyè yè. 24N’azômby’ôga inè, mongi mèsoṉo w’azozizi Danyèl wi ga ṽagô avungô g’ômpulungu w’iliyoni, waô, awaṉi waô n’antu waô; na waô ziṽaga ro gô ntiṉa y’ômpulungu, iliyoni s’agôti waô am̃oguṉe pi yaô yôdu.
25Avila vovo, ôga Daryus arèndi gôr’aṉongo môdu, gôr’imbuṽe sôdu, na gôr’aṉaga w’inkambiṉi sôdu, si dwaṉa gô ntye yôdu inè: Am̃ènjè mi ga vô am̃enge gôre ṉwè! 26Mi sômbya inè, gw’ipangiṉa sôdu s’iṉongo nyam̃, aṉaga wi ga ratam̃iṉe ary’Anyambyè yi Danyèl. Konde ayè ne Anyambyè ya bo, n’ayè e dwaṉa gô koṉako; n’ipangiṉi sè s’ayilizô, n’ipangiṉi sè si be dwaṉa kwanga gô ntyay. 27Ayè e danduṉa azungiṉa, ayè e dende lemba n’isam̃u yi mamô g’ôrôṽa na gô ntye. Ayè are danduṉa pe Danyèl avila gô ngulu y’iliyoni.
28Yeṉo Danyèl alwaṉi mbyambye gw’ipangiṉa si Daryus, na gw’ipangiṉa si Kirus, ya mwô’Paras.
നിലവിൽ തിരഞ്ഞെടുത്തിരിക്കുന്നു:
Danyèl 6: MYE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Published by the British and Foreign Bible Society in 1927.