रोमी 4
4
अब्राहाम विश्वास लकीङ धर्मी ठहरीस्च
1अब शरीर अनुसार कानुङ पुर्खा अब्राहामौ बारेयाङ कुरा जाटीङ। परमेश्वरौ म्याहासाङ होसे कुटजाट्न धर्मी ठहरीसा ट डेच कुरा ङोसीङ। 2इडीक अब्राहामै जाट्च कामौ कारणै धर्मी ठहरीस्च लेनाङ होसकी घमण्ड जाट्च ठाउँ ङुच लेया, तर परमेश्वरौ म्याहासाङ होच्यो घमण्ड जाट्च ठाउँ माले। 3हीजैडेनाङ धर्मशास्त्राङ रीक्ङने, “अब्राहामै परमेश्वरकी विश्वास जाटा, र होच्यो होसे न विश्वासै जाट्नाङ परमेश्वरै होसकी धर्मी ठहरीया।”#उत्पत्ति १५:६ 4अब काम जाट्चये कुसे ज्याला डुप्ले होसे दान होइन, तर होसे च होच्यो डुप्च हक हो। 5सुयेर लहे जाट्च कामाङ भरोसा माडाले तर पापीकुङ पाप क्षमा जाट्च परमेश्वरकी विश्वास जाट्ले डेनाङ होसे विश्वासै जाट्नाङ न परमेश्वरै होसकी धर्मी ठहरीले। 6दाऊद राजै र काम बिना न परमेश्वर लकीङ धर्मी ठहरीस्च भर्मीयो बारेयाङ इट डेले,
7“परमेश्वरै पाप क्षमा जाट्च भर्मीको आशिष डुप्चको हो,
सुओ अपराधको क्षमा छान्नने,
र होखुरीकुङ पट्ट न पापको मेट्डीम याम्हने।
8होसे भर्मी आशिष डुप्च हो,
होच्यो पापौ लेखा परमप्रभुये मालाले।”#भजनसंग्रह ३२:१-२
9इसे आशिष चहिँ खतना जाट्च यहूदीकुङ लागि मट्टै होइन, तर खतना माजाट्च अन्यजातिकुङ लागि र हो। अब्राहामै जाट्च विश्वास लकीङ न होसकी धर्मी ठहरीमन्या डेयार कान डेले। 10अब्राहाम सेन धर्मी ठहरीसा ट? होचे व्यवस्था अनुसार खतना जाट्च अघि की न्हुइङ? खतना जाट्की डेनाङ अगाडि न होचे विश्वास जाटा। होटबाटै परमेश्वरै होसकी खतना माजाट्न न धर्मी ठहरीच हो। 11होटबाटै खतना चहिँ होच्यो विश्वास लकीङ परमेश्वरै धर्मी ठहरीच चिन्ह लेया। इटजाट्न न खतना माजाट्च तर परमेश्वरकी विश्वास मट्टै जाटार धर्मी ठहरीस्च अन्यजातिकुङ र अब्राहाम आत्मिक बोइ छाना। 12इटजाट्न न यहूदीकै खतना जाट्च बाटै मट्टै होइन, तर होखुरीक र अब्राहाम लेखा न विश्वासाङ ह्वाच बाटै अब्राहाम होसे यहूदीकुङ आत्मिक पुर्खा र छाना।
परमेश्वरौ प्रतिज्ञा विश्वास जाटार डुप्ले
13अब्राहाम व्यवस्था मन्डीयार होइन, तर विश्वास लकीङ धर्मी ठहरीस्चबाटै परमेश्वरै होसकी र होच्यो सन्तानकोलाक संसारौ हकवाला खास्च प्रतिज्ञा जाटा। 14इडीक व्यवस्था मन्डीचको मट्टै हकवाला छान्ने डेनाङ विश्वास काम मालग्डीस्च र प्रतिज्ञा व्यर्थौ छान्च लेया। 15हीजैडेनाङ व्यवस्था मन्डीकी माह्योक्नाङ परमेश्वरौ क्रोध राल्हे।
तर कुला व्यवस्था माले होला अपराध र माछान्ने।
16होटबाटै प्रतिज्ञा चहिँ विश्वास लकीङ डुप्चबाटै इसे परमेश्वरौ अनुग्रहाङ भर पर्ले। इचे अब्राहामौ पट्ट न सन्तानौ लागि प्रतिज्ञा पक्का जाट्ले। इसे अनुग्रह व्यवस्था लेचकुङ लागि मट्टै होइन तर अब्राहामौ ल्याक्च विश्वास जाट्चकुङ लागि र हो, हीजैडेनाङ अब्राहाम कान पट्टकुङ पुर्खा हो। 17धर्मशास्त्राङ इटजाट्न रीक्ङने, “ङै नाकोकी वास्टै जातिकुङ पुर्खा खास्नने।”#उत्पत्ति १७:५ अब्राहामै सीच भर्मीकोलाक जीवन याछ र सृष्टियाङ मालेच कुरा सृष्टि जाट्च परमेश्वरकी विश्वास जाटा। 18परमेश्वरै अब्राहामकी इट डेमन्या, “नाकुङ सन्तानको टुगाको लेखा न वास्टै छान्ने।”#उत्पत्ति १५:५ सन्तानौ आशा न मालेच बेलाङ र अब्राहामै वास्टै जातियुङ पुर्खा छान्ने डेम विश्वास जाटार आशा डा। 19होसे होडीक बेला सय वर्ष टाखी पामन्या, तर होसकी लाहा बुढा छान्न भ्याच र सारौ कोख बाँझी छान्च वार्न्ह र विश्वासाङ कमजोर माछाना। 20परमेश्वरै प्रतिज्ञा जाट्च कुराङ होचे पटक्कै शंका माजाटा तर झन् विश्वासाङ बलियो छानार परमेश्वरकी प्रशंसा जाटा। 21हीजैडेनाङ परमेश्वरै जाट्च प्रतिज्ञा साँची न पूरा जाट्ले डेच कुरा अब्राहामकी पक्का थाहा लेया। 22होटबाटै अब्राहामौ विश्वासै जाट्न न, “परमेश्वरै होसकी धर्मी ठहरीया”#उत्पत्ति १५:६ 23अब परमेश्वरै होसकी धर्मी ठहरीया डेयार रीक्च कुरा होच्यो लागि मट्टै होइन, 24तर कानुङ लागि र रीक्च हो। कानुङ येशू प्रभुकी सीच लकीङ जीवाटाक्च परमेश्वरकी विश्वास जाटा डेनाङ कानकी र धर्मी ठहरीले। 25कानुङ अपराधकुङ लागि परमेश्वरै येशूकी सीकीयो लागि सुम्पडीम याहा, र कानकी धर्मी ठहरीकीयो लागि होसकोकी परमेश्वरै सीच लकीङ जीवाटाका।
© 2025 by Mother Tongue Translators Society and Wycliffe Bible Translators, Inc.