1 Peter 2
2
CHAPTIR TWA.
The weel‐waled Corner‐Stane. The duties oʼ aʼ conditions oʼ folk — weel performed, whan Christ is weel followʼt.
1Sae, pittin by aʼ malice, and aʼ twafauldness, and aʼ pretence, and aʼ miscaʼin,
2As bairns new‐born, be ye fain to crave the aefauld milk oʼ reason, that sae ye may grow intil salvation;
3Gif sae ye hae tastit for yersels that the Lord is fuʼ oʼ mercie.
4To wham comin — a leevin stane, by men cuisten aside, but waled‐oot by God, and hauden in honor —
5Ye yersels, as leevin stanes, are biggit intil a spiritual hoose, to be holie priests, to offer up spiritual sacrifeeces, weel‐pleasin tae God, throwe Jesus Christ.
6For it is containʼd iʼ Scriptur, “See, I lay in Zion a heid corner‐stane, chosen, and hauden in honor, and wha lippens on him sal in naegate be putten to shame.”
7To you, than, is this honor; you wha lippen: but to sic as believe‐na — “The stane they that biggit wadna hae, the same was made a heid corner‐stane!”
8But, “a stumblin‐stane and a rock oʼ offence” to them that stoiter, bein disobedient to the word; until whilk they war appointit.
9But ye are “a waled‐oot race, priests oʼ royalty, a holie people”; a folk for his ain possession, that ye may tell oot the glories oʼ him wha bade ye oot oʼ darkness to come into his wunnerfuʼ licht.
10Wha at ae time war “nae‐nation,” but are noo a “Godʼs nation”; wha hadna been haein mercy, but hae obteened mercy e‐noo.
11Beloved, I entreat ye, as lodgers and pilgrims, keep ye frae carnal desires, sic as tak‐the‐field again the saul:
12Conductin yersels wiʼ honor amang the Gentiles; sae that whan they speak again ye as ill‐doers, they may, seein yere gude warks, glorify God in the #2:12 This (in baith the English versions, “the day oʼ visitation”) is no vera clear. It may be the Day oʼ Judgment; but, aiblins raither, is it no God, lookin doon to see gif they had faith amang them?day oʼ his comin amang them.
13Obey‐ye aʼ human ordinances, for the Lordʼs sake; gin it be to a Sovereign, as ower aʼ,
14Or to Governors, as by him set, for punishin ill‐doers, but for praise oʼ them that do weel.
15For sae is Godʼs wull, that wiʼ weel‐doin ye soud pit to silence the ignorance oʼ glaikit men:
16As free, and yet no haudin yere freedom for a cloak oʼ malice; but as servants oʼ God.
17To aʼ men gie honor; loʼe ye the britherhood; revere ye God; honor ye the Sovereign!
18Servants, gie‐in to yere maisters, wiʼ aʼ respecʼ; and no alane to the gude and cannie, but to the thrawart as weel.
19For this is till his praise, gif, on accoont oʼ conscience afore God, ane drees dool; sufferin wrangously.
20For whatna credit win ye, gin ye be cloured for yere ill‐deeds, that ye soud thole it? But, doin weel, and dreein ill, this is praise‐wordie wiʼ God.
21For to siclike war ye caʼd: for Christ sufferʼt in yere behauf, leaʼin ahint a paittern, that ye micht follow his fitstaps:
22“Wha did nae sin; nor was deceit fund in his mooth”;
23Wha, whan miscaʼd, miscaʼd‐na again; sufferin, he banned‐na: but gied himsel ower to him wha judges justly.
24Wha his ain sel bure oor sins in his ain body tae the tree; sae that we, haein deeʼt to sin, micht leeve to holiness: “by whase clours ye war healed.”
25For ye war like sheep, forwanderin; but are noo came hame to the Shepherd and Guide oʼ yere sauls.
നിലവിൽ തിരഞ്ഞെടുത്തിരിക്കുന്നു:
1 Peter 2: SCO1904
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Translated by Rev William Wye Smith. Published in Paisley, Scotland in 1904.